Azərbaycan Yazıçılar Birliyinin üzvü, “Hüseyn Arif” Ədəbi Məclisinin sədri
Hərdən yaza bilmirəm,
qırılır misralarım.
Zülmətdə işıq gəzən
bir kordu barmaqlarım…
Ürəyimin sapından
düşüb,neçə söz itib.
Hər sözün yuvasında
indi neçə göz bitib.
Sənsizlik bir səhradı,
yeridikcə batıram.
Bu sevda yuxusudu,
elə bilmə yatıram.
Kipriyimi toz basıb,
gözümdə eşq dumanı.
Mürgüləyir içimdə
bir dərvişin gümanı.
Ay buludda gizlənib,
Ürəyim bir yanar şam…
Mən də bir mirvariyəm,
səhraya atılmışam.