Day: Mart 14, 2023

  • Xalq yazıçısı ANAR.Yeni şeirlər (2023)

    ***

    Həsəd çəkmədim heç vaxt,

    Heç bir zaman heç kəsə.

    Qısqanmadım kiminsə

    şöhrətinə, dövlətinə, adına…

    güclü istedadına

    Ömrün son müddətində

    İllər ötdüyü zaman

    qısqanıram mən yaman

    özüm bilmirəm haçan

    gələcək Gələcəyə

    Mənsiz keçən illərçün

    qəribsəyirəm hər an.

    Bir gün mən olmayanda

    Necə yad edəcəklər,

    nələr söyləyəcəklər?

    İçində dərd çəkən kim?

    Guya ki dərd çəkən kim?

    Şux, şən zarafatları

    yada salıb gülən kim?

    Ayrılığa dözməyib

    həsrətindən ölən kim?

    Bəlkə də haqlıdırlar

    Hindistan müdrikləri

    Ölən insan da bir gün

    Dönüb qayıdır geri,

    Quş kimi, balıq kimi,

    Ağactək, gül-çiçəktək.

    Quşları ovlayırlar,

    Balıqları tuturlar,

    Ağacları kəsirlər,

    gül-çiçəyi dərirlər,

    yenə məhv olur dönən,

    Mən hansıymışam görən?

    Tutalım, lap belədir,

    Dünyamı dəyişərkən,

    Bir də dönəcəm geri

    Kim tanıyacaq məni?

    Dünya bir pəncərədir.

    qapatma pəncərəni…

    12 yanvar 2022

    ***

    İtirdiyim dostlarla

    yuxuda görüşürəm.

    maska filan taxmadan

    görüşüb-öpüşürəm.

    Gündüz ölən dostlarım

    Gecə yuxuma girir.

    Mən burdan danışıram.

    Soruram: orda nə var?

    Cavab vermir heç biri,

    Məlul-məlul baxırlar.

    Oranın ünsiyyəti

    bəlkə, susub baxmaqmış.

    Görəsən, o dünyada

    yuxular belə varmış?

    Ordakı dostlarım da

    Hərdən görürmü məni,

    ordakı yuxularda?

    Əslində, kim bilir kim,

    Kimdi yuxulu, ayıq?

    Bəlkə, onlardı oyaq

    Biz burda yuxudayıq.

    13 yanvar 2022

    ***

    Asilərim elə hey məni dəfn eləyirlər

    “tükənibdir” deyirlər.

    Amma mən də beləyəm:

    “Basdırılandan” sonra,

    “tükənəndən” sonra da

    On cild kitab yazmışam.

    Bir gün əgər doğrudan

    əcəl qapımı döysə,

    Ölümə də hazıram.

    Amma hələ ki, sağam

    Yazmaqçün yaşayıram,

    yaşamaqçün yazıram.

    12 yanvar 2022

    Mənbə: https://edebiyyatqazeti.az/

  • Pərvindən yeni kitab

       Yazıçı-publisist, «Qobustan» dərgisinin baş redaktoru, Filologiya üzrə fəlsəfə doktoru Pərvin Nurəliyevanın «Anar yaradıcılığında zaman və insan» adlı dərs vəsaiti işıq üzü görüb. Kitab AMEA-nın Nizami Gəncəvi adına Ədəbiyyat İnstitutunun Elmi şurasının qərarı ilə «Qanun» nəşriyyatında işıq üzü görüb. Elmi redaktoru Akademik İsa Həbibbəylidir.

    Dərs vəsaiti Ali məktəblərin tələbələrinin Xalq yazıçısı Anarın yaradıcılığını dərindən mənimsəməsi və sənətkarın aid olduğu dövrü öyrənməsi üçün faydalıdır. Burada yazıçının bioqrafiyası və ayrı-ayrı əsərlərinin vəhdət şəklində təhlili ilə həm Sovet dövrü, həm də müstəqillik illəri Azərbaycan ədəbiyyatı tarixinin mənzərəsi yaranır… Qeyd edək ki, dərs vəsaiti Xalq yazıçısı Anarın 85 illik yubileyinə ithaf olunub.

