Category: Mədəniyyət

Abdulla Şaiq adına Azərbaycan Dövlət Kukla Teatrı 87-ci teatr mövsümünə hazırlaşır.

AZƏRTAC xəbər verir ki, yeni mövsüm sentyabrın 15-də “Qırmızıpapaq” və “Durnabalığı” tamaşaları ilə açılacaq. Teatrın baş rejissoru Qurban Məsimovun “Qırmızıpapaq” tamaşası Şarl Perronun eyniadlı nağılının motivləri əsasında səhnələşdirilib. “Durnabalığı” tamaşası “Durnabalığının buyruğu ilə” rus xalq nağılının motivləri əsasındadır. Onun quruluşçu rejissoru Anar Məmmədov, quruluşçu rəssamı Əfşan Əsədovdur.

Yeni mövsümdə teatr “Əlibaba və qırx quldur”, “Göyçək Fatma”, “Şəngülüm, Məngülüm”, “Tıq-Tıq və Taq-Taq”, “Cik-Cik xanım”, “Karlson”, “Gözəl və bədheybət”, “Çipollino” və “Üç muşketyor” tamaşalarını da təqdim edəcək.

Mənbə: https://azertag.az

Mədəniyyət Nazirliyinin elan etdiyi “Qısametrajlı bədii film layihələri” müsabiqəsinə yekun vurulub.

Nazirlikdən AZƏRTAC-a bildirilib ki, müstəqil prodüser mərkəzləri tərəfindən müsabiqəyə təqdim edilmiş 24 layihə – “Protez” layihəsi – “CNF production”, “Estakadada” layihəsi – “Narimanfilm”, “Naməlum dahi” layihəsi – “Bravo Studio” və “Salam” layihəsi – “Zen Film” münsiflər heyəti tərəfindən seçilib. Qalib layihələrin Mədəniyyət Nazirliyinin sifarişi ilə onları təqdim etmiş şirkətlər tərəfindən “Azərbaycanfilm” kinostudiyasının bazasında istehsalı nəzərdə tutulub.

Qeyd edək ki, layihə kinematoqrafiya sahəsində çalışan gənclərin yaradıcılıq fəaliyyətini stimullaşdırmaq, audiovizual məhsul istehsalı ilə məşğul olan şirkətlərə dəstək vermək, milli mənəvi və ümumbəşəri dəyərləri kino vasitəsilə təbliğ etmək məqsədi daşıyır.

Mənbə: https://azertag.az

Bu gün Azərbaycan Kinosu Günüdür. Ümummilli lider Heydər Əliyevin 2000-ci il 18 dekabr tarixli Sərəncamı ilə avqustun 2-si kino işçilərinin peşə bayramı – Azərbaycan Kinosu Günü kimi qeyd olunur.

Fransada keçirilmiş ilk kinoseansdan iki il sonra – 1898-ci il avqustun 2-də Bakı elmi-foto dərnəyinin katibi, naşir və fotoqraf Aleksandr Mişon özünün lentə aldığı “Bibiheybətdə neft fontanı yanğını”, “Əlahəzrət Buxara əmirinin yolasalma mərasimi”, “Qafqaz rəqsi” xronikal sənədli və “İlişdin” adlı bədii süjetlərini nümayiş etdirmişdi. Həmin gün milli kinonun yaranma günü sayılır.

Ötən əsrin əvvəllərində “Pate”, “Pirone”, “Filma” kimi xarici kino şirkətləri Bakıda filiallarını açaraq film istehsalı ilə məşğul olublar. 1916-cı ildə yazıçı İbrahim bəy Musabəyovun eyniadlı povesti əsasında “Neft və milyonlar səltənətində”, 1917-ci ildə isə Üzeyir Hacıbəylinin eyniadlı operettası əsasında “Arşın mal alan” qısametrajlı bədii filmləri çəkilib.

Azərbaycan Xalq Cümhuriyyəti dövründə hökumət bir çox mədəni-siyasi islahatlar keçirib. Xarici aləmlə diplomatik, mədəni-iqtisadi əlaqələr dünya kinosunun ilk nümunələrinin Bakıya gətirilməsinə və ictimai baxışlara təkan verib. Bunun nəticəsində Bakıda kinematoqrafiya həvəskarlarının sayı artmağa başlayıb. 1918-ci ildə onlar “Kinematoqrafiya və teatr qulluqçuları şurası”nda birləşiblər.

Azərbaycanda sovet hakimiyyəti qurulduqdan sonra 1923-cü ildə Azərbaycan Foto-Kino İdarəsi (AFKİ) yaradılıb və həmin il aprelin 28-də Birinci Dövlət Kinofabriki açılıb. Burada çəkilən ilk film xalq əfsanəsinin motivləri əsasında yaradılmış “Qız qalası” bədii filmi olub.

1923-1926-cı illərdə kinostudiya Birinci Dövlət Kinofabriki, sonradan AFKİ Kinofabrik ilə birləşdirilərək “Azdövlətkino”, “Azərkino”, “Azərfilm”, “Azdövlətkinosənaye”, “Bakı kinostudiyası”, “Azərbaycanfilm” adlandırılıb. 1960-cı ildən Cəfər Cabbarlının adını daşıyır.

“Azərbaycanfilm”də indiyədək iki mindən çox müxtəlif növ və janrda film istehsal olunub. Onların bir hissəsi, o cümlədən “Arşın mal alan”, “Şərikli çörək”, “Ad günü”, “Sevinc buxtası”, “İstintaq”, “Yaramaz” və başqaları Dövlət mükafatlarına, bir çox filmlər, o cümlədən “Ögey ana”, “Uzaq sahillərdə”, “Arşın mal alan”, “Bizim Cəbiş müəllim”, “Axırıncı aşırım”, “Nəsimi”, “Özgə vaxt”, “Sarı gəlin”, “Ovsunçu”, “Buta”, “Çölçü”, “Nabat”, “Axınla aşağı” və digərləri beynəlxalq və digər kinofestivalların mükafatlarına layiq görülüb.

Ümummilli lider Heydər Əliyevin mədəniyyət və incəsənət xadimlərinə, kino sahəsində çalışanlara göstərdiyi diqqət və qayğı hazırda Prezident İlham Əliyev tərəfindən uğurla davam etdirilir. Prezident İlham Əliyevin “Azərbaycanda kino sənətinin inkişaf etdirilməsi haqqında” 2007-ci il 23 fevral tarixli Sərəncamı milli kinomuzun maddi-texniki bazasının möhkəmləndirilməsinə yeni təkan verib. Dövlətimizin başçısının müvafiq Sərəncamı ilə təsdiq olunmuş “Azərbaycan kinosunun 2008-2018-ci illər üzrə inkişafına dair Dövlət Proqramı”nın icrasını təmin etmək məqsədilə bir çox mühüm işlər görülür.

Bu gün Azərbaycan kinosu yaranmasının 120 illiyini qeyd edir. Azərbaycan kinosunun 120 illiyinin qeyd olunması haqqında Prezident İlham Əliyevin imzaladığı Sərəncam əsasən ölkəmizin hər yerində silsilə tədbirlər keçirilir. Bu il 120-cu ildönümünü qeyd etdiyimiz Azərbaycan kino sənəti ötən müddətdə əlamətdar hadisələrlə zəngin özünəməxsus inkişaf yolu keçərək, xalqımızın mədəni-mənəvi həyatında mühüm rol oynayıb.

Azərbaycan kinosu böyük tarixə malikdir. Bu illər ərzində ölkəmizin, xalqımızın həyatının müxtəlif sahələrinə aid filmlər çəkilib. Təxminən son on ildə dövlət büdcəsindən ayrılmış vəsait hesabına 46 tammetrajlı bədii, 50 qısametrajlı bədii, 212 sənədli, habelə 23 cizgi filmi çəkilib. Bu gün gənclərimiz Türkiyə, Kanada, Rusiya kimi ölkələrin təhsil müəssisələrində bu sahədə təhsil alırlar. Eyni zamanda, ölkəmiz dünyanın müxtəlif ölkələrində keçirilən film festivallarında iştirak edir. 2014-2017-ci illər ərzində 26 filmimiz 48 ölkədə keçirilən 128 festivalda 219 iştirak edərək 49 mükafat qazanıb.

Bu günlər kino xadimləri üçün əlamətdar hadisələrlə yadda qalıb. Belə ki, ölkə başçısı avqustun 1-də Azərbaycan kinematoqrafiyasının inkişafında xidmətlərinə görə bir qrup kino xadiminə fəxri adların verilməsi haqqında Sərəncam imzalayıb.

Bu gün Nizami Kino Mərkəzində Azərbaycan kinosunun 120 illiyinə həsr olunmuş tədbir keçiriləcək. Tədbirdə rejissor Yavər Rzayevin Azərbaycan kinosunun tarixinə və keçdiyi zəngin inkişaf yoluna həsr etdiyi sənədli film nümayiş olunacaq.

Tədbir çərçivəsində bir sıra mədəniyyət və incəsənət xadimləri, o cümlədən kino xadimlərinin mükafatlandırılması nəzərdə tutulub.

Mənbə: https://olaylar.az

Bu gün böyük Azərbaycan şairi Məhəmmədhüseyn Şəhriyarın anadan olmasının 112-ci ildönümü tamam olur.

AZƏRTAC xəbər verir ki, şeirimizi yüksək zirvələrə qaldıran, insanlara vətənpərvərlik duyğuları aşılayan, milli həmrəylik ideyası təbliğ edən, milli ruhun oyanışında böyük xidmətləri olan Şəhriyar yaradıcılığı hər zaman Azərbaycan xalqının güvənc yeri olub. O, klassik şeirin bütün şəkillərinə müraciət edib, ölməz sənət inciləri yaradıb.

Məhəmmədhüseyn Şəhriyar 1906-cı ildə Təbriz şəhərinin Bağmeşə bölgəsində, o zamanın tanınmış hüquqşünaslarından Hacı Mirağa Xoşginabinin ailəsində dünyaya gəlib. O, Təbrizdə orta təhsil alaraq Tehran Universitetinin tibb fakültəsinə daxil olub. Təhsilini yarımçıq qoysa da, dahi şair xalq təbabətinə dərindən bələd olduğu üçün həkimliklə də məşğul olub.

