Azərbaycanın Mədəniyyət və Ədəbiyyat Portalı

Day: Fevral 12, 2023

  • Azərbaycanlı yazıçı Coşqun Xəliloğlunun hekayəsi “İlin hekayələri” nəsr toplusunda işıq üzü görüb

    “Mücrü” Nəşriyyatının “Proza” seriyasından işıq üzü görən “İlin hekayələri” nəsr toplusunda Azərbaycan Yazıçılar Birliyinin üzvü, Azərbaycanın Mədəniyyət və Ədəbiyyat Portalının Qaradağ Bürosunun Rəhbəri, istedadlı yazıçı Coşqun Xəliloğlunun “Təqdimat” adlı hekayəsi də yer alıb.

    Qeyd edək ki, “Mücrü” Nəşriyyatının 44 günlük Vətən müharibəsində Rəşadətli Azərbaycan Ordusunun qələbəsi münasibətilə gerçəkləşdirdiyi yeni layihə çərçivəsində işıq üzü görən “44 GÜN” ədəbi-bədii toplusunda “Qırx dörd” adlı şeiri ictimaiyyət nümayəndələrinin nəzərinə çatdırılıb.

    Azərbaycanın Mədəniyyət və Ədəbiyyat Portalının Mətbuat xidməti və İctimaiyyətlə əlaqələr şöbəsi. 

  • Şəfa VƏLİYEVA.”Biz sonuncu ayrılığın”

    “Gənc Ədiblər Məktəbi”nin müdavimi, Azərbaycan Yazıçılar Birliyi Gənclər Şurasının və Azərbaycan Jurnalistlər Birliyinin üzvü, Prezident təqaüdçüsü, “İlin gənci” müfakatçısı, Azərbaycanın Mədəniyyət və Ədəbiyyat Portalının Baş redaktoru

    biz sonuncu ayrılığın
    sonuncu düşərgəsiyik…
    indi burdan da ayrılıb
    uzaqlara gedəsiyik…

    hələ bitməyib yeni gün,
    başlamayıb axşamçağı…
    hələ ki, sevgimiz sürgün,
    ölüm ömrə boyunbağı…

    nə yaxşıdı, ölüm üçün
    sonuncu rəqsi eləmək…
    şedevrdi, özüm üçün
    rekviem`i bəstələmək…

    bax, bu ayrılıq dediyin,
    yazır dünya tarixini…
    bir barmağında oynadır,
    Heraklını, Axilini…

    sən də ki…
    Nə bilim axı…
    hələ vüsal axtarırsan…
    utanmasan,
    ayrılığın
    havasına oynayarsan…

    (2017)

  • Arzu HÜSEYN.”Mən günahdan keçmədim”

    Azərbaycan Yazıçılar Birliyinin üzvü, Prezident mükafatçısı, Azərbaycanın Mədəniyyət və Ədəbiyyat Portalının BAKI Bürosunun Rəhbəri

    Mən günahdan keçmədim,
    Günahlar məndən keçdi.
    İllər aman vermədi,
    Saçımdan dən-dən keçdi.
    Bir də baxdım zaman az,
    Gecdi hər şeyə, gecdi.
    Göy üzünün qapısı açıq qalıb, İlahi!

    Səhərəcən ağladı
    Səmaların kür yeri.
    Göz yaşına boyadı,
    Yol-irizi, hər yeri.
    Bir körpənin ahıdı,
    Dünyanın ən dar yeri.
    Göy üzünün qapısı açıq qalıb, İlahi!

    Hara gedir bu karvan,
    Qum əriyir saatda.
    Qul kimdir, kim hökmüran?

    Kim piyada, kim atda?
    Adam qalmadı daha,
    Gözü dönmüş həyatda,
    Göy üzünün qapısı açıq qalıb, İlahi!
    Kim hürküdüb səhəri?
    Zülmətin yox əlacı.
    Dan üzünün əlləri
    Qandır, acıdır-acı.
    Dörd yanım matəm yeri,
    Dörd yanım dar ağacı,
    Göy üzünün qapısı açıq qalıb, İlahi!

    Bağla şər qapıları…

  • Xəyalə SEVİL.”Asaram özümü göyün üzündən”

    “Gənc Ədiblər Məktəbi”nin müdavimi, Azərbaycan Yazıçılar Birliyinin (AYB) üzvü, Azərbaycan Respublikası Prezidenti təqaüd fondunun təqaüdçüsü, Azərbaycanın Mədəniyyət və Ədəbiyyat Portalının GƏNCƏ Bürosunun Rəhbəri

    Buludların ac it kimi
    Elə hürür ki, üstümə, ilahi,
    Məni yağışın tutacaq.
    Qapından qayıdır dualarım da,
    Məni qarğışın tutacaq.
    Ömrüm il-il tökülür,
    Daşlayıblar ömrümü.
    Bir ulduzsuz gecəyəm,
    Bir kimsəsiz küçəyəm.
    Bu dəlisov yağışlar
    Xoşlayıblar ömrümü.
    Eh! Daha əlimi açmaram sənə,
    Eh! Daha əllərim qoynumda qalar.
    Asaram özümü goyün üzündən,
    İlahi, ölümüm boynunda qalar!

  • Xəyalə SEVİL.”Səndən nə qaldı ki…”

    “Gənc Ədiblər Məktəbi”nin müdavimi, Azərbaycan Yazıçılar Birliyinin (AYB) üzvü, Azərbaycan Respublikası Prezidenti təqaüd fondunun təqaüdçüsü, Azərbaycanın Mədəniyyət və Ədəbiyyat Portalının GƏNCƏ Bürosunun Rəhbəri

    Sonra gözəl-göyçək ayrılıq gəldi,
    Sonra gözəl-göyçək ayırdı bizi.
    Arxanca uzanan əlim gödəldi,
    Üzü qışa tutduq ürəyimizi.

    Səndən nə qaldı ki, eh… Səndən heç nə,
    Bir azca peşmanlıq, bir azca hüzün.
    Sən məni hamıdan yaxşı tanıdın,
    Mən səni tanıya bilmədim, quzum.

    Ölü doğulubdu məhəbbətimiz,
    Daha yanağımda axınım sənsən…
    Bir az uzaq dayan, uzaq ol mənə,
    Hələ də hamıdan yaxınım sənsən…

  • Banu MUHARREM.”Səssiz incikliyi soyunub yey gəl”

    Azərbaycanın Mədəniyyət və Ədəbiyyat Portalının Baş redaktor müavini 

    Mənimçün darıxıb ,dönəsi olsan
    Səssiz incikliyi soyunub yey gəl.
    Üşü mənsizliyin qaranlığında
    Boynuna açdığım qucağı gey, gəl.

    Hicran dağlarına ələnər dolu.
    Bixəbər dolaşıb, itirmə yolu.
    Sağını unutsan, xatırla solu.
    Sevgi dostluğuma yenilsin hey, gəl.

    Sevdiyin saçımı yola dəli yel,
    Bu hüzn qadına biraz bağla bel.
    Çöhrəmə sancdığın sevinci tel-tel
    Doldur bir qədəhə, əlində mey gəl.

    Tökülsün saçlarım,sınsın dizlərim
    Səhvini aparsın, mənim düzlərim
    Naxoş ürəyimdən çıxan sözlərim
    Olsun ürəyinə bir qəmli ney, gəl.