“APREL – 2016”

                             “APREL – 2016”

(Aprel döyüşlərinin dördüncü ildönümünə ithaf edilir)

Bakı şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanası Rusiya Federasiyası Orenburq Vilayətinin model kitabxanası ilə birgə“APREL – 2016” adlı bilinqvistik virtual layihə reallaşdırıb.

Aprel döyüşlərinin dördüncü ildönümünə həsr olunmuş Azərbaycan və rus dillərində hazırlanmış interaktiv plakat Vikipediyadan götürülmüş “Aprel döyüşləri” rubrikası ilə başlanır. Burada 2016-cı ildə işğaldan tam, yaxud qismən azad olunan Azərbaycan kənd və yüksəkliklərinin xəritəsi verilmişdir.

İkinci sütunda rus dilində Vikipediyadan götürülmüş “Вооружённые столкновения в Нагорном Карабахе (2016)”  (“Dağlıq Qarabağda silahlı toqquşma (2016)”) sərlövhəli material yerləşdirilib. Həmin sütünda “2016-cı ildə şəhid olmuş Azərbaycan ogulları” YouTube kanalındakı film də öz əksini tapmışdır. Burada, Azərbaycanın müstəqilliyi və ərazi bütövlüyü uğurunda canından keçən şəhidlərin siyahısı verilmiş, həmçinin aprel döyüşlərində şəhid olmuş igid Azərbaycan oğulları, onların keçdiyi döyüş yolları haqqında ətraflı məlumatlar əks olunmuşdur. İnteraktiv plakatda yerləşdirilən video görüntülər maraq doğurur.

İnteraktiv plakatda Aprel döyüşləri, Aprel müharibəsi və ya Dördgünlük müharibə haqqında məlumatlar, 2016-cı il 2-5 aprel döyüşləri zamanı şəhid olmuş Milli Qəhrəmanlar Murad Mirzəyev, Şükür Həmidov və Samid İmanov haqqında interaktiv plakatda ətraflı məlumat əks olunmuşdur.

Dördüncü sütunda rus dilində YouTube kanalındakı “Azərbaycan heç vaxt torpaqlarının işğalı ilə barışmayacaq” adlı  film verilib.

“Aprel döyüşləri – 2016. Lələtəpə” markalar və zərflər haqqında rus dilində məlumat verilib. Burada qeyd olunub ki, Aprel döyüşlərinə həsr olunmuş 24 min  tirajla marka buraxılmışdır. Hər markanın ölçüsü 40×28 mm-dir.

İnteraktiv plakat rus dilində “Aprel döyüşləri – müasir Azərbaycan tarixinin ən uğurlu hərbi əməliyyatlarından biridir” adlı materialla yekunlaşır. Təqdim olunan material “Azərbaycan ordusu” qazetindən götürülərək armiya.az saytında yerləşdirilib.

Aprel döyüşlərinin dördüncü ildönümünə həsr olunmuş Azərbaycan və rus dillərində hazırlanmış interaktiv plakat bir sira MDB kitabxanalarına göndərilib.

İnteraktiv plakatla aşağıdakı linkdə tanış olmaq olar:

https://padlet.com/filivara/h6do7bn4vud5

İsmayıl İMZANDZADƏ.” BAŞINIZ SAĞ OLSUN, KƏLBƏCƏRLİLƏR…”

                  

     Oğuz elimiz Kəlbəcərin işğala məruz qaldığı 1993-cü il 02 aprel gecəsi qatarla Bakıya getdiyimdən,  rayonun  nankor qonşularımız tərəfindən ələ keçirildiyindən xəbərsiz idim. Hardasa saat on bir radələrində “Azərbaycan” nəşriyatında əzəli dostum Adil Cəmillə görüşəndə onu çox məyus halda görüb, səbəbini soruşdum. Adil müəllim üzümə təəccüblə baxıb: “Xəbərin yoxdumu, mənim beşiyim-ata ocağım Kəlbəcərin damı-daşı uçub üstümə tökülüb. Görürsənmi, qəddimi də düzəldə bilmirəm” – dedi…