Şəhriyarın ilk şeir kitabı 1931-ci ildə Tehranda üç böyük şair və alimin – Məlikü-şüəra Baharın, Səid Nəfisinin və Peyman Bəxtiyarinin müqəddimələri ilə nəşr olunub.

O, XX əsrin 19-20-ci illərin ortalarından etibarən artıq istedadlı bir şair kimi tanınmağa başlayıb. Məhəbbət lirikasının böyük korifeyləri Hafiz və M.Füzulinin qəzəlləri ilə müqayisəyə qadir olan sevgi şeirləri, dünya həyatının mahiyyəti barədə fəlsəfi düşüncələri əks etdirən hikmətli qəsidələri, real həyat müşahidələrinin məhsulu kimi yaranan lirik poemalar müəllifi olan sənətkarı Azərbaycan şeirinin ən yüksək zirvələri sırasına ucaldan, ilk növbədə onun vətənpərvərlik duyğuları aşılayan, milli həmrəylik ideyasını təbliğ edən əsərləri olub.

M.Şəhriyarı XX əsr Azərbaycan poeziyasının nəhəngləri sırasına ucaldan, ilk növbədə, onun ölməz “Heydərbabaya salam” poeması olub. Şəhriyar “Heydərbabaya salam” əsəri ilə Azərbaycan türkünün milli həyatını bütün cəhətləri ilə göstərməyə müvəffəq оla bilib. Sadə bir fоrmada yazılan poema hələ əlyazma şəklində yayılaraq şöhrət tapıb və dövrün ziyalılarının diqqətini özünə cəlb edib. Şairin ata-baba yurdunun şirin xatirələri ilə yaşayan, “Heydərbabaya salam” poeması haqqında M.Rövşənzəmir yazırdı: “Heydərbaba dağı bir gün yerlə-yeksan оla bilər, yer üzərindən silinə bilər. Ancaq nə qədər ki, Azərbaycan xalqının həssas qəlbi döyünür, Şəhriyarın bu şeiri nəsildən-nəslə ötürüləcək və yaddaşda qalacaqdır”.

Məhəmmədhüseyn Şəhriyarın xatirəsi ədəbiyyatsevərlərin ürəyində əbədi yaşayır və sevilir. O, 18 sentyabr 1988-ci ildə 82 yaşında Təbrizdə vəfat etsə də, o gün hər il İranda “Milli şeir günü” kimi qeyd edilir.

Mənbə: https://azertag.az

“Jara-2018” festivalı möhtəşəm təşkil olunub. Hər bir incə detal yüksək səviyyədə nəzərə alınıb. Bu möhtəşəm musiqi bayramının bir parçası olduğum üçün çox şadam.

AZƏRTAC xəbər verir ki, bu sözləri jurnalistlərə müsahibəsində “Jara-2018”in iştirakçısı, Rusiyanın tanınmış müğənnisi İrina Dubtsova deyib.

Bakıda 2004-cü ildə olduğunu qeyd edən İrina Dubtsova ötən müddət ərzində şəhərimizin sürətlə inkişaf etdiyini, çox gözəlləşdiyini bildirib. O deyib: “İnsanlarınız elə əvvəlki kimi qonaqpərvərdirlər. Burada Şərqin və keçmişin ruhu qorunub saxlanılıb. Şəhərin qədim küçələrində yenidən gəzmək istəyirəm. Qədimliklə müasirliyin harmoniyası insanı valeh edir. Burada əsl dostluq ab-havası mövcuddur. Azərbaycanlılara təşəkkür edirəm”.

Mənbə: https://azertag.az

Milli Kinomuzun 120 illiyi ilə əlaqədar olaraq Azərbaycan Respublikası Kinematoqrafçılar İttifaqı bir qrup veteran kino xadiminə pul mükafatları təqdim edib.

İttifaqın mətbuat xidmətindən AZƏRTAC-a bildirilib ki, təqdim edilən pul mükafatları 2018-ci ildə yubileyləri qeyd edilən bir neçə kino xadimlərinə də şamil olunub. Belə ki, dörd nəfərə 350 manat, səkkiz nəfərə isə 250 manat pul mükafatı təqdim edilib.

Qurumun təsis etdiyi “Milli kino mükafatı”na Azərbaycan kinosuna verdiyi töhfələrə və 75 illik yubileyi münasibətilə Xalq Artisti, professor Oqtay Mirqasımov layiq görülüb. Sözügedən mükafata görə məbləğ 2000 min manatdır.

Mənbə: https://azertag.az

M.F.Axundzadə adına Azərbaycan Milli Kitabxanasında “1 avqust-Azərbaycan Əlifbası və Azərbaycan Dili günüdür” adlı kitab sərgisi açılıb.

Kitabxanadan AZƏRTAC-a bildirilib ki, sərgidə Azərbaycan, rus və xarici dillərdə dilimizin tarixindən, dövlətimiz tərəfindən dilimizə göstərilən qayğıdan bəhs edən kitablar və dövri mətbuat materialları nümayiş edilir.

Sərgi 10 gün ziyarətçilər üçün açıq qalacaq.

Mənbə: https://azertag.az

Bakı Şəhər Mədəniyyət Baş İdarəsinin Yasamal rayon Mərkəzləşmiş Kitabxana Sisteminin (MKS) Mərkəzi Kitabxanasının kollektivi “Yubileylər silsiləsi” layihəsi çərçivəsində Xalq Yazıçısı İmran Qasımovun anadan olmasının 100 illiyinə həsr olunmuş virtual fotoalbom hazırlayıb.

İdarədən AZƏRTAC-a bildirilib ki, Xalq Yazıçısının fotoları, həyat və yaradıcılığının əsas mərhələləri xronoloji ardıcıllıqla alboma daxil edilib.

Layihənin ideya müəllifi Yasamal rayon MKS-nin direktoru Lətifə Məmmədovadır.

Virtual fotoalbomla aşağıdakı linkdə tanış olmaq olar: https://www.youtube.com/watch?v=0U8cWH1lBR8

Qeyd edək ki, bu il Xalq Yazıçısı İmran Qasımovun anadan olmasının 100 illiyi ölkə başçısının müvafiq Sərəncamı ilə silsilə tədbirlərlə qeyd ediləcək.

İmran Qasımov yaradıcılıq axtarışları və bədii tapıntıları ilə Azərbaycan ədəbiyyatı xəzinəsinə töhfə vermiş sənətkarlardandır. O, çoxcəhətli ədəbi fəaliyyəti boyunca rəngarəng janrlarda qələmə aldığı və özünəməxsus dəst-xətti ilə seçilən əsərlərində müasirlərinin zəngin mənəviyyatını və əxlaqi keyfiyyətlərini geniş lövhələrlə dolğun əks etdirib. İmran Qasımovun uğurlu səhnə təcəssümü tapmış pyesləri Azərbaycan dramaturgiyasının nailiyyətləri kimi dəyərlidir. Onun ssenariləri əsasında çəkilmiş filmlər yaddaqalan obrazları ilə diqqətəlayiq sənət nümunələri olub, kinosevərlər tərəfindən bu gün də rəğbətlə qarşılanmaqdadır.

Mənbə: https://azertag.az

“Xaricdə xüsusi olaraq yaradılan saytlar var ki, onların əsas fəaliyyəti Azərbaycana qarşı kampaniya aparmaqdır. Onlar Vətəni satıb getdikləri üçün ölkəmizə qarşı da bütün fəaliyyətlərdə iştirak etməyi qəbul edirlər”.

Bu fikirləri SİA-ya açıqlamasında “Olaylar” qəzetinin baş redaktoru Yunus Oğuz deyib.

Baş redaktor bildirib ki, Azərbaycanda multikulturalizm və dini dözümlülüyün geniş təbliğ edilməsi bir çoxlarını qane etmir: “Baş verən son hadisələr Azərbaycanın inkişafına kölgə salmaq üçün hesablanıb. Bununla da dövləti gözdən salmağa çalışırlar. Hətta həmin qüvvələr ermənilərin də köməkliyi ilə bu istiqamətdə işləyirlər. Bu gün Azərbaycan artıq həm siyasi və iqtisadi, həm də hərbi cəhətdən regionun ən nüfuzlu, güclü dövlətinə çevrilib. Bunun qarşısını almaq üçünsə ölkədə iğtişaşlar yaratmaq, təxribat törətmək, silahlı hücumlar təşkil etmək, polis zabitlərimizi qətlə yetirmək kimi ssenarilər hazırlanıb”.

Y.Oğuz söyləyib ki, həm Mingəçevir İES-də baş verən hadisə, həm Gəncənin icra başçısına qarşı silahlı hücum, həm də bu şəhərdə olan son hadisələr bir zəncirin həlqələridir: “Hesab edirəm ki, Azərbaycana qarşı kampaniya aparan xaricdən idarə olunan saytlar müəyyən edilməli, onların hansı ölkədə fəaliyyət göstərdiyi dəqiqləşdirilərək həmin ölkələrə də nota verilməlidir”.

Baş redaktor qeyd edib ki, ölkəmizə qarşı aparılan heç bir fəaliyyətin cəmiyyətə təsir edə bilməz: ” Son hadisələrdən də göründü ki, Azərbaycanda heç kim mütəşəkkil cinayətkar dəstəyə dəstək vermir. Azərbaycan əhalisi xaos deyil, əksinə sabitlik, dövlətinin inkişafını istəyir”.

Mənbə: https://olaylar.az

Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) “Olaylar” qəzeti və “525-ci qəzet”inin rəhbərliyi ilə görüş keçirilib.

Görüşün məqsədi hər iki qəzetin, aparıcı mətbuat orqanlarının rəqəmsal nüsxələrinin kitabxananın elektron yaddaşına köçürülməsi və saxlanılması prosesinə qoşulması olub.