    Kitabın müəllifi «Anar dünyası» esselər kitabından sonra yazıçının yaradıcılığına ayrı yöndən yanaşmağa çalışdığını bildirib: «Təxminən son beş ildə üzərində işlədiyim, zaman-zaman əlavələr etdiyim və yazıçın nəsrini bütöv halda təhlil etməyə çalışdığım bu kitabın Anar müəllimin 85 illik yubileyi ərəfəsində çapdan çıxması təsadüfi deyil. Əlbəttə öncəki esselər kitabımdan sonra daha fundamental araşdırma ortaya qoymaq istəyirdim. Amma kitabın yazılmasından çox onun çapa hazırlanması daha çətin məqamdı. Bu yolda Nizami Gəncəvi adına Ədəbiyyat İnstitutunun, hörmətli elmi məsləhətçim, akademik İsa Həbibbəylinin dəstəyini xüsusi qeyd etməliyəm. Elm yolunda hər bir uğurlu işə dəstək olan İsa müəllim bu kitabın da elmi məsləhətçisidir. Həmçinin Qanun nəşriyyatı və rəhbəri Şahbaz Xuduoğlu çox qısa müddətdə kitabın işıq üzü görməsi üçün hər cür çaba göstərdilər. Buna görə bütün «Qanun» ailəsinə minnətdarlığım sonsuzdur. Və əlbəttə bu böyük xəzinəni bizlər üçün yaradan Ustadım Anar müəllimə təşəkkür eddirəm. Arzu edirəm ki, yazıçı çox yaşasın, çox yazsın, oxucularını hər zaman sevindirsin…»

    Qeyd edək ki, bu günlərdə Pərvinin Türkiyədə, Türk Ədəbiyyatı Vaqfı yayınlarından «Çağının önündə bir yazar:Anar» adlı kitabı da işıq üzü görüb. Bu kitabda isə Xalq yazıçısı Anarın türk dünyası qarşısında xidmətləri, ümumtürk ədəbiyyatına verdiyi töhvələr geniş araşdırılıb. Kitabın Türkiyə türkcəsinə yazıçı-tərcüməçi, «Türk ədəbiyyatı» dərgisinin baş redaktoru İmdat Avşar çevirib.

    Mənbə: https://edebiyyatqazeti.az/

  • «Qobustan» dərgisinin Ümummilli lider Heydər Əliyevin xatirəsinə ithaf olunmuş yaz sayı işıq üzü gördü

       «Qobustan» İncəsənət Toplusunun yazı sayı işıq üzü görüb. 2023-cü il Heydər Əliyev ili konsepsiyasında yayımlanan dərgi Ulu öndərin əziz xatirəsinə ithaf olunub. Dərgidə müxtəlif yazıçıların, alim və sənətkarların Heydər Əliyev haqqında xatirələrinə, yazılarına yer verilib. Ədəbiyyatşünas-alim Vilayət Quliyev «Ədəbiyyat mühafizi» adlı məqaləsində Ulu öndərin şair və yazıçılarla, söz-sənət adamları ilə münasibətlərindən söz açıb.

       Həmçinin dərginin Yaz sayında bu il yubileyləri qeyd olunan «Azərbaycan» dərgisi, «Sabah» Yaradıcılıq Birliyi haqqında məqalələr, bəstəkarlar Fikrət Əmirov, Şəfiqə Axundova, rəssam Cavad Mircavadov, Xalq yazıçıları Anar, Elçin, Mövlud Süleymanlı yubileylərinə həsr olunmuş esse və təbrik yazıları yer alıb. Dərginin bu sayı «Qobustan»ın əməkdaşı, rəssam Ayxan Rəsulun 50 illik yubileyinə həsr olunmuş məqalə ilə yekunlaşır.

        Ümummilli liderin mədəniyyətə, ədəbiyyata və onun ayrı-ayrı nümayəndələrinə qayğısı, sevgisi, xeyirxah münasibəti, həmçinin yubileyləri qeyd olunan söz-sənət adamlarının həyatında oynadığı rol dərginin əsas ideyasını təşkil edir.

        Qeyd edək ki, oxucular «Qobustan»ın bu sayını AYB-nin dördüncü mərtəbəsindən, dərginin redaksiyasından əldə edə bilərlər.

    Mənbə: https://edebiyyatqazeti.az/

  • Türk Ədəbiyyatı Vəqfində Xalq yazıçısı Anar haqqında iki kitab işıq üzü görüb

    Bu günlərdə Türkiyənin nüfuzlu ədəbiyyat təşkilatı olan Türk Ədəbiyyatı Vəqfində “Tedev” nəşriyyatının Xalq yazıçısı Anar haqqında iki yeni kitab işıq üzü görüb.