  Adı dillərdə əzbər olan Kəlbəcər mənim aləmimdə yurdumuzun şah damarı, yenilməz qalası-bürcü idi. Onun işğalından üç-dörd ay keçməmiş növbə Ağdama, Ağdərəyə, Füzuliyə, Cəbrayıla, Qubadlıya və sonra da Zəngilana çatdı…

       Bilənlər yaxşı bilir ki, Qarabağın hər bir guşəsi insanları valeh edirdi. Kəlbəcərdə olduğu kimi bizim Cəbrayılda da yalçın qayalar, sərt yoxuşlar, sayı-hesabı bilinməyən bulaqlar, yaşıl donlu meşələr göz oxşayırdı. Bununla belə, Kəlbəcər ana təbiətin şah əsəri, Ulu Tanrının  ən möhtəşəm abidəsi idi.

     İlk dəfə 1978-ci ilin iyun ayının əvvəllərində Kəlbəcərdə, İstisuda, “Taxa düzü”ndə, “Ceyran bulağı”nda, “Bağıtsaq” yaylağında olmuşam. Elə o vaxtlardan bəri Kəlbəcər mənim yaddaşımda gözəlliklər diyarı kimi iz salıb. Cəbrayılın işğalından sonra Mingəçevirdə müvəqqəti olaraq məskunlaşdığım ilk vaxtlardan  Kəlbəcər camaatının böyük bir qismi ilə dostlaşdım. Ulu aşıq sənətinin bölgədə təbliğində böyük zəhmətləri olan Dumanın, Qoşqarın, Qaraxanın, Fərəcin, Ziyadxanın… adları dilimdən düşmədi. Bu gün Azərbaycan Yazıçılar Birliyi Mingəçevir bölməsinə qələmə aldıqları əsərlərlə yerli yazarlarla birgə “zinət”  verən Sönməz Ələkbər, Məhyəddin Məhərrəmoğlu, Zümrüd Rəhimova, Elşən Əzim, Mikayıl Xanlarov, Məhəmməd Nəbiyev…  (Allah rəhmət eləsin!) və  Ruslan Ələkbərlinin uğurlarına həmişə sevinmiş, Kəlbəcər ədəbi mühitinin zənginliyi iləigili qürur hissi keçirmişəm. Taleyin bəxşişinə bax ki, iyirmi il qabaq kəlbəcərlilərlə dost olduğum kimi həm də qohum olmuşam…

   Kəlbəcər uğrunda gedən döyüşlərdə minlərlə insanın şəhidlik zirvəsinə yüksəlməsindən, əsir-girov düşənlərin sonrakı talelərindən də yetərincə xəbərim var. “Zatı-kökü” bilinməyən bir bəlanın dünyamızı dolaşdığı bir gündə yurd həsrətinin iyirmi yeddinci aşırımını adlayan Kəlbəcər camaatının hansı iztirablar keçirdiyi hamımıza məlumdur. Bu hüzn dolu bir gündə tanıyıb-tanımadığımdan asılı olmayaraq Kəlbəcərin ağsaqqal-ağbirçəklərinə, ziyalılarına, cavanlarına xitabən deyirəm: –  “Allah cəmi şəhidlərimizə, o cümlədən o ulu məkanın ölüm-dirim savaşında ölümün üzünə şax baxan insanlara Ulu Tanrı qəni-qəni rəhmət eləsin!”” Başınız sağ olsun, Kəlbəcərlilər, gün o gün olsun ki, doğma ata-baba ocaqlarınıza təzədən qayıdasınız…

Elə bu ovqatla da Kəlbəcərlə bağlı iki şeirimi sağalmaz yurd yaralarınızın üstünə məlhəm kimi yaxmaq istəyirəm…         

 İSTİSUDA

Dədə Şəmşir, İstisuda
Sazın dindi, yaşa-dedim.
İlk sözümü Dəlidağda,
Sal qayaya, daşa-dedim.

Salam verdim Ağdabana,
Cığır dindi handan-hana.
Gülümsədi günəş ana,
Bəxtəvərsən meşə-dedim.

“Yelligədik” yaşıl ada,
Gəzdim şehə bata-bata.
Məmməd Aslan düşdü yada,
Bir də gəllik qoşa-dedim.