Görüşdə MEK-in direktoru Leyla İmanova bildirib ki, “Olaylar” qəzetinin rəhbəri Yunus Oğuz və “525-ci qəzet”in rəhbəri Rəşad Məcid rəhbərlik etdikləri qəzetin rəqamsal fondunu və 2018-ci ilin yanvar-iyun ayına qədər rəqəmsal nüsxələrini MEK-ə bağışlayıblar.

Bu rəqəmsal sənədlər Azərbaycanın Milli Elmlər Akademiyasının rəqəmsal yaddaş bazasına daxil edilib və hər iki qəzetlə MEK arasında müəllif hüquqları müqaviləsi imzalanıb.

Mənbə: https://olaylar.az

İyulun 19-da saat 11-də AMEA-nın Ədəbiyyat İnstitutunda yazıçı-publisist Yunus Oğuzun “Ovçu” romanının müzakirəsi keçiriləcək. (Ünvan: Hüseyn Cavid prospekti 115)

Tədbirdə tanınmış alimlər, ədəbi və ictimai xadimlər iştirak edəcəklər. Xatırladaq ki, Yunus Oğuz bir çox tarixi romanların müəllifidir. “Ovçu” adlı tarixi roman 2016-cı ildə baş vermiş Aprel döyüşlərinə həsr olunub. Müəllif Aprel döyüşlərinin qəhrəmanı olmuş Murad Mirzəyevin ədəbi obrazını əks etdirib. Əsər Vətəni qorumaq borcunu məsuliyyət və ləyaqətlə yerinə yetirmək ideyası üzərində qurulub.

Mənbə: https://olaylar.az

Azərbaycanda rəsmi səfərdə olan İtaliya Respublikasının Prezidenti Sercio Mattarellanın qızı Laura Mattarella iyulun 18-də Qobustan Milli Tarixi-Bədii Qoruğu ilə tanış olub.

AZƏRTAC xəbər verir ki, qonaq əvvəlcə qoruğun ərazisində yaradılmış muzeydə nümayiş etdirilən eksponatlara baxdı.

Məlumat verildi ki, Qobustan Dövlət Tarixi-Bədii Qoruğu açıq səma altında qoruq-muzey kimi böyük şöhrət qazanıb. Ərazidə daş dövründən son orta əsrlərə qədərki həyat və məişəti əks etdirən çoxsaylı maddi-mədəniyyət nümunələrini müasir azərbaycanlıların ulu əcdadları min illər ərzində yaradıblar. Qobustan qaya rəsmləri dünyada bu tipli abidələrdən ən zənginidir. Qoruq ərazisində alimlər tərəfindən 6 mindən çox qayaüstü təsvir, 20 mağara və yaşayış yeri, 40 kurqan aşkar edilib və öyrənilib.

Qeyd edilib ki, Qobustan Milli Tarixi-Bədii Qoruğundakı nadir qayaüstü rəsmlərin geniş təbliğinin xüsusi əhəmiyyətini nəzərə alan dövlətimizin başçısı İlham Əliyevin Sərəncamı ilə qoruq muzeyi üçün yeni bina tikilib.

İtaliyalı qonağın diqqətinə çatdırılıb ki, dünya əhəmiyyətli tarixi abidə olan Qobustan qoruğu 2007-ci ildə UNESCO-nun Dünya Mədəni İrs Siyahısına daxil edilib.

Qədim insan məskəni ilə tanışlıqdan məmnun qalan Laura Mattarella ərazidə aparılmış tədqiqat işləri ilə və tarixi eksponatlarla maraqlanıb.

Qonaq Qobustan Milli Tarixi-Bədii Qoruğundan xoş təəssüratla ayrılıb.

Mənbə: https://azertag.az

Azərbaycanda rəsmi səfərdə olan İtaliya Respublikasının Prezidenti Sercio Mattarellanın qızı Laura Mattarella iyulun 18-də “Atəşgah məbədi” Dövlət Tarix-Memarlıq Qoruğu ilə tanış olub.

AZƏRTAC xəbər verir ki, məbədlə tanışlıq zamanı qonağa bu qədim abidənin tarixi haqqında ətraflı məlumat verildi. Bildirildi ki, Bakının mərkəzinin 30 kilometrliyində, Suraxanı rayonu ərazisində yerləşən “Atəşgah məbədi”, demək olar, bütün dünyada tanınır. Qədim dövrlərdə bu ərazidə atəşpərəstlərin məbədi yerləşib. Əbədi alova mistik əhəmiyyət verən atəşpərəstlər müqəddəs oda tapınmaq üçün buraya gəliblər.

Diqqətə çatdırıldı ki, XV-XVII əsrlərdə ticarət karvanları ilə Abşerona gələn atəşpərəst hindular Suraxanını ziyarət ediblər. Hindli tacirlər qədim məbədin yerində yeni tikililər inşa ediblər. “Atəşgah məbədi”nin ən erkən tikilisi 1713-cü ilə aiddir. XVIII əsrdə məbədin ətrafında ibadətgah, hücrələr, karvansara inşa edilib.

Məlumat verildi ki, 2012-ci ilin sentyabr ayından başlayaraq Heydər Əliyev Fondunun dəstəyi ilə məbədə bitişik ərazilərdə abadlıq işləri aparılıb, yardımçı binalar tikilib. Hazırda qədim atəşpərəst məbədinin qapıları yenidən ziyarətçilər üçün açıqdır və dünyanın hər yerindən turistləri cəlb edir.

Qonaq “Atəşgah məbədi” Dövlət Tarix-Memarlıq Qoruğundan xoş təəssüratla ayrıldı.

Mənbə: https://azertag.az

Göygöl rayonunda Turistik Məlumat İdarəetmə Sisteminin açılış mərasimi olub.

Göygöl Regional Muzeyində gerçəkləşən tədbirdə mədəniyyət nazirinin müavini Rafiq Bayramov, Göygöl Rayon İcra Hakimiyyətinin başçısı Arif Seyidov, Almaniyanın ölkəmizdəki səfiri Mixael Kindsqrab və Berlin Humbolt Universitetinin professoru xanım Eva Maria Aux iştirak ediblər.

Nazirlikdən AZƏRTAC-a bildirilib ki, mərasimdə çıxış edən mədəniyyət nazirinin müavini Rafiq Bayramov Göygöldə səyahət-yol nişanları sistemimin yaradılması istiqamətində göstərdikləri xoşməramlı fəaliyyətə görə Almaniyanın Azərbaycandakı səfirliyinə öz minnətdarlığını bildirib. Qeyd edib ki, Azərbaycan və alman xalqları hələ iki əsr öncə sülh və dostluq şəraitində birgəyaşamın modelini yaradaraq, ümumbəşəri tolerantlıq anlayışına töhfələr veriblər: “200 il əvvəl Şərqə, Cənubi Qafqaza üz tutmuş alman icmasının ölkəmizdəki tarixi-mədəni izlərinin qorunub saxlanılması və tanıdılması məqsədilə Azərbaycan rəhbərliyinin təşəbbüsü ilə bir sıra işlər həyata keçirilib. Bu gün multikultural mədəni irsimizin önəmli bir hissəsi kimi Azərbaycandakı alman izlərinin qorunub saxlanılması və təbliği istiqamətində növbəti uğurlu addım atılır”.

Nazir müavini Cənubi Qafqazda alman məskənlərinin salınmasının 200 illik yubileyinin yüksək səviyyədə qeyd olunması ilə bağlı Prezident İlham Əliyevin 30 avqust 2016-cı il tarixli Sərəncamını xatırladıb. Bildirib ki, Sərəncamın icrası ilə əlaqədar çoxsaylı tədbirlər gerçəkləşib. O cümlədən Göygöl şəhərində alman icmasının sonuncu nümayəndəsi olmuş Viktor Klayının yaşadığı evdə muzey təşkil edilib, muzeyin sahəsi genişləndirilib, bərpa və konservasiya işləri həyata keçirilib. Eyni zamanda Forerlərin yaşadığı evdə Göygöl Tarix-Diyarşünaslıq muzeyi təşkil olunub, bərpa-konservasiya və tərtibat işləri görülüb. Yubileylə əlaqədar sərgilər açılıb. Həmçinin Cənubi Qafqazda alman icmasının məskunlaşmasının (1817) 200 illiyi Azərbaycan, Gürcüstan və Almaniyanın birgə təşəbbüsü ilə UNESCO-nun yubileylər proqramına salınıb, UNESCO səviyyəsində də tədbirlər keçirilib.

Rafiq Bayramov sonda bir daha qarşılıqlı maraq və birgə səylər nəticəsində iki ölkə arasında mədəni əlaqələrin yüksələn xətlə inkişaf etdiyini bildirib.

Almaniyanın ölkəmizdəki səfiri Mixael Kindsqrab Azərbaycanda alman mədəni irsinə göstərilən diqqət və qayğıdan danışıb. Turistik Məlumat İdarəetmə Sisteminin açılışının əhəmiyyətindən danışan səfir bildirib ki, iki ölkə arasında digər sahələrdə olduğu kimi, mədəniyyət sahəsində də möhkəm əlaqələr var. Bu münasibətlərin daha da gücləndirilməsi istiqamətində görülən işlərin davam etdiriləcəyi vurğulanıb.

Rayon icra hakimiyyətinin başçısı Arif Seyidov çıxış edərək bildirib ki, iki dövlət arasındakı tarixi dostluq ənənələrinin davam etdirilməsi nəticəsində almanların Azərbaycandakı evləri, Bakı, Göygöl və Şəmkirdəki lüteran kilsələri, digər alman memarlıq nümunələri olan tikililəri qorunub saxlanmaqdadır.

Daha sonra Almaniya Xarici İşlər Nazirliyinin mədəniyyətin qorunması proqramı əsasında Göygöl şəhərinin tarixini turistik olaraq cəlbedici etmək üçün hazırlanmış yol nişanları, məlumat lövhələri və stendlərin qurulması konseptinə baxış olub.

İdarəetmə sisteminin xanım Eva Maria Aux tərəfindən təqdimatından sonra seçilmiş lövhə və stendlərin açılışı ilə əlaqədar gəzinti təşkil edilib.

