Qafqaz Əvəzoğlu

Azərbaycan Yazıçılar və Jurnalistlər Birliklərinin üzvü, Süleyman Rəhimov adına Qubadlı rayon ədəbi ictimai birliyinin sədri, ”Sözün Sehri” qəzetinin təsisçisi, Qubadlı Rayon İcra Hakimiyyətinin mətbu orqanı “Bərgüşad” ictimai-siyasi qəzetinin Baş redaktoru, ”Qızıl qələm” və “Qızıl kitab” mükafatları laureatı, Azərbaycan Jurnalistlər Birliyi Sumqayıt şəhər təşkilatının Gündəlik Analitik İnformasiya Agentliyinin (gundelik.info) və Azərbaycanın Mədəniyyət və Ədəbiyyat Portalının (edebiyyat-az.com) Qubadlı bürosunun rəhbəri

XOCALI

Köməyinə yetişmədi kimsəsi,
Haray çəkib hey ağladı Xocalı!
Çalın-çarpaz dağlar gördü sinəsi,
Dərdimizə dərd bağladı Xocalı!

Aman Allah, haraya bax, haya bax,
Tük ürpədən qışqırtıya-qıya bax,
Bu millətə bu verilən vaya bax,
Yas içində yas saxladı Xocalı!

Güllələdi öz qızını ər ata,
Ana boğdu körpəsini – səs yata.
Ölən öldü, düşən düşdü it-bata,
Başdan-başa qan çağladı Xacalı!

Qarı düşmən düşmənliyin eylədi,
Ta körpədən qarıyacan teylədi.
Heç bilmədik apardığın neylədi,
Düşüb bir-bir soraqladı Xocalı!

Bu hayları bu yanlara kim atdı,
Neçə-neçə faciələr yaratdı.
Əldən getdi namus, qeyrət – ta batdı,
Sinəmizdə yağ dağladı Xocalı!

Sükutuna qərq olmuşuq heyrətin,
Oturmuşuq şivəninə millətin.
Mən biləni bu millətin qeyrətin,
Qeyrətiylə tam yoxladı Xocalı!..