Kənan AYDINOĞLU.”Bağışlayıb, suçumu gəl”

1902788_614529541965133_896121757_n

Gündəlik Analitik İnformasiya Agentliyinin
Mətbuat xidmətinin rəhbəri,
Azərbaycan Yazıçılar və Jurnalistlər Birliklərinin üzvü.

Şair dostumuz Əziz Musaya.

Şairsən, kövrək şairsən,
Bağışlayıb, suçumu gəl.
Könlünün sözünü dinlə,
Bağışlayıb, suçumu gəl.

Yasamaldan və Bayıldan,
Nəbidən, Qaçaq Mayıldan,
Qubadlıdan, Cəbrayıldan,
Bağışlayıb, suçumu gəl.

Şairə atılmaz ki, ox
Möminin qəlbi, gözü tox,
Bu dünyaya etibar yox,
Bağışlayıb, suçumu gəl.

Xoş diləyi, niyyəti sev,
Möhnəti və zilləti sev,
Düşmə dara, milləti sev,
Bağışlayıb, suçumu gəl.

Fikrim dumanda, çəndədi,
Yoğrulan yenə kündədi,
Ustad, dəyişən bəndədi,
Bağışlayıb, suçumu gəl.

Bakı şəhəri. 24 dekabr 2019-cu il.

Əziz MUSA.”Gözlərin”

em

Azərbaycan Yazıçılar və Jurnalistlər Birliklərinin üzvü,
“İlham çeşməsi” qəzetinin təsisçisi və baş redaktoru,
Azərbaycan Respublikası Prezidentinin Təqaüd Fondunun təqaüdçüsü

Gözlərə nə qədər şeir yazılıb,
Gözlərə nə qədər mahnı qoşulub,
Sənin gözlərindən yoxdu dünyada,
O gözlər tay mənim həyatım olub.

O gözlər naz ilə baxanda mənə,
Məndə nə can qalır, nə də ki, ürək,
O gözlər necə də yaraşır sənə,
Ən böyük rəssammış, inan ki, fələk.

O gözlər Günəşdən od-alovludur,
Baxanda qəlbimi odlara yaxır.
Necə işıqlıdır, necə nurludur,
İlahi, o gözlər nə qəşəng baxır.

Mənə yol göstərir şəfəqi, nuru,
O gözlər gecəni işıqlandırır,
O gözlər mehriban, o gözlər duru,
Qəlbimə od salır, məni yandırır.

Gözüm o gözləri görəndən bəri,
Sanıram Ay ilə, Günəş görüşüb,
O gözlər dünyanın möcüzəsidi,
Mənim qismətimə, bəxtimə düşüb.

Əziz MUSA.”Gizlənpaç oynama”

em

Azərbaycan Yazıçılar və Jurnalistlər Birliklərinin üzvü,
“İlham çeşməsi” qəzetinin təsisçisi və baş redaktoru,
Azərbaycan Respublikası Prezidentinin Təqaüd Fondunun təqaüdçüsü

Gizlənpaç oynama bu qaşla gözlə,
Sən harda olsan da tapacam səni,
Gecə də gündüz də yolumu gözlə,
Gəl bu ayrılığa öyrətmə məni.

Unutma özünü, vaxt tələ qurur,
Yolumu, izimi tumarla hərdən,
Hələ ilk görüşün çiçəyi durur,
Bu eşqi, sevinci buraxma əldən.

Çalış baharını yuxuya vermə,
Qismətin, taleyin bərəsi olur.
Dövranın ağlayan üzünü görmə,
Sevdalı günlərin bəhrəsi olur.

Sonrakı göz yaşı hayına yetməz,
Çoxdu bəhanələr, bilirəm indi.
Acı göz yaşından çiçəklər bitməz,
Sənin ürəyinə gəlirəm indi.

Çox zaman göz, qaşa aldanır adam,
Səni çox sevirəm, qaçma gözümdən,
Demə taleyinə qəribəm, yadam.
Mən dönən deyiləm heç vaxt sözümdən.