Daha sonra Göygöl şəhərindəki lüteran kilsəsində “Azərbaycan memarlığında alman irsi” kitabının təqdimatı keçirilib. Müəllif Elçin Əliyev tərəfindən imzalanmış kitablar qonaqlara kitablar hədiyyə edilib.

Qeyd edək ki, iki əsr əvvəl Azərbaycana gələn almanlar Helenendorf koloniyasını (indiki Göygöl şəhəri) yaradıblar. Sonralar alman icması daha da böyüyüb və yeni yaşayış məskənləri salıblar. 1941-ci ilin avqustunda Stalin rejiminin qərarı ilə Cənubi Qafqazda, o cümlədən Azərbaycan SSR ərazisində yaşayan alman vətəndaşlar Mərkəzi Asiyaya sürgün olunub.

Mənbə: https://azertag.az

Rusiyanın Xalq Artisti Anna Netrebko və Azərbaycanın Xalq Artisti Yusif Eyvazov Baden-Baden opera evində (Festspielhaus Baden-Baden) çıxış edəcək.

AZƏRTAC Baden-Baden opera evinin saytına istinadla xəbər verir ki, iyulun 20-də və 23-də Sankt-Peterburq Dövlət Akademik Mariya Teatrının kollektivinin qastrolu çərçivəsində Françesko Çileanın “Adriana Lekuvryor” operasının premyerası olacaq. Səhnə əsərində Adriana Lekuvryorun partiyasını Anna Netrebko, Mauritsionun partiyasını isə Yusif Eyvazov ifa edəcək.

Operanın Mariya Teatrında premyerası 2017-ci ilin iyun ayında olub.

Dünya operasının ulduzu A.Netrebko yaddaqalan obrazlar yaratmaqla yanaşı, konsert proqramları ilə də çıxış edir. Onun solo diskləri bestsellerə çevrilib. Musiqiçi haqqında çəkilmiş sənədli filmlər Avstriya, Danimarka, Almaniya, Rusiya və İsveçrədə nümayiş olunub.

Karyerasına İtaliyanın teatr və konsert zallarında başlayan Y.Eyvazov 2008-ci ildə Milanda Opera Müğənniləri Beynəlxalq Müsabiqəsinin Qran-Pri mükafatına layiq görülüb. O, 2012-ci ildə Bakıda Vokalçıların Bülbül adına VI Beynəlxalq müsabiqəsinin qalibi olub. Y.Eyvazovun adı “Dünyanın ən yaxşı tenorları” kitabında yer alıb.

Mənbə: https://azertag.az

Gürcüstanın Batumi şəhərində keçirilən “Qızıl ulduz” yarışmasında Azərbaycan Gənclər İttifaqı (AGİ) və Azərbaycan Rəqs Assosiasiyasının təşkilatçılığı ilə ölkəmizdən bir neçə qrup iştirak edib.

Assosiasiyadan AZƏRTAC-a bildirilib ki, artıq 3 ildir təşkil olunan müsabiqəyə güclü kollektivlər qatılır. Yarışmada Azərbaycanın “Buta” rəqs ansamblı, “Aysel” və “Sevinc” rəqs qrupları təmsil ediblər.

Balaca rəqqaslarımız vətənə diplomlarla dönüblər.

Mənbə: https://azertag.az

Azərbaycan Dövlət Gənc Tamaşaçılar Teatrının 90-cı mövsümü repertuar tamaşalarının nümayişi ilə yanaşı, yaradıcılıq planına uyğun olaraq hazırlanmış yeni səhnə əsərləri, yerli və xarici beynəlxalq teatr festivalları və müsabiqələrdən uğurlu nəticələr ilə yaddaqalan olub. Kollektiv mövsüm müddətində 10-dan çox beynəlxalq teatr festivalında Azərbaycanı təmsil edib, bir beynəlxalq layihəyə imza atıb. Həmçinin məktəblilər və böyüklər üçün ümumilikdə 12 yeni tamaşa hazırlayaraq teatrsevərlərin ixtiyarına verib. Azərbaycan Xalq Cümhuriyyətinin 100 illiyi ərəfəsində ölkə başçısının Sərəncamı ilə bir qrup mədəniyyət xadimlərinə fəxri adlar verilib və sevindirici haldır ki, onların sırasında Gənc Tamaşaçılar Teatrının aktyorları da yer alıb.

Sənət ocağının mətbuat xidmətindən AZƏRTAC-a bildirilib ki, teatr özünün 90-cı mövsümünə uşaqlar üçün “Çipollino” və dahi Azərbaycan şairi Məhəmməd Füzulinin “Leyli və Məcnun” poemasının motivləri əsasında hazırlanmış eyniadlı tamaşa ilə yekun vurub.

Tamaşanın quruluşçu rejissoru və səhnələşdirmənin müəllifi Əməkdar Artist Nicat Kazımovdur. Quruluşçu rəssamı Elnur Axundov, musiqi tərtibatçısı Həmid Kazımzadə, tryukların quruluşçusu İsa Əsədov, rejissoru Müşviq Əliyevdir. Rolları Əməkdar artistlər Naibə Allahverdiyeva, Leyli Vəliyeva, Nəsibə Eldarova, Nicat Kazimov, Nofəl Vəliyev, Elşən Rüstəmov, aktyorlar Rəzzaq Məmmədov, Rövşən Abbasov, Elnur Kərimov, Rəşad Səfərov, Mehriban Hüseynova, Günel Məmmədova, Mehriban Abdullayeva, Sevinc Mehrəliyeva, Bəhram Həsənov, Səbinə Məmmədova, Asya Atakişiyeva, Elşən Çarhanlı, Nuriyyə Əliyeva, Şəbnəm Hüseynova və başqaları ifa ediblər.

Mənbə: https://azertag.az

Azərbaycan Dövlət Pantomima Teatrı mövsümə A.P.Çexovun “İt gəzdirən xanım” hekayəsi əsasında hazırlanmış tamaşa ilə yekun vurub. Teatrın mətbuat xidmətindən AZƏRTAC-a bildirilib ki, Leyla Atayevanın quruluşunda izlənilən səhnə əsərində rəqslərin quruluşu Nurlan Rüstəmova, əsərin plastik həlli isə Xalq Artisti Bəxtiyar Xanızadəyə məxsusdur. Tamaşada rolları Əməkdar Artist Bəhruz Əhmədli, aktyorlar Nurlan Rüstəmov, Leyla Atayeva, Nuridə Musabəyli, Elxan Şahalıyev, Elnur Rzayev və Beyrək Rüstəmov canlandırıb. Tamaşanın maraqlı, zəngin səhnə dekorasiyası və aktyorların məharətli çıxışı səhnə əsərini daha da baxımlı edib.

Mənbə: https://azertag.az

Moskvada Avrasiya Ölkələri Müəllif Hüquqları Konfederasiyasının üç günlük konfransı keçirilib.

AZƏRTAC xəbər verir ki, tədbirdə ölkəmizi Azərbaycan Rəssamlar İttifaqının üzvü, tanınmış rəssam Günay Mehdizadə təmsil edib.

YEAKOP baş direktoru, Azərbaycan Müəllifləri İctimai Birliyinin sədri İsmayıl Məmmədkərimov bildirib ki, Avrasiya Ölkələri Müəllif Hüquqları Konfederasiyasında Avrasiya İqtisadi İttifaqı və MDB çərçivəsində təmsil olunan dövlətlərinin müəllif hüquqları sahəsi üzrə ixtisaslaşan ziyalı insanlarla yanaşı, aparıcı milli cəmiyyətlər də təmsil olunmaq iqtidarındadır.

Onun sözlərinə görə, təşkilatda Xalq yazıçıları Çingiz Abdullayev, Anar, Fikrət Qoca kimi ziyalılarla yanaşı, tanınmış Azərbaycan bəstəkarlarının da adı yer alır: “Təşkilat yalnız üzvlərdən deyil, eyni zamanda, prezidiumdan ibarətdir ki, bu da səs çoxluğu ilə müəyyən olunur. Həmin prezidiumda isə əsasən aktiv və daima inkişafa meyilli olan insanların cəlb olunmasına üstünlük verilir. Tanınmış rəssam Günay Mehdizadə isə gənc nəslin nümayəndəsi kimi olduqca aktiv və inkişafa meyillidir. Belə insanların Azərbaycanı istənilən qurumda təmsil edə bilməsi hər baxımdan perspektivlidir”.

Türkiyənin Azərbaycandakı səfirliyinin mədəniyyət və tanıtma müşaviri İrfan Çiftçi isə bildirib ki, Türkiyənin də müşahidəçi statusunda iştirak etdiyi bu toplantıda Azərbaycanın bir təmsilçisinin də beynəlxalq bir təşkilatda olması, eləcə də Günay Mehdizadənin YEAKOP idarə üzvlüyünə seçilməsi, Azərbaycanın və türk dünyasının qələbəsidir: “Günümüzdə internet vasitəsilə ən çox əməyi oğurlanan yaradıcı insanlardır. Mədəniyyət qurumları olaraq texnoloji vasitələrdən, müasir üsullardan istifadə edərək müəllif hüquqlarını qorumalıyıq. Sənəti və mədəniyyəti, xüsusən də gənclərin ən çox istifadə etdiyi internetdən təbliğ etməliyik. Günay xanım müasir fikirləri olan bir sənətçidir, buna görə də ondan mədəniyyət sahəsində daha böyük, yaradıcı işlər gözləyirik və buna ümid edirik”.

Günay Mehdizadə konfransda hər kəsin yekdilliklə ona səs verməsi ilə bağlı məmnunluğunu ifadə edib O deyib: “Qəlbi Azərbaycanla döyünən hər bir sənətçi həmkarlarımın adının beynəlxalq təşkilatlarda çəkilməsini ölkəmizin sevinci kimi qəbul edirəm. Rəsm əsərlərimin beynəlxalq məkanda müxtəlif ölkələrin sənətşünasları və bu sahənin təmsilçiləri tərəfindən qəbul olunaraq maraqla qarşılanması, təbii ki, böyük sevincdir. İnanıram ki, Azərbaycan mədəniyyəti adına daha böyük uğurları Vətənimə və xalqıma bəxş edə biləcəyəm”.