Yamacda qar damcı-damcı,
Daşlar üstə çəkdi qamçı.
Günəş ahıl dəyirmançı,
Gözəlmiş bu peşə-dedim.

Çeşmələr nəğməli-sözlü,
Yoxuş-yamac lalə üzlü.
Duman yolu kəsdi gizli,
Əcəb düşdüm işə-dedim.

Tərtər boyu gəzə-gəzə,
Söz sinəmdə döndü közə.
Ulu dağlar, keşkə sizə,
Bir də yolum düşə-dedim.

                      iyun, 1978

           SALAM DE

Şair Bəhmən, taleyimə acıma,
Yurd həsrəti qar ələyib saçıma.
Kəlbəcərli qardaşıma, bacıma
Perik düşən ellərimdən salam de!

Qəriblikdə nə xoş ovqat, nə həvəs
Bizi yaman sıxcalayır bu qəfəs.
Desələrki Dəlidağın hanı bəs,
Bürcüm uçdu, yağmalandı qalam, de!

Qırov düşdü simlərinə sazımın,
Çəhlimində güllər açmır yzımın.
Beş il qabaq “xaç nişanlı” tazının
Qarşısında ağlar qalan lalam, de!

Başımıza kül ələdi zamana,
Dünya qalmaz naxələfə, yamana.
Bir ox kimi qoyulmuşuq kamana,
Bu yaşımda bir sızlayan “valab”, de!

Ulu Tanrı yaratmayıb sərt bizi,
Arxa bilir ərən bizi, mərd bizi.
Köynəyindən keçiribdi dərd bizi,
İsmayıla qardaşım de, balam de!

                                  1996

Xalq şairi Vahid ƏZİZ.”Durnalar”

Qışın bitməsini orda gözləyib,
baharda qapımı döyür durnalar,
yanımda özünə-“buralı” deyib,
Qürbətdə-“oralı” deyir durnalar.

Son bahar onlara bahanə kimi,
uçarlar yol gedən bir namə kimi,
sevgidən danışan nəğmələr kimi–
bayatı durnalar,şeyir durnalar.

Bu ağır köçəköç nə zaman bitər?
şimşəklər yandırar,küləklər didər,
niyyətli yerlərə çatanə qədər
səmada içini yeyir durnalar.

Bildir bir dəstə də köç eləyirdi,
yerin cazibəsi güc eləyirdi,
biri–bir şeirimi höccələyirdi,
mənə də verdilər dəyər,durnalar!

İqlimlər müxtəlif,dünya yumrudur,
bəlkə yaşam üçün maraqlı budur?
hər yerdə hər şeyi havadan tutur-
hər dəfə bir yeri öyür durnalar.

Şimşəyə yalvardım–“Qanad ütməyin”,
küləklər,yağmurda çox üşütməyin,
nə olur,bu payız qalın,getməyin,
buralar çox pisdir məyər,durnalar?..

Xalq şairi Vahid ƏZİZ.”Dünyanı dəyişir siçan yarasa

Davadan söz düşmür daha haçandan!
Ruslar da Suriyadan əlini çəkdi,
bu,”Siçan ilində”, boz uçan siçan
deyəsən dünyanı düzəldəcəkdi!?

Deyəsən başlayıb ağıllanmağa
Putin də bir azca,Tramp da bir qədər,
dünyada özünü Şah bilən “ağa”,
bəlkə niyyətindən əl çəkə bilər?

Silah ambarları möhkəm qıfılda,
olmaya bu “Virus” hökmün elədi?
məncə, dözüb-dözüb,bezib axırda,
Qurbanı olduğum görkün elədi!

Məncə,nahaq qanlar hayıfın çıxıb,
qəlblərə mərhəmət gülləri əkdi,
“qoçular” ağlını başına yığıb,
bəlkə bəd işlərə qələm də çəkdi?

Salıb lövbəli dərin sularda,
susur “Qırıcılar daşıyan gəmi”,
ABŞ Çindən gələn böyük yardıma
baxır dar ayaqda xilaskar kimi!

Baxmayın bu dəhşət bu cür yayıldı,
sonralar çiçəklər bitirəcəkdi,
“yamalna-yaxşılıq” ekiztayıdı,
dünyanın nizamı dəyişəcəkdi!