    Azərbaycan Yazıçılar Birliyindən AZƏRTAC-a bildirilib ki, birinci kitab İmdat Avşarın tərtibatı ilə məqalələr toplusu – “İki əsrin qovşağında bir yazar: Anar” və Pərvin Nurəliyevanın müəllifi olduğu “Çağının önündə bir yazar: Anar” adlanır. Birinci kitab Türkiyənin önəmli söz-sənət adamlarının, alimlərinin yazıçının 85 illik yubileyinə yazdığı məqalələrdən ibarətdir. Burada Əli Yavuz Akpınar, Ataol Bəhramoğlu, İsa Həbibbəyli, Yəhya Akengin, Nəsrin Qaraca, Əhməd Bican Ərcilasun, Fikrət Türkmən, Yaqub Çelik, Əli Abdin Qaraca, Gökhan Tunc, Gülzar Məmmədova, Abuzər Bağırov, İmdat Avşar kimi türk dünyasının önəmli imzalarının yazıçının həyatı və yaradıcılığını incələyən yazıları yer alıb. Pərvin Nurəliyevanın kitabında isə Anarın Türk dünyası qarşısında xidmətləri və ümumtürk ədəbiyyatına aid araşdırmaları haqqında məqalə-esselər yer alıb. Kitabı Türkiyə türkcəsinə çevirən yazıçı-tərcüməçi, “Türk ədəbiyyatı dərgisi”nin baş redaktoru İmdat Avşardır.

    Türk Ədəbiyyatı Vəqfinin rəhbəri, şair Sərhat Kabaklı bu cür kitabların çapının son dərəcə vacib olduğunu bildirib: “Beş il öncə İstanbulda ustad Anarın 80 illik yubileyini qeyd edəndə demişdik ki, əziz dostumuz çox yaşasın, yaratsın, biz də onun növbəti yubileylərin təbrik edək. Bu dəfə yubiley çərçivəsində işlərimiz daha genişdir. Arzumuz odur ki, Anarımızı yeni nəsil türk oxucusu tanısın, sevsin. Anarımız deyirəm ona görə ki, o, bütün türk dünyasının ortaq dəyəridir. Həm Pərvin Nurəliyevanın kitabından, həm də İmdat Avşarın tərtib etdiyi məqalələr toplusundan bir daha anladıq ki, Anar qardaş xalqların və onların ədəbiyyatının yaxınlaşması üçün necə böyük işlər görüb. Mən əziz Anar müəllimi təbrik edirəm. Qalan ürək sözlərimi Türkiyədə, İstanbulda düzənləyəcəyimiz tədbirlər deyəcəyəm…”

    Kitabların tərtibatçısı və tərcüməçisi, Azərbaycan Yazıçılar Birliyinin Türkiyə təmsilçisi İmdat Avşar bu il Türkiyədə Anar yubileyi ilə bağlı planların geniş olduğunu bildirib: “Ustadın yubileyinə həsr etdiyimiz bu iki kitab görmək istədiyimiz işlərin uğurlu bir başlanğıcıdır. Arzum o idi ki, bu dəfə yeni yazılar qələmə alınsın, yeni kitablar çıxsın. Tərtib etdiyim kitabda imzası olan hər kəs öz tanıdığı, sevdiyi Anarı təqdim edir türk oxucusuna. Hazırda ustadın nəsr əsərlərini də Türkiyə türkcəsinə yenidən çevirirəm, yaxınlarda İstanbulda üç romanı çapdan çıxacaq. Anar Türk dünyasının yaşayan Dədə Qorqud ödülünün sahibidir. Məhz belə dəyərlərimizi təbliğ etməyə, gənc nəsilə tanıtmağa ehtiyac var. Bu işlərdə böyük çabalar göstərən, hər cür dəstəyini əsirgəməyən əziz Sərhat Kabaklıya, Türk Ədəbiyyatı Vəqfi ailəsinə çox minnətdaram…”

    Mənbə: https://azertag.az/

  • Azərbaycan Yazıçılar Birliyindən “Heydər Əliyev İli”nə töhfə

    “Heydər Əliyev İli”nə Yazıçılar Birliyinin töhfəsi yeni kitab olacaq. Belə ki, Yazıçılar Birliyi bu əlamətdar ilə kitab hazırlayır. Bu kitabda Ulu Öndər Heydər Əliyevi şəxsən tanıyan yazıçıların xatirələri toplanıb.

    AZƏRTAC xəbər verir ki, bunu Azərbaycan Yazıçılar Birliyinin sədri, Xalq yazıçısı Anar deyib.