Mənbə: https://azertag.az

Xalq Artisti Şahmar Ələkbərovun anadan olmasının 75 illiyi qeyd edilib

Artıq neçə dəfədir ki, Şahmar Ələkbərovun yubileyini onsuz qeyd edirik. Amma buna baxmayaraq onun xatirəsinin işığına hər zaman yüzlərlə insan yığışır. Bu, bir daha onu göstərir ki, əsl sənətkarlar heç vaxt ölmür, onların qoyub getdiyi zəngin irs əbədiyaşardır.

AZƏRTAC xəbər verir ki, bu fikirləri görkəmli kino aktyoru və kinorejissor, Xalq Artisti Şahmar Ələkbərovun 75 illiyinə həsr edilən tədbirdə Azərbaycan Respublikası Kinematoqrafçılar İttifaqının birinci katibi, Əməkdar İncəsənət Xadimi Cəmil Quliyev deyib.

İyulun 17-də Mədəniyyət Nazirliyi, Azərbaycan Dövlət Film Fondu və Azərbaycan Respublikası Kinematoqrafçılar İttifaqının təşkilatçılığı ilə Muzey Mərkəzində reallaşan tədbirdə C. Quliyev aktyorun sənət yolundan danışıb. Qeyd edib ki, Azərbaycanın çoxəsrlik zəngin mədəni ənənələrindən lazımınca bəhrələnən Şahmar Ələkbərov fitri istedadı və zəhməti sayəsində səhnəyə yeniliklər gətirməklə öz üslubunu yaradıb və milli mədəniyyət salnaməsinə parlaq səhifələr yazıb. Sənətkarın çoxsaylı ekran əsərlərində böyük ustalıqla canlandırdığı müxtəlif xarakterli obrazlar barədə məlumat verən C.Quliyev deyib ki, onun çəkildiyi filmlər ölkə kinematoqrafiyasının nailiyyətləri sırasında həmişəlik yer tutmuş qiymətli sənət inciləridir.

Tədbirdə Xalq Artisti Əminə Yusifqızı, Əməkdar Artist Elxan Qasımov və başqaları Şahmar Ələkbərovla bağlı xatirələrini bölüşüb, onun sənət dünyasından söz açıblar.

Bildirilib ki, Ş. Ələkbərovla 1943-cü il avqustun 23-də Gəncədə dünyaya göz açıb. Cəmi 50 il yaşayıb. Amma bu müddətdə yaratdığı obrazlarla, çəkdiyi filmlərlə adını əbədi olaraq kino tariximizə yaza bilib.

O, Azərbaycan İncəsənət İnstitutunun aktyorluq fakültəsində Rza Təhmasibin kursunda təhsil alıb. Hələ üçüncü kursda oxuyarkən Azərbaycan Dövlət Akademik Milli Dram Teatrına işə götürülüb. Teatrda ilk dəfə Şekspirin “Lope de Veqa” tamaşasında çıxış edib. “Ustalar” tamaşasında qazandığı uğurdan sonra böyük tamaşaçı auditoriyasının rəğbətini qazanıb. Bundan sonra məşhur sənətkar Adil İsgəndərоv onu kinostudiyanın nəzdində özünün yaratdığı “Kino aktyorluğu” studiyasına dəvət edib. Şahmar Ələkbərov “Azərbaycanfilm” kinostudiyasında aktyor və rejissor kimi fəaliyyət göstərib. Təhsilini başa vurduqdan sonra müəllim-assistent kimi institutda saxlanılıb. Şahmar Ələkbərоv teleradio sahəsində də fəal olub. O, radioda ilk dəfə “Ulduz” proqramının aparıcısı kimi çıxış edib. Bundan başqa, onlarla televiziya tamaşasında yaddaqalan obrazlar yaradıb, “Molla Nəsrəddin” radio verilişinin aparıcısı olub, bir çox filmlərin dublyajında iştirak edib.

Vurğulanıb ki, Şahmar Ələkbərovun yaradıcılıq bioqrafiyasında elə filmlər var ki, onlar milli mənəvi dəyərlərimizin ən qiymətli nümunələri sırasındadır. Bunun səbəbi isə bu filmlərin milli mənəvi dəyərlərimizə söykənərək tariximizin müəyyən dövrünün real ab-havasını canlı əks etdirməsidir.

Bildirilib ki, ümumiyyətlə, 20 illik yaradıcılığı dövründə müxtəlif rejissorlarla işləmişdi Şahmar Ələkbərov. “Dağlarda döyüş”dən başlamışdı onun ilk aktyor karyerası. Şahmar Ələkbərovun yaratdığı Qəzənfər (“Yeddi oğul istərəm”), Oğul (“İntizar”), İman (“Axırıncı aşırım”), Arif (“Həyat bizi sınayır”), Azad (“Bakıda küləklər əsir”), Qatır Məmməd (“Gəncəbasarlı qisasçı”), Feyzi (“Firəngiz”), Gündüz Kərimli (“Arxadan vurulan zərbə”), Cavidan (“Babək”), Nuru (“Qəribə adam”), Tahir (“Gözlə məni”), Xaliq (“Qocalar, qocalar…”), Cümşüd (“Avqust gələndə”), İbrahim (“Atları yəhərləyin”) kimi obrazlar bir-birindən fərqli, xarakter və dünyagörüşcə müxtəlif insanlardır. Ancaq onları birləşdirən Şahmar Ələkbərovun aktyor istedadı, gözəl ifa tərzi və bir də sənətinə olan hədsiz məhəbbətidir.

Şahmar Ələkbərovun elə qəhrəmanları var ki, onları xatırlamamaq mümkünsüzdür. “Yeddi oğul istərəm” filminə tamaşa edəndə hamımız Qəqəninin “Ölmə, Qəzənfər dayı, ölmə!” deyə onu yaralı halda qucaqladığı səhnəni səbirsizliklə gözləyirik. Bu çox nadir səhnələrdəndir ki, hətta ölüm anında aktyor tamaşaçını faciənin içərisindən qoparıb təbəssümə qovuşdurur. O, bunu bacarırdı və bu, hər aktyora xas olan keyfiyyət deyildi.

Şahmar Ələkbərov kinoda rejissor kimi də sözünü deyib. Onun bu sahədə ilk işi Gülbəniz Əzimzadə ilə birgə çəkdiyi “İmtahan” filmi olub. Sonra “Sahilsiz gecə”ni çəkib. Şahmar Ələkbərovun ssenarisi əsasında ekranlaşdırılan “Qəzəlxan” filmi də uğurlu alınıb. Bu film Azərbaycanın görkəmli şairi Ə.Vahidin həyat və yaradıcılığının müxtəlif anlarını canlandırır.

Xalq Artisti, Dövlət mükafatı laureatı Şahmar Ələkbərov 1992-ci il avqustun 12-də vəfat edib.

Tədbirdə sənətkarın həyat və yaradıcılığını əks etdirən fotosərgi açılıb, çəkildiyi filmlərdən kadrlar nümayiş olunub.

Mənbə: https://azertag.az

Beynəlxalq Musiqi Təhsili Cəmiyyətinin (International Society for Music Education – ISME) 33-cü Dünya Konfransı davam edir. Azərbaycan Mədəniyyət Nazirliyi, Ü.Hacıbəyli adına Bakı Musiqi Akademiyası və Azərbaycan Milli Konservatoriyası tərəfindən təşkil edilən konfransda 500-dən çox mədəniyyət, incəsənət və elm xadimi iştirak edir. İyulun 16-da konfrans çərçivəsində türk xalqlarının mədəniyyəti ilə tanışlıq olub.

AZƏRTAC xəbər verir ki, Bakı Musiqi Akademiyasının Opera Studiyasının konsert zalında TÜRKSOY-un baş katibi Düsen Kaseinov çıxış edib. Diqqətə çatdırıb ki, 2008-ci ilin may ayından baş katibi olduğu TÜRKSOY-un bu yaxınlarda 25 illiyi qeyd olunub.

D.Kaseinov türk xalqlarının musiqi ənənələri haqqında yığcam məlumat verib.

Zəngin türk musiqi mədəniyyəti alimlərin diqqətini çoxdan bəri tədqiqat obyekti kimi cəlb edir. Tədqiqatçılar hər bir müasir türk mədəniyyətinin özünəməxsusluğu ilə yanaşı, onların genetik qohumluğu ilə də qarşılaşırlar. Lakin XX əsrdə türkdilli xalqların ənənəvi musiqi sənəti bir-birindən xeyli ayrılmış müxtəlif musiqi mədəniyyətləri təsirini bağışlayıb.

Ərəb-müsəlman mədəniyyəti Türkiyə, Qafqaz və Mərkəzi Asiya türklərinə (türklərə, azərbaycanlılara, türkmənlərə, özbəklərə, habelə daha az dərəcədə qazaxlara və qırğızlara) böyük təsir göstərərək, onların musiqi mədəniyyətində muğamın yaranmasına və yayılmasına səbəb olub.

Rusiyaya birləşmə və Sibir türklərinin bir hissəsinin (altaylar, xakaslar, yakutlar, şorlar, tofalar) xristianlaşdırılması da onların musiqi mədəniyyətinin gələcək inkişafına təsir göstərib. Hazırda müasir türk xalqlarının musiqi mədəniyyəti zəngin və rəngarəng səs materialına malikdir. Müasir türk xalqlarının qədim (İslamdan əvvəl, xristianlıqdan əvvəl və bütpərəstlikdən əvvəl), arxaik qatlarında yalnız bu mədəniyyətlərə xas olan vəhdət elementləri qorunub saxlanmaqda davam edir. Hərçənd sonrakı yüzilliklərdə bu mədəniyyətdə müəyyən dəyişikliklər baş verib.