Bunun müjdəçisi “Koranavirus”,
əlində görünməz tərəzi tutur,
sazişə gəlməkdə Amerikanla–Rus,
bəlkə gözü bağlı “Femida” budur?

Xalq şairi Vahid ƏZİZ.”Qasırğa”


Xoşbəxtlik gələndə yeltək duyulmur,
bədbəxtlik gələndə tufantək gəlir…
Xalq Şairi Nəbi XƏZRİ

Dərdlər var ki,gələndə bilməzsən necə gəldi?
qasırğa gəmiləri lövbər salmağa qoymur!
axı-dərd insanları dahaha yaxın edərdi,
bu,elə bir bəla ki,yaxın olmağa qoymur.

İlahim,Sənə qurban,bu,neçənci bəlanmış!?
bütün ellər,qitələr alovlara qılanmış,
doğmam qapıdan dönür–əlcəkli,”maskalanmış”,
nəyə görə?!–övladdan onsuz da doymaq olmur!

Məktəblər şagirdlərə öyüdün verə bilmir,
yaşlılar,dükan nədir?-Aptekə girə bilmir,
analar körpəsinə öz südün verə bilmir–
qorxanda anaların südündə qaymaq olmur!

Bundan sonra bəlkə də daş ürəklər yuxalar?
Haq bayrağı ucalar,zülmkarlarlar yıxılar!
layiq olan döşlərə mükafatlar taxılar–
gileylər o qədər ki…çoxunu yaymaq olmur!

Xəstəsinin yanına həkim girib–pərt çıxar,
“Korana” adlı cəllad sərhəd pozar,sədd yıxar,
Mart çıxdısa,İnşallah,dalınca bu dərd çıxar!
yoluxanlar sayı çox,dünyada,saymaq olmur!

İncimiş dostun deyil–könlün alasan, gedə,
Şeytan deyil–yalannan heyran olasan,gedə,
düşmən deyil–başına mərmi salasan,gedə!
elə bir müşgül ki,bu,yoluna qotmaq olmur.

Nə cür vurum?-əlləri,ayağı yalınmışam,
doğma ev-eşiyimdə “zindana” salınmışam,
çanı qorumaq üçün “çəpərə” alınmışam,
məsləhətlər verən çoooox,hər sözə uymaq olmur,
gələndə elə gəlir…bəlanı duymaq olmur!
31.mart,2020.

Xalq şairi Vahid ƏZİZ.”Yeni adam”

Gözünü birazca açıb səhərlər,
nəvələr başını yastığa atır,
adam işsizlikdən çərləyə bilər,
yaxşı ki,qayğılar başımı qatır,

Qadağa artırdı xeyli çəkimi–
bir vaxt bir dəriydim,bir də qabırğa,
adam “Yeni adam” olana kimi,
özü adamlıqdan az qalır çıxa,,

Biri-ac,birinin geniş imkanı,
dar gündə bir kimsə köməyə gəlməz,
dəyişə bilmirsə Tanrı insanı,
onu qadağalar dəyişə bilməz!

İnsanı ucaldan vəzifə,”paqon”,
fərq etməz–kimlərlə qarışmış qanın!
bahalı miniklər,evlər,telefon…
al,bu da səninçün “Yeni adamın”!

Dəyişir cildimiz,əyin-başımız,
insan görkəmini min hala salır,
beləcə–qocalır,artır yaşımız,
içi başımızın dəyişməz qalır!

Yetər,Vahid ƏZİZ,qatarın gedib,
azmı qürurunun odunda yandım?
insan olduğuma bir az sevinib,
meymun əcdadıma baxıb utandım…

Xalq şairi Vahid ƏZİZ.”İl başında bəla gəldi ellərə”

İl başında bəla gəldi ellərə,
can qurtara bilmır hələ “Virusdan”,
elə bil ki,təyyarəylə hər yerə,
səpıbdilər bilə-bılə “Virusdan”,

Zəli kimi daraşıbdı cahana,
təhlükədir hər həyata,hər cana,
qonum-qonşu,dost-tanışlar bir yana,
imkan olmur nəvə gələ “Virusdan”.

