Polad Sabirlini doğum günü münasibətilə təbrik edirik! (6 aprel 1973-cü il)

Azərbaycan Jurnalistlər Birliyi Sumqayıt şəhər təşkilatının Gündəlik Analitik İnformasiya Agentliyinin və Azərbaycanın Mədəniyyət və Ədəbiyyat Portalının Rəhbərliyi Sizi, Azərbaycan Yazıçılar Birliyinin üzvünü, istedadlı qələm sahibini, gözəl şairimizi, Polad Sabirlini doğum gününüz münasibətilə səmimi qəlbdən təbrik edir, Sizə uzun ömür, möhkəm cansağlığı, xoşbəxtlik, işlərinizdə, ədəbi-bədii yaradıcılığınızda bol-bol uğurlar diləyir! Sevib, sevdiyiniz insanların əhatə dairəsində olun!

Mətbuat xidməti

SORUŞUN

Xoş sədanı dualardan,
Laylanı dildən soruşun.
Kəkliyi sal qayalardan,
Ceyranı çöldən soruşun.

Yaman olar sözün çiyi,
Sevincə qatın hər şeyi,
Ağ biləkdən bilərziyi,
Sığalı teldən soruşun.

Sabah bu gündən, dünəni,-
Özümçün, özgədən məni,
Koldan-kosdan bənövşəni,
Bülbülü güldən soruşun.

İgid eldən dönməz qəti,
Eldə yaşar el adəti,
Ürəklərdən məhəbbəti,
Zəhməti əldən soruşun.

Yar axtarar, yarı gəzər,
Gəzər, yarı sarı gəzər,
Çiçək üstə arı gəzər,
Sonanı göldən soruşun.

Sevə-sevə el, hamını,
Bir-bir tapar il, hamını,
Eldən alar ilhamını,
Poladı eldən soruşun.

16.09.2018.

ALLAHIM BİLİR

Başım elə qarışıb ki,-
Heç bilmirəm hayandayam.
Ölümdən bir az bu yanda,
Ayrılıqdan o yandayam.

Əlim hər işdən soyuyub,
Ovcumda üşüyür qar da.
Lap iki dünya bir ola,
Çıxan qan qalmaz damarda.

Dərdə-qəmə yaxınlaşır,
Məndən uzaqlaşan adam.
Ölüb-dirilir, ölümə,-
Baxıb yazıqlaşan adam.

Adam var qəm-kədərinə,
Gecə-gündüz güddü qonaq.
Bu dünyaya elə-belə,
Gəldi qonaq, getdi qonaq.

Xəyallarım pərən-pərən,
Savabı, günahım bilir.
Qismətimdə nə var görən?
Nə bilir, Allahım bilir.

29.03.2020

MƏNİM ÜNVANIMA DƏYMƏYƏYDİ KAŞ

Özgəyə qurduğu hiylə-kələyin,
Özü də bilmədən zoruna düşdü.
Ağız dolusuyla dediklərinin,
Deyəsən axırda toruna düşdü.

Min bir fitnə ilə, min bir şər ilə,
Ortada yeyənlər qıraqda gəzər.
Boş-boş xülyaları özünə sığmaz,
Yuxarı göz qoyar, ayaqda gəzər.

Zamanın şilləsi tutdu-tutmadı,
Nəfsinə qul olar, kölə yaşayar.
Yüz sifətə düşər, yüz dona girər,
Kiçilə-kiçilə belə yaşayar.

Əlləri hər yerdən üzülən kimi,
Üzünə geyməyə üz də tapar o.
Düzü səhv çıxardar, səhvi düz edər,
Hələ danışmağa söz də tapar o.

Ona gülünc gələr gülünc adamlar,
Özü gülünc halda – günə çatsa da.
Özünə “dost” tapar hamam suyuyla,
Söhbətə dönsə də, ünə çatsa da.

Mən özüm-özümlə bacarammıram,
Baş-ayaq zamanla necə yollaşım?
Necə baş çıxardım bu adamlardan, –
Heç nəyi almaym vecə, yollaşım?

Düşmənin tənəsi, dostun töhməti,
Mənim ünvanıma dəyməyəydi kaş.
Qabında bir şeyi olmayan, qəti, –
Özünü boş yerə öyməyəydi kaş…

26.03.2020.

ANAM NAMAZ ÜSTƏ İMİŞ

Dil açdı dərd pərdə-pərdə,
Hələ avaz üstə imiş.
Aşiq agah oldu dərdə,
Hər sirri saz üstə imiş.

Bundan da beş-betər üzü,
Sevinc üzü, kədər üzü,
Bu dünyanın lap hər üzü,
Nəzir-niyaz üstə imiş.