Tədbirdə tanınmış ifaçıların çıxışlarının yer aldığı videoçarxların nümayişi ilə yanaşı, canlı ifalar da olub. Qırğızıstan, Qazaxıstan, Türkiyə, Yakutiya və Azərbaycandan olan ifaçıların çıxışları maraqla qarşılanıb.

D.Kaseinov hər bir çıxışı şərh edib, musiqi alətlərindən, epos qəhrəmanlarından, dünya sosiomədəni məkanında türk xalqlarının musiqi mədəniyyətinin mövqeyindən və rolundan danışıb.

Mənbə: https://azertag.az

İstanbulda 35-ci Beynəlxalq uşaq geyimi və aksesuarlar sərgisi (İstanbul Kids Fashion) açılıb.

AZƏRTAC Türkiyə KİV-lərinə istinadla xəbər verir ki, sərgidə dünyanın bir sıra ölkələrindən 200-ə yaxın aparıcı uşaq geyimi istehsalçılarının məhsulları təmsil olunub.

İyulun 20-dək davam edəcək sərginin təşkilatçıları gözləyirlər ki, bu sərgiyə Türkiyədən və dünyanın 80 ölkəsindən beş minə yaxın insan tamaşa edəcək.

“UBM ICC” şirkətinin nümayəndəsi Xədicə Dinçer “Anadolu” agentliyinə müsahibəsində deyib: “Sevindirici haldır ki, builki sərginin iştirakçısı olan şirkətlərin sayı artıb. Misir, Əlcəzair, Rusiya və Ukraynadan çoxsaylı şirkətlər İstanbul Kids Fashion sərgisində iştirak etmək arzusunu bildiriblər.

X.Dinçerin sözlərinə görə Rusiya, Azərbaycan, Qırğızıstan, Türkmənistan, Ukrayna, Özbəkistan, Misir, Tunis, Səudiyyə Ərəbistanı, Əlcəzair, İordaniya, Mərakeş, habelə balkan və yaxın Şərq regionu ölkələrindən olan sahibkarlar bu sərgiyə xüsusi maraq göstəriblər.

Uşaq geyimi istehsalçıları sərgidə 2018-ci ilin payız-qış kolleksiyasına aid modelləri təqdim edəcəklər.

Rusiyanın “RİA Novosti” agentliyinin “Rossiya dlya vsex” portalı Azərbaycan Tərcümə Mərkəzinin beynəlxalq layihələri haqqında, yaxın günlərdə Londonda dərc edilmiş gənc Azərbaycan şairi Leyla Əliyevanın “The World Dissolves like a Dream” (“Dünya yuxutək əriyir”) kitabı haqqında material yerləşdirib.

Tərcümə Mərkəzindən AZƏRTAC-a bildirilib ki, məqalədə gənclərin Leyla Əliyevanın əsərlərinə marağından və kitabın nəşr edilməsi məqsədindən danışılıb.

Məqalə ilə daha yaxından tanış olmaq istəyənlər https://azj.rus4all.ru/exclusive/20180703/728681157.html elektron ünvanına müraciət edə bilər.

Mənbə: https://azertag.az

“YARAT” Müasir İncəsənət Mərkəzində “Şağ” adlı eksperimental tamaşa nümayiş edilib.

AZƏRTAC xəbər verir ki, tamaşa tanınmış yazıçı Sevinc Çılğının üç kiçik pyesi əsasında hazırlanıb. Burada bir-biri ilə əlaqəsi olmayan müxtəlif süjetlər arasında tamaşada iştirak edən aktyorlar tərəfindən bağlılıq yaradılır. Səhnə əsəri sərgi janrındadır və daha çox aksiya xarakterlidir. Aktyorların tamaşa zamanı oyunu poliqon platformasında təcrübədən keçirdikləri spontan aktyor texnikası əsasında qurulub. Tamaşanın özünə gəldikdə isə o, eyni zamanda, göstərilən bir neçə hadisədən ibarətdir. Səhnə əsərinin nümayişi zamanı seyrçilərin oturmağı nəzərdə tutulmayıb. Tam formatda interaktivliyə malik olan səhnə əsəri hər bir tamaşaçıya hadisələrin gedişatına müdaxilə etmək icazəsi verib. Tamaşa maraqla qarşılanıb.

Mənbə: https://azertag.az

Mədəniyyət Nazirliyinin təşəbbüsü ilə “100 illik tariximiz” şüarı altında keçirilən “Bölgələrdən bölgələrə” Yaradıcılıq Festivalı davam edir.

Azərbaycan Xalq Cümhuriyyətinin 100 illiyinə həsr olunmuş layihənin əsas məqsədi zəngin dövlətçilik ənənələrinə malik olan xalqımızın mədəni irsinin təbliği, regionların mədəni potensialının nümayiş etdirilməsi, bölgələrarası mübadilənin gücləndirilməsidir.

Mədəniyyət Nazirliyindən AZƏRTAC-a bildirilib ki, iyunun 25-də Masallı rayonunda başlanan festivalın növbəti tədbiri Mingəçevir şəhərində təşkil edilib.

Açılış mərasimində layihə barədə məlumat verilib. Diqqətə çatdırılıb ki, festivalda Mədəniyyət Nazirliyinin Sumqayıt, Gəncə, Xaçmaz, İsmayıllı, Şəki, Kürdəmir, Ağstafa, Şəmkir, Bərdə, Ağcabədi, Ağdaş, Sabirabad, Lənkəran, Masallı və Biləsuvar Regional mədəniyyət idarələrinin hər birinin ekspozisiya çadırları qurulub, regionlar üzrə şəhər və rayonların mədəni irsini əks etdirən sənətkarlıq nümunələri, rəsmlər, suvenirlər və digər əl işləri nümayiş etdirilir.

Tədbirdə çıxış edən Mingəçevir Şəhər İcra Hakimiyyəti başçısının birinci müavini İlham İsmayılov ölkəmizdə mədəniyyət və incəsənətin inkişafına göstərilən dövlət qayğısından, “energetiklər şəhəri”nin mədəni potensialından söhbət açıb. Vurğulayıb ki, bu festival ölkəmizin bütün regionlarını əhatə etməklə mədəni zənginlik, xalq sənətkarlığı irsi və incəsənət nümunələri ilə tanış olmaq imkanı yaradır. Layihənin yay mövsümündə keçirilməsi, həmçinin yerli sakinlərə, eləcə də bölgələrimizə gələn xarici qonaqlara regionların rəngarəng mədəni həyatı ilə bilavasitə tanış olmaq fürsəti verir.

Yaradıcılıq festivalında hər bir regional idarə üzrə folklor və rəqs qrupları, yerli incəsənət və bədii özfəaliyyət kollektivləri, aşıqlar öz istedad və bacarıqlarını nümayiş etdiriblər. Şəhər sakinləri və qonaqlar bölgələrə aid mədəniyyət nümunələri, regionların tarixini və müasir görkəmini əks etdirən eksponatlarla maraqla tanış olublar.

Festival barədə təəssüratlarını bölüşən Bərdə rayonundan Validə Nabatova qeyd edib ki, Mədəniyyət Nazirliyi bundan öncə də bölgələrin mədəni irsini təbliğ edən layihələr həyata keçirib: “Bölgələrdən-bölgələrə” festivalı hər kəsin ürəyincədir. Burada şəhər və rayonların maddi mədəniyyət nümunələri ilə tanış oluruq. Layihəni təşkil edənlərə minnətdarlığımı bildirirəm”.

Mingəçevir İncəsənət məktəbinin direktoru Etibar Əliyev də tədbiri yüksək qiymətləndirib: “Festival şəhər və rayonlarımızın mədəni zənginliyinin nümayişidir. Görürsünüz, insanlar necə də həvəslə iştirak edirlər. Hər bir rayonun ekspozisiya sahəsi ilə maraqlanırlar. Çox gözəl və əhəmiyyətli layihədir”. Beləliklə, festivalın Mingəçevir şəhərindəki tədbiri də uğurla başa çatıb.

Qeyd edək ki, Cümhuriyyətin 100 illiyi şərəfinə reallaşdırılan “Bölgələrdən bölgələrə” Yaradıcılıq Festivalı nazirliyin digər regional idarələrində də təşkil ediləcək. Layihə ilk dəfə Azərbaycanın bütün regionlarını əhatə etməklə yanaşı, şəhər və rayonlara bir-birinin mədəni zənginliyi, sənətkarlıq irsi və incəsənəti ilə tanış olmağa imkan yaradacaq, bölgələr arasında mədəni mübadilənin gücləndirilməsinə, yeni təşəbbüslərə zəmin olacaq.

Xatırladaq ki, festival Masallı, Lənkəran, Salyan, Sabirabad, Füzuli rayonunun Horadiz şəhəri, Ağdamın Quzanlı qəsəbəsi və Göyçayda keçirilib.

Mənbə: https://azertag.az

Azərbaycan Dövlət Kukla Teatrı özünün 86-cı mövsümünü başa vurub.

AZƏRTAC xəbər verir ki, mövsümün bağlanışında teatrın rejissoru Qurban Məsimovun quruluş verdiyi “Cırtdan” və “Üç cəsur” tamaşası oynanılıb.

Balacalar əvvəlcə M.Seyidzadənin məşhur “Cırtdan” mənzum nağıl-pyesi əsasında hazırlanan eyniadlı səhnə əsərini izləyiblər. Teatrın baş rejissoru Qurban Məsimov mərhum dramaturq Rəhman Əlizadəyə məxsus səhnələşdirməyə tam yeni quruluş verərək müasir kukla texnikalarının köməyi ilə fərqli səhnə işi təqdim edib.

Birhissəli kukla tamaşasının quruluşçu rəssamı Rəvanə Yaqubova, bəstəkarı Oqtay Zülfüqarovdur. Mərhum bəstəkarın bu tamaşaya yazdığı musiqilər də yeni səsləndirmədə təqdim olunub.

Tamaşada əsas rolları teatrın aparıcı aktyorları Elmira Hüseynova, Rəhilə İbadova, Elnur Əliyev, Elnur Xəlilov, Adil Dəmirov, Aygül Ağayeva, Vüsal Hüseynov ifa ediblər.