Bu,bir qəsddir;–nə var bunu bilməyə?
rəvac verək şənlənməyə gülməyə,
evdə otur-meylin yoxsa ölməyə!
kim görmüşdü adam ölə “Virusdan”?

Nə vaxt tamam çıxıb gedər,kim bilər?
dövrümüzdən nə yazacaq nəsillər?
ümid versin ekranlardan həkimlər-
danışsınlar gülə-gülə “Virusdan”.

Allah vursun bunu icad edəni,
qana saldı yazıq vaxtı-vədəni,
qorxu,təlaş zəiflədər bədəni,
söhbət salın elə-belə “Virusdan”…

Qafqaz Əvəzoğlunu doğum günü münasibətilə təbrik edirik! (1 aprel 1954-cü il)

Azərbaycan Jurnalistlər Birliyi Sumqayıt şəhər təşkilatının Gündəlik Analitik İnformasiya Agentliyinin və Azərbaycanın Mədəniyyət və Ədəbiyyat Portalının Rəhbərliyi Sizi, Çağdaş Azərbaycan ədəbiyyatının görkəmli nümayəndəsini, Azərbaycan Yazıçılar və Jurnalistlər Birliklərinin üzvünü, Süleyman Rəhimov adına Qubadlı rayon ədəbi ictimai birliyinin sədrini, ”Sözün Sehri” qəzetinin təsisçisini, Qubadlı Rayon İcra Hakimiyyətinin mətbu orqanı “Bərgüşad” ictimai-siyasi qəzetinin Baş redaktorunu, ”Qızıl qələm” və “Qızıl kitab” mükafatları laureatını, Azərbaycan Jurnalistlər Birliyi Sumqayıt şəhər təşkilatının Gündəlik Analitik İnformasiya Agentliyinin (gundelik.info) və Azərbaycanın Mədəniyyət və Ədəbiyyat Portalının (edebiyyat-az.com) Qubadlı bürosunun rəhbərini doğum gününüz münasibətilə səmimi qəlbdən təbrik edir, Sizə uzun ömür, möhkəm cansağlığı, xoşbəxtlik, işlərinizdə, ədəbi-bədii yaradıcılığınızda bol-bol uğurlar diləyir! Sevib, sevdiyiniz insanların əhatə dairəsində olun!

Mətbuat xidməti


Vaxtıdır

Ətəyini çırmalayıb gedir qış,
Düzdə mehin, dağda çənin vaxtıdır.
Danaqıran yal-yamazı bürüyüb,
Karlı oğlan, yüz pencənin vaxtıdır.

Gün əridir zirvələrdə sal buzu,
Yal-yamacdan şaqqıdayıb axır su.
El yığışıb qarşılayır Novruzu,
Al fidanın, tər qönçənin vaxtıdır.

Silkələnib yerlər açdı qırışın,
Yedik getdi kətəsini çirişin.
Çərtib çıxan quzqulağın, keşnişin,
Kəkoğlunun, mərövcənin vaxtıdır.

Əvəzoğlu, çıx dağlarla görüşə,
Hər tərəfdən ətir saçır bənövşə…
Göy çəməndə yan verməyə bir döşə,
Mütəkkənin, döşəkçənin vaxtıdır!..

Ay qadınlar, bayramınız mübarək,

Biz kişilər heç vaxt sizsiz olmasın!
Kaş həmişə sizi belə şad görək,
Hər gününüz al səhərsiz olmasın;
Biz kişilər heç vaxt sizsiz olmasın!

Qadın gülsə gözəlləşər bu dünya,
Gözəlliklə əməlləşər bu dünya,
Lap yenidən təməlləşər bu dünya,
Dodağınız təbəssümsüz olmasın;
Biz kişilər heç vaxt sizsiz olmasın!

Qoy Yaradan bəxtinizə yar olsun,
Hər arzunuz, diləyiniz var olsun,
Zülfünüzə sığal çəkən yar olsun,
Daş ürəklər məhəbbətsiz olmasın;
Biz kişilər heç vaxt sizsiz olmasın!

