Daşkənddə özbək ədəbiyyatının klassiki, şair, dramaturq, tərcüməçi Maqsud Şeyxzadənin anadan olmasının 110 illiyi münasibətilə “İki xalqın qüruru” adlı sənədli film hazırlanır.
AZƏRTAC xəbər verir ki, Daşkənddəki Heydər Əliyev adına Azərbaycan Mədəniyyət Mərkəzinin təşəbbüsü ilə hazırlanan filmin rejissoru Özbəkistanda yaşayan soydaşımız Eldar Məmmədovdur. Filmdə arxiv materiallarından istifadə edilib, habelə filmin yaradıcı heyəti ədibin vətəni Azərbaycanda olub, şairin doğulduğu Ağdaş rayonuna gedib, bir sıra maraqlı məlumatlar əldə edib, müsahibələr lentə alıb.
Azərbaycan Mədəniyyət Mərkəzinin direktoru Samir Abbasov bildirib ki, filmin çəkilməsində əsas məqsəd Maqsud Şeyxzadə irsini təbliğ etmək, habelə xalqlar arasında dostluq əlaqələrinin daha da genişlənməsinə dəstək olmaqdır. Sənədli materialların, həm də bədii parçaların yer aldığı filmdə Maqsud Şeyxzadənin həyat və yaradıcılığı, onun Azərbaycan və özbək xalqlarının ədəbiyyatına verdiyi töhfə, yaratdığı ölməz əsərlər öz əksini tapacaq.
“Özbək ədəbiyyatının “Şekspiri” adlandırılan Maqsud Şeyxzadənin qardaş xalqın ədəbiyyatının və ədəbiyyatşünaslığının inkişafında əvəzsiz xidmətləri olub.
Onun anadan olmasının 110 illik yubileyi ilə əlaqədar Azərbaycan Mədəniyyət Mərkəzinin layihəsi çərçivəsində Daşkənddə çap olunmuş “Özbək şeir çələngi” adlı kitabda Maqsud Şeyxzadənin əsərləri özbək və Azərbaycan dillərində yer alıb. Həmçinin Mədəniyyət Mərkəzinin “Dostluq muzeyi”ndə dahi şairə həsr olunan bölmənin yaradılması nəzərdə tutulur, “Özbəkistan-Azərbaycan” Dostluq Cəmiyyəti ilə birgə Nizami Gəncəvi adına Daşkənd Dövlət Pedaqoji Universitetində şairə həsr olunan xatirə gecəsinin keçirilməsi planlaşdırılır.
Yubileylə bağlı Mədəniyyət Mərkəzinin layihəsi çərçivəsində bu il bir sıra digər tədbirlərin keçirilməsi də nəzərdə tutulur.
Ədibin “Cəlaləddin Manquberdi”, “Mirzə Uluqbəy” faciələri, “Daşkəndnamə”, “Ağsaqqal” poemaları oxucular tərəfindən rəğbətlə qarşılanıb. Daşkənddə yazıçının altı cildlik seçilmiş əsərləri çap olunub.
M.Şeyxzadə N.Gəncəvi, Ş.Rustaveli, M.Füzuli, V.Şekspir, İ.Höte, C.Bayron, A.S.Puşkin, M.Lermontov, M.F.Axundzadə və digər dünya klassiklərinin əsərlərini özbək dilinə tərcümə edib.
Maqsud Şeyxzadə ölümündən sonra Özbəkistanın birinci Prezidenti İslam Kərimovun Fərmanı ilə “Böyük xidmətlərə görə” ordeni ilə təltif olunub.
Mədəniyyət Mərkəzindən bildirilib ki, “İki xalqın qüruru” filminin Özbəkistanda və Azərbaycanda təqdimatı keçiriləcək, film televiziya kanallarına göndəriləcək.
Qulu Kəngərli
AZƏRTAC-ın xüsusi müxbiri
Daşkənd
Mənbə: https://azertag.az