Klassik rus nağılı əsasında hazırlanan “Üç cəsur” tamaşası da balaca tamaşaçıların marağına səbəb olub. Rus bölməsində ilk dəfə hazırlanan (tərcümə Q.Məsimov) bu tamaşaya da teatrın baş rejissoru Qurban Məsimov quruluş verib. O, Cırtdan, Hadı və Bıdının sıx dostluğu üzərində qurulan səhnə işinə yeni obrazlar əlavə etsə də, klassik ana xətti saxlamaqla müasir səhnə həllinə nail olub.

Tamaşada rolları Rauf Babayev, Lina Məmmədova, Afət Ağayeva, Adil Dəmirov, Elmira Hüseynova, Araz Həsənli ifa ediblər.

Tamaşaların nümayişindən sonra, teatrın direktoru, Əməkdar Mədəniyyət İşçisi Rəşad Əhmədzadə müəssisənin yaradıcı həyatında xüsusi rol oynayan əməkdaşları rəhbərlik tərəfindən müxtəlif nominasiyalar üzrə mükafatlandırıb.

Bu mərasimə özünün 29-cu mövsümünü başa vuran “Yuğ” Teatrının aktyorları da qatılıblar. Belə ki, məhsuldar aktyor, ilin aktyor və aktrisası, mövsümün perspektivli aktyoru, uğurlu fəaliyyətinə görə seçilən əməkdaşı, həmçinin, ilin rejissoru, rəssamı da seçilərək sənətdə fərqləndiklərinə görə təltif olunublar.

Teatrın rəhbərliyi ötən mövsümdə olduğu kimi bu il ərzində də teatrla yaxından əməkdaşlıq edən kütləvi informasiya vasitələri təmsilçilərindən bir neçə nəfəri “Teatrın dostu” mükafatı ilə təltif edib.

Təltif olunanlar arasında AZƏRTAC-ın müxbiri Zərəngiz Mansurova da var.

Mənbə: https://azertag.az

Mərkəzi icra hakimiyyəti orqanlarının rəhbərləri tərəfindən şəhər və rayonlarda vətəndaşların qəbulu cədvəlinə uyğun olaraq mədəniyyət naziri Əbülfəs Qarayev iyulun 20-də Qazax şəhərində vətəndaşları qəbul edəcək.

Nazirlikdən AZƏRTAC-a bildirilib ki, bu şəhərdə yerləşən Ədəbiyyat Muzeyində reallaşacaq qəbulda (Heydər Əliyev prospekti, 98A ) Ağstafa, Qazax, Tovuz, Şəmkir, Göygöl, Gədəbəy və Daşkəsən rayonlarından olan vətəndaşlar iştirak edə bilər.

Vətəndaşlar nazirliyin mct@mct.gov.az elektron poçt ünvanı, e-services, mct.gov.az elektron xidmətlər saytı, telefon məlumat sistemi (qaynar xətt): 147 və ya (012) 493-55-21 nömrəli telefon vasitəsilə (əlaqələndirici şəxs Pərviz İsgəndərli) qəbula yazıla bilərlər.

Qəbula gəlmək istəyən vətəndaşların, həmçinin yuxarıda adları qeyd edilən rayonların mədəniyyət şöbələri ilə əlaqə saxlamaları xahiş olunur.

Mənbə: https://azertag.az

İyulun 16-da Bakıdakı Atatürk Mərkəzində Azərbaycan Xalq Cümhuriyyətinin (AXC) yaranmasının 100 illiyinə həsr edilmiş elmi-praktik konfrans keçirilib. Konfrans “Turan Araşdırma Mərkəzi” İctimai Birliyinin təşkilatçılığı və “İstanbul-Azərbaycan Mədəniyyət Evi” dərnəyinin birgə təşkilatçılığı ilə reallaşıb.

AZƏRTAC xəbər verir ki, konfransda İctimai Birliyin sədr müavini Cavid İsmayıl AXC-nin tarixindən, Türkiyə-Azərbaycan arasındakı əbədi dostluq əlaqələrindən, birgə əməkdaşlıq nəticəsində reallaşdırılan layihələrdən söhbət açıb.

Azərbaycan Respublikasının Prezidenti yanında Dövlət İdarəçilik Akademiyasının kafedra müdiri, tarix üzrə fəlsəfə doktoru, dosent Firdovsiyyə Əhmədova AXC-nin müstəsna nailiyyətlərindən danışıb. O, məhz Cümhuriyyətin yaradılması nəticəsində Azərbaycanın dünya xəritəsində bir reallığa çevrildiyini bildirib.

Cümhuriyyətin XX əsrin əvvəllərində olduqca mürəkkəb beynəlxalq şəraitdə yarandığını deyən F.Əhmədova müsəlman Şərqində ilk demokratik respublikanın məhz Azərbaycanda yaradılmasının əhəmiyyətini vurğulayıb. Qeyd edib ki, tarixin ən çətin, ən mürəkkəb dövründə yaranan Azərbaycan Xalq Cümhuriyyəti demokratik ənənələrə malik idi. Cümhuriyyətin yaranması tarixi bir hadisə idi. Azərbaycan Xalq Cümhuriyyəti dünya tarixində öz demokratikliyi ilə seçilirdi.

Vurğulanıb ki, Azərbaycan Demokratik Respublikası mövcud olduğu qısa müddət ərzində demokratik cəmiyyətin formalaşması istiqamətində mühüm addımlar atıb, etnik və dini mənsubiyyətindən asılı olmayaraq bütün vətəndaşların hüquq və azadlıqlarının bərabərliyini təmin edib. Avropanın bir çox dövlətlərində qadınların seçmək və seçilmək hüquqlarının olmadığı bir dövrdə, Azərbaycan Demokratik Respublikası 1918-ci ildə qadınlara bu hüququ verib.

“Cümhuriyyətimiz dünyaya göstərdi ki, biz keçmişlə yaşamırıq, gələcəklə yaşayırıq, humanist dövlətik. Sovet dövründə Azərbaycan Xalq Cümhuriyyətinin adı belə çəkilmirdi, indi isə həmin dövrün həqiqi tarixi dərindən öyrənilir və təqdim olunur”, – deyə alim vurğulayıb.

Konfransda çıxış edən “İstanbul-Azərbaycan Mədəniyyət Evi”nin sədri Hikmət Elp Qafqaz İslam Ordusunun yaradılması haqqında məlumat verib.

Bildirilib ki, Nuru paşa türk və Azərbaycan hərbi hissələrindən təşkil edilmiş Qafqaz İslam Ordusunun komandanı olmaqla bərabər Azərbaycan hökumətinin qərarı əsasında milli hərbi hissələrin formalaşdırılmasına rəhbərliyi də öz üzərinə götürüb. O, Bakı Sovetinə tabe olan bolşevik-daşnak hərbi qüvvələrinə, erməni silahlı dəstələrinə qarşı mübarizəni təşkil edib, Azərbaycanın milli hərbi hissələrini birləşdirib. İncə və çevik hərbi duyuma malik olan Nuru paşa ona həvalə olunmuş hərbi vəzifələrin öhdəsindən bacarıqla gəlib, Azərbaycan hökumətinin və xalqının dəstəyi ilə onun komandanlığı altına olan hərbi qüvvələr qısa vaxt ərzində Gəncədən Bakıya qədər uğurlu döyüş yolu keçiblər.

Natiqlər bildirib ki, bu il AXC-nin qurulmasının 100 illik yubileyi tamam olur. Bu böyük tarixi hadisəni daha da möhtəşəm edən isə Azərbaycan Prezidenti İlham Əliyevin 2017-ci il mayın 16-da imzaladığı “Azərbaycan Xalq Cümhuriyyətinin 100 illik yubileyi haqqında” Sərəncam və 2018-ci ili Azərbaycanda “Azərbaycan Xalq Cümhuriyyəti İli” elan etməsi oldu. Sözsüz ki, bu, çoxəsrlik dövlətçilik tariximizin təbliğində mühüm rol oynamaqla yanaşı, demokratik respublikanın əhəmiyyətini bir daha ortaya qoydu. Böyükdən kiçiyə hər kəs bu sərəncamları ölkə başçısının milli dövlətçilik tariximizə xüsusi diqqəti kimi dəyərləndirir.

Çıxış edənlər Türkiyə-Azərbaycan əlaqələrindən, ölkələrimizin birgə həyata keçirdikləri layihələrdən söhbət açıblar.

Mənbə: https://azertag.az

İyulun 6-da İçərişəhəridəki “Zəncirli bina”da Böyük Britaniya rəssamı Edvard Tvoxiqin “İçərişəhərə qapı” adlı sərgisi açılacaq.

AZƏRTAC xəbər verir ki, fırça ustasının 40-dan çox rəsm əsəri “Ev- zəncirlərlə imarət” qalereyasında nümayiş olunacaq. Sərgidə İçərişəhər tarix Muzeyi Fonduna rəssam tərəfindən hədiyyə edilmiş 15 ədəd əsər təqdim olunacaq.

Xatırladaq ki, ötən il rəssamın “İçərişəhərin 100 növü” adlı əsərləri ofort – qrafika versiyalarının birində yaradılıb və ilk dəfə Azərbaycan Dövlət İncəsənət Muzeyində fərdi sərgidə təqdim olunub.

Sərgi iyulun 20-dək davam edəcək.

Qeyd edək ki, Edvard Tvoxiq rəssamlıqla yanaşı, Vellinqton İncəsənət Kollecinə rəhbərlik edir. Oymaçı Rəssamların London Kral Cəmiyyətinin həqiqi üzvü, Banksayd Qalereyasının hamisidir. Onun “Yer üzü və xətt” (Berstou qalereyası, Brayton), “Təbiətin tərənnümü” (Berkşir), “Görünən poeziya” (İrlandiya Respublikası), “Gözəl mənzərə” (Saffolk), “Edvard Tvoxiq Bakıda və Azərbaycanda” (Bakı) adlı fərdi sərgiləri keçirilib.