Əyri qara, düz ağ oldu,
Üz ağartdı, –
üz ağ oldu,
Xəta məndən uzaq oldu,
Anam namaz üstə imiş.

16.03.2020

“Kitabxana – koronavirusa YOX deyir!” layihəsi çərçivəsində uşaq yazarı Gülzar İbrahimova yeni şeirlərini təqdim edir


Azərbaycanda elan edilmiş karantin rejimi müddətində ictimai işlərdə geriləmə olmaması üçün mədəniyyət müəssisələri əhalini virtual formada maarifləndirməyə davam edir. Bakı şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanası da oxuculara xidməti dayandırmadan internet üzərindən onlara informasiya ötürməkdə xüsusi səy göstərir. Bu müddət ərzində Mərkəzi Kitabxana “Kitabxana – koronavirusa YOX deyir!” layihəsi həyata keçirmiş, koronavirusla bağlı mövzuda təbliğat işi aparmışdır. 
Layihəyə bu dəfə öz şeirlərini kitabxana ilə daimi əməkdaşlıq edən, kitabxananın Fəxri oxucusu Azərbaycan Yazıçılar və Jurnalistlər Birliklərinin üzvü, H.Zərdabi mükafatçısı, yazıçı Gülzar İbrahimova təqdim etdi. Şeirləri oxucuların ixtiyarına veririk.

Qoy təmiz olsun dünya və ya Rədd olsun pandemiya

Uşaqlar, darıxmayaq,
Evdən çölə çıxmayaq,
Əlləri tez-tez yuyaq,
Yaxşıca sabunlayaq.
İsti su ilə çimək
Mikrobları məhv edək!
Qoy təmiz olsun dünya,
Rədd olsun pandemiya!

Qurtarsın pandemiya

Oxuyum olum alim 
Özüm dərman düzəldim.
Elə olsun ki, dərman
Onu içəndə adam
O dəqiqə sağalsın,
Durub ayağa qalxsın.
Dərman səpim dünyaya
Qurtarsın pandemiya
Desinlər mənə –   “Əhsən!
Dünyanı qorudun sən”.

#Evdəqal kampaniyası çərçivəsində oxuculara virtual xidmətlər göstərilir


Xəbər verdiyimiz kimi, yaranmış vəziyyətlə əlaqədar, mart ayının 15-dən başlayaraq kitabxanalar oxuculara yalnız virtual xidmətlər göstərir: virtual kitab verilişi, virtual səyahətlər, Online aksiyalar və s.
Yazıçı-nasir, şair, müğənni, Azərbaycan Yazıçılar Birliyinin üzvü Zəka Allahverdiyev (Zəka Vilayətoğlu) M.Ş.Vazeh adına Yasamal rayon Mərkəzi Kitabxanasına elektron məktub yazaraq, onun kitablarını Azərbaycan ədəbiyyatının virtual kitabxanasında yerləşdirilməsini xahiş etmişdir. Zəka Vilayətoğlunun “Milena”, “Sənə bir söz deyəcəm…” və “Bataqlıq” adlı kitabları virtual kitabxanada yerləşdirilmişdir..
Zəka Vilayətoğlunun “Bataqlıq” adlı kitabına, onun müxtəlif illərdə qələmə aldığı povest və hekayələri daxil edilib. Yüksək koloritli bədii dillə qələmə alınan bu nəsr əsərlərində canlı həyat lövhələri, ictimai-siyasi hadisələrin bədii təsviri, müxtəlif tipli insanların peşəkarlıqla sərgilənən xarakterləri oxucunu həyəcanlandıra və uzun müddət öz təsirində saxlaya bilir. 
“Sənə bir söz deyəcəm…” kitabı isə Zəka Vilayətoğlunun, nəsr kitablarından sonra ilk şeirlər kitabıdır. Kitaba, müəllifin son illərdə yazdığı şeirlər daxil edilib. 
“Araz” Nəşriyyatında işıq üzü görən kitab isə “Milena” adlanır. Kitabda “Milena”, “Bağışlayın, cənab” povestləri və “Külqabı”, “Skripkaçı”,”Armanın ölümü” hekayələri yer alıb. Əsərin leytmotivi Rusiyada yaşayan azərbaycanlıların ümumiləşdirilmiş obrazı olan rəssamdır.
Kitabların tam mətni aşağıdakı linklərdədir: 

https://ebooks.azlibnet.az/book-01lat300320.html
https://ebooks.azlibnet.az/book-02lat300320.html
https://ebooks.azlibnet.az/book-03lat300320.html