Heç bir yerdə görməmişəm bir qəşəng,
Yurdumuzun gözəlləri olantək.
Hər biriniz bir açılmış tər çiçək –
Bülbül olan qızılgülsüz olmasın;
Biz kişilər heç vaxt sizsiz olmasın!

“Vətənimizə virtual səyahət” layihəsi çərçivəsində “Ucara virtual səyahət” adlı videoçarx hazırlandı

Bakı şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanası tərəfindən  “Vətənimizə virtual səyahət” layihəsi çərçivəsində “Ucara virtual səyahət” adlı videoçarx hazırlandı.

Yeni növ  koronavirus (COVID-19) infeksiyasını Ümumdünya Səhiyyə Təşkilatı “pandemiya” elan edib. Ümumdünya Səhiyyə Təşkilatının (ÜST) Azərbaycan nümayəndəliyi koronavirus infeksiyasının törədə biləcəyi təhlükəni nəzərə alaraq əhaliyə müraciət edib.  ÜST bununla bağlı kampaniyaya başladığı #evdəqal həştəqi ilə insanları evdə qalmaqla həyatları xilas etməyə çağırıb.

 “Vətənimizə virtual səyahət” layihəsi çərçivəsində hazırlanan videoçarxlar həmçinin “Evdə qal” çağrşına dəstəkdir.

Rayonun iqlimi – yayı quraq keçən mülayim-isti yarımsəhra və quruçöl iqliminə aiddir. Təqdim olunan videoçarxda Ucar rayonu və onun görkəmli şəxsiyyətləri haqqında ümumi məlumat verilmiş, rayonun təbiəti, mətbəxi, tarixi abidələri, müasir binaları və parklarına aid fotolar əks olunmuşdur.

Videoçarxda Böyük Vətən müharibəsində həlak olmuş Ramal kənd sakinlərinin xatirəsinə ucadılmış abidə, Ucar rayonu 1941-1945-ci illər müharibəsi döyüşçülərinin xatirəsinə həsr olunmuş abidə, 416-cı Taqanroq diviziyasının şərəfinə ucadılmış xatirə abidəsi, Ucar rayon Su qülləsi, Bərgüşad kəndi nekropol baş daşı və s. abidələri əks etdirən fotolar verilmişdir.

Burada həmçinin Ucarın Qazyan, Qazqumlaq, Qulabənd və başqa kəndlərinin görüntüsü də təqdim olunmuşdur.

Videoçarx Ucar rayonunun Bərgüşad kəndində gözaçan el sənətkarı Aşıq Əhlimanın “Ucarım” mahnısı ilə müşayiət olunur.

Videoçarx aşağıdakı linkdə yerləşdirilib:

 “Vətənimizə virtual səyahət” adlı layihəyə daxil olan videoçarxları “Kitabsevər uşaqlar” Facebook səhifəsində və YouTube kanalında da izləmək mümkündür.

Layihə çərçivəsində  Azərbaycanın bir çox rayonları haqqında silsilə videoçarxlar hazırlanacaq.

“Yazıçı və şairlər koronavirusla mübarizə edir” aksiyası davam edir: “Çin hekayəti, və yaxud dünyanın koronavirus faciəsi”

Bakı şəhər Mədəniyyət  Baş İdarəsi Yasamal rayon Mərkəzləşdirilmiş Kitabxana Sistemi (MKS) “Kitabxana – koronavirusa YOX deyir!” layihəsi çərçivəsində “Yazıçı və şairlər koronavirusla mübarizə edir” aksiyasını davam etdirir. Layihəyə yazıçı Gülzar İbrahimovanın “Çin hekayəti və yaxud dünyanın koronavirus faciəsi”adlı hekayəsini təqdim etmişdir.

Hekayə tərcüməçi işləyən azərbaycanlı və çinli ailənin dostluğundan, onların bir yerdə olduqları müddətdə baş verən maraqlı hadisədən və son günlər yayılmış koronavirusdan bəhs edir. Simi babanın nəvəsi To Ayailə dostluq edən Osmanın sapandla sərçəni yaralaması Simi babaya Çin tarixində baş vermiş hadisəni xatırladır.

Hekayənin tam mətni aşağıdakı linkdə yerləşdirilib:

http://yasamal.cls.az/front/files/libraries/81/documents/552306765.pdf