Mənbə: https://azertag.az

YARAT” Müasir İncəsənət Mərkəzində “Əmək, istirahət və xəyallar: 1960-1980-ci illər Azərbaycan ustadlarının gözləri ilə” adlı sərgi çərçivəsində böyüklər üçün “Özünü kəşf et” adlı ustad dərsləri keçirilib.

“YARAT”dan AZƏRTAC-a bildirilib ki, “Özünü kəşf et”– yaradıcılıq ab-havası ilə dolu, yeni rəngarəng layihədir. Ustad dərsləri zamanı iştirakçılar gündəlik həyat işlərini kənara qoyub, özlərini tamamilə yaradıcılığa həsr edə biliblər. İştirak edən hər kəs, peşəkar ustadlar tərəfindən müxtəlif bədii texnikalar və üslublarla tanış olub, kətan üzərində fırça və boya ilə öz əsərlərini yaradıblar.

Dost və ailə mühitində yaradıcılıq vasitəsi ilə hisslərini bölüşmək istəyənlər üçün ideal bir fürsət olan ustad dərsləri bundan sonra hər çərşənbə, 19:00-21:00 saatlarında keçiriləcək. Dərslər zamanı iştirakçılar bütün ləvazimatlarla təmin olunacaq.

Mənbə: https://azertag.az

Azərbaycan Respublikası Kinematoqrafçılar İttifaqının elan etdiyi “Azərbaycan kinosu: dünən, bu gün sabah” adlı müsabiqənin nəticələri açıqlanıb.

İttifaqdan AZƏRTAC-a bildirilib ki, milli kinomuzun 120 illiyinə həsr olunmuş müsabiqədə Azərbaycan kinosu milli kino və milli kino məktəbi anlayışları kontekstində” məqaləsi ilə Şəhanə Əliyeva üçüncü yerə layiq görülüb.

Müsabiqədə elan olunan birinci və ikinci yerlər münsiflər heyətinin qərarına əsasən mükafatlandırılmayıb.

Mənbə: https://azertag.az

Builki teatr mövsümü Bakı Uşaq Teatrı üçün də məhsuldar olub. Sənət ocağında bir sıra layihələr həyata keçirilib, çoxsaylı tədbirlər təşkil edilib.

Teatrdan AZƏRTAC-a məlumat verilib ki, Bakı Uşaq Teatrı mövsümü iyulun 12-də “Əyriqulaq” tamaşasının premyerası ilə yekunlaşdıracaq. Əsərin müəllifi Arzu Soltan, tamaşanın quruluşçu rejissoru isə İlhamə Əhmədovadır.

Səhnə əsərinin musiqi tərtibatı Mahir İbrahimliyə, rəqslərin quruluşu Könül Şahbazovaya məxsusdur.

Mənbə: https://azertag.az

2019-cu ildə Azərbaycan UNESCO-nun Ümumdünya İrs Komitəsinin 43-cü sessiyasına ev sahibliyi edəcək.

AZƏRTAC xəbər verir ki, bu barədə məlumat Azərbaycan Respublikası Xarici İşlər və Mədəniyyət nazirliklərinin birgə məlumatında yer alıb.

Hazırda Bəhreyn Krallığının Manama şəhərində UNESCO-nun Ümumdünya İrs Komitəsinin 42-ci sessiyası keçirilir. İclasda Azərbaycan Respublikasının mədəniyyət naziri Əbülfəs Qarayevin rəhbərliyi altında Xarici İşlər və Mədəniyyət nazirliklərinin əməkdaşlarından ibarət nümayəndə heyəti iştirak edir.

İclas çərçivəsində UNESCO-nun Ümumdünya mədəni və təbii irsin qorunması haqqında Konvensiyasına aid məsələlər müzakirə olunub, eyni zamanda müxtəlif ölkələrin maddi irs nümunələri Ümumdünya İrs Siyahısına daxil edilib.

İclasda növbəti il üçün Komitənin sədri və 43-cü sessiyaya ev sahibliyi edəcək ölkə ilə bağlı müzakirələr aparılıb.

Yekun qərara əsasən mədəniyyət naziri Əbülfəs Qarayev Komitəyə sədr seçilib. Beləliklə, 2019-cu ildə UNESCO-nun Ümumdünya İrs Komitəsinin 43-cü sessiyasına Azərbaycan ev sahibliyi edəcək. Tədbirdə dünyanın 180-dən çox ölkəsindən 2 minədək nümayəndənin iştirakı gözlənilir.

Ümumdünya İrs Komitəsinin sessiyası dünya mədəni irsinə töhfə verən ən nüfuzlu tədbirlərdən biridir. Ümumdünya İrs Komitəsi dünya xalqlarının kimliyini və tarixi yaddaşını ifadə edən maddi və təbii irs nümunələrinə, ən dəyərli abidələrə dair qərarlar qəbul edir. Bu tədbirə ev sahibliyi etmək və eyni zamanda Komitəyə sədrlik etməklə Azərbaycan dünya xalqlarının mədəniyyət tarixində öz müsbət izini qoyacaq.

Ölkəmiz üçün mühüm əhəmiyyət kəsb edən belə bir qərarın qəbul olunması Prezident İlham Əliyevin rəhbərliyi altında aparılan uğurlu xarici siyasət, Birinci vitse-prezident, UNESCO-nun xoşməramlı səfiri Mehriban Əliyevanın dəstəyi və qayğısı, Xarici İşlər və Mədəniyyət nazirliklərinin birgə fəaliyyəti nəticəsində ölkəmizin UNESCO ilə tərəfdaşlıq münasibətlərinin yüksək səviyyədə inkişaf etdiyini göstərir.

Mənbə: https://azertag.az

Abdulla Şaiq adına Dövlət Kukla Teatrı mövsümə iyulun 15-də yekun vuracaq.

Teatrın mətbuat xidmətindən AZƏRTAC-a bildirilib ki, sənət ocağı “Min bir gecə nağılları” əsasında hazırlanan “Əlibaba və qırx quldur” adlı yeni tamaşa ilə mövsümü bağlayacaq.

Tamaşanın quruluşçu rejissoru Anar Məmmədov, quruluşçu rəssamı İqbal Əliyevdir. Səhnə əsərinin musiqisi Fikrət Əmirovun “Min bir gecə” baletindən bəhrələnərək hazırlanıb. Tamaşada teatrın aktyorları Rəhim Rəhimov, Cavid Telman, Cəmilə Allahverdiyeva, Samirə Nəcəfli və başqaları rol alıb.

Həmin gün teatr rəhbərliyinin hesabat xarakterli çıxışı nəzərdə tutulub. Eyni zamanda, mövsümün son görüşündə Kukla Teatrının əməkdaşları mükafatlandırılacaq. İlin ən yaxşı aktyoru, aktrisası, rejissoru, texniki işçisi fəxri fərmanla təltif olunacaq. Həmçinin teatrın uğurlarını mediada geniş işıqlandıran KİV təmsilçilərinin də mükafatlandırılması nəzərdə tutulur.

Mənbə: https://azertag.az

Fransada Azərbaycan Xalq Cümhuriyyətinin yaranmasının 100 illiyi ilə bağlı silsilə tədbirlər davam edir. Bu ölkədəki səfirliyimiz və “Dirçəliş” Gənclərin Sosial-Psixoloji Reabilitasiya Mərkəzinin birgə təşkilatçılığı ilə Azərbaycan Mədəniyyət Mərkəzində Azərbaycan Xalq Cümhuriyyətinin 100 illiyi münasibəti ilə “Azərbaycan gənc rəssamları Parisdə” adlı sərgi təşkil olunub.

AZƏRTAC xəbər verir ki, sərgidə ölkəmizin 22 gənc rəssamının 60-dan çox əsəri nümayiş olunub.

Sərgini giriş sözü ilə açan ölkəmizin Fransadakı səfirinin siyasi işlər üzrə birinci katibi Vaqif Ağayev müsəlman Şərqində ilk dünyəvi Azərbaycan Xalq Cümhuriyyəti haqqında ətraflı məlumat verib. Onun XX əsrin əvvəllərində azadlıq, humanizm, bərabərlik kimi mütərəqqi prinsiplərdən ilhamlandığını diqqətə çatdırıb, əsas nailiyyətlərindən birinin qadınlara səsvermə hüququnun verilməsi olduğunu vurğulayıb.

V.Ağayev səfirlik və Gənclərin Sosial-Psixoloji Reabilitasiya Mərkəzinin sertifikatlarını gənc rəssamlara təqdim edib.

Gənc rəssamlarımızın əsərləri sənətsevərlər və ziyarətçilər tərəfindən maraqla qarşılanıb.

Qeyd edək ki, “Dirçəliş” Gənclərin Sosial-Psixoloji Reabilitasiya Mərkəzinin təşkilatçılığı ilə gənc rəssamların əsərləri bir çox Avropa ölkələrində nümayiş olunub və sənətsevərlərin rəğbətini qazanıb.

Şəhla Ağalarova
AZƏRTAC-ın xüsusi müxbiri

Mənbə: https://azertag.az

İyulun 8-də “YARAT” Müasir İncəsənət Məkanı Dənizkənarı Bulvar İdarəsinin dəstəyi ilə “Balaca YARAT” layihəsinin ilk yarım illik yekun sərgisini təqdim edəcək.

AZƏRTAC xəbər verir ki, layihə çərçivəsində uşaqlar tanınmış rəssamlar Aida Mahmudova və Mikelancelo Pislotelettonun fərdi sərgilərindən ilhamlanaraq müxtəlif sənət əsərləri yaradacaq. Sərgi zamanı layihənin ustadları Nərminə Bağırova və Nigar Quliyeva uşaqların əsərlərinin mövzuları, seçilmiş materiallar və texnikalar haqqında məlumat verəcəklər. Eyni zamanda, bir ay müddətində Roman Qocayevin rəhbərlik etdiyi “Özünü Tap” layihəsinin yekun əsərləri də yer alacaq.

Uşaqlar isə sərgini gəzməklə yanaşı, müxtəlif interaktiv müsabiqələrdə iştirak edib hədiyyələr qazanacaqlar.

Mənbə: https://azertag.az