    “Kitabda mənim də xatirələrim yer alır. Tanımayan, şəxsən ünsiyyətdə olmayan yazıçıların da Heydər Əliyevə həsr etdikləri yazılar bu nəşrdə olacaq. 100 illik yubileyə belə bir sanballı nəşrlə töhfəmizi verəcəyik”,- deyə Xalq yazıçısı bildirib.

    Mənbə: https://azertag.az/

  • Bu gün İlaxır çərşənbədir

    Bu gün torpağın və həyatın oyandığı İlaxır çərşənbə – Torpaq çərşənbəsidir. İlaxır çərşənbə Su, Od və Yel çərşənbələrindən sonra gəlir.

    AZƏRTAC xəbər verir ki, bu çərşənbəyə xalq arasında “Yer çərşənbəsi”, “İlaxır çərşənbə” və ya “Torpaq çərşənbəsi” də deyilir. İnanca görə, sonuncu çərşənbədə yer oyanır, torpaq nəfəs alır. Torpaq bütün canlılara həyat verir və uca Allahın yaratdıqlarının hamısı, o cümlədən insanlar onun qoynuna sığınırlar.

    Uzun qış aylarında insanların evlərində saxladığı ərzaqlar tükənir. Əfsanəyə görə adamların əziyyət çəkdikləri bu gündə Su, Od, Yel və Torpaq xatunun yeraltı məbədinə qonaq gəlir və burada yatmış Torpağı oyadırlar. İlaxır çərşənbədə torpaq artıq əkinə hazır olur və ona toxum səpməyə başlayırlar. İnsanlar havanın mülayimləşməsinə, suların donunun açılmasına, çayların suyunun artmasına və torpağın canlanmasına sevinib, bu təbiət hadisəsinin hər birini (çərşənbələri) müxtəlif mərasimlərlə qeyd edirlər.

    Boz ayın sonuncu çərşənbəsi olan İlaxır çərşənbə isə xalqımız tərəfindən böyük coşqu ilə qeyd edilir. Ölkəmizin bəzi bölgələrində İlaxır çərşənbə hətta Novruz bayramının özü qədər təntənəli keçirilir.

    Bu çərşənbədə nələr etməli?

    İlaxır çərşənbədə həyət-bacalarda tonqal qalanır, hər bir evdə xonçalar bəzənir, bayram süfrəsi açılır. Həmin gün küsülülər barışmalıdırlar. Qapıpusma, evdə ailə üzvlərinin hər birinin adına niyyət tutub şam yandırma, qonşularla, qohumlarla bayramlaşma və bir çox adət-ənənələr bu gün də yaşadılır.

    Həmçinin bu günün başlıca özəlliyi ondan ibarətdir ki, qəbir üstünə gedilər, ölülərin ruhuna Quran oxunar, dua edilər. Axşam isə tonqalın üstündən yeddi dəfə o yan bu yana atılar, bununla da insanlar köhnə ilin azar-bezarını, dərd-bəlasını özlərindən qovub təzə ilə sağlam canla qədəm qoyacaqlarına, xəstəliklərdən qorunacaqlarına inanırlar.

    İlaxır çərşənbədə bayram xonçasına Novruzun atributları olan səməni, paxlava, şəkərbura, qoğal, boyalı yumurtalar, müxtəlif çərəzlər – qoz, fındıq, iydə ilə yanaşı, həm də meyvə quruları da qoyulur və şamlar yandırılır.

    İlaxır çərşənbələrlə bağlı ənənələr

    İlaxır çərşənbələr müxtəlif mərasim ənənələri ilə zəngindir. Ev adətləri ilə bağlı ən əsas adətlərdən biri ev təmizləmədir.

    Bu tipli yenilənmənin – təmizlənmənin əsas vasitələrindən biri üzərlikyandırmadı. Üzərlikyandırma Novruz mərasim kompleksində təmizlənmə – yenilənmə ilə bağlı icra olunan ayinlərdəndir. İnsanlar Novruz tonqalına üzərlik atar, bununla da ev-eşiyə, mal-qaraya, ev sakinlərinə yönəlmiş hər hansı mənfi nəzərin təsirini aradan qaldırarmışlar.

    İlaxır çərşənbənin və ümumiyyətlə, 4 çərşənbənin hər birinin ən ayrılmaz və əvəzolunmaz atributu tonqalqalamadır. Xüsusilə ilaxır çərşənbədə tonqal qalanır, insanlar “ağırlığım-uğurluğum bu odda qalsın” deyib onun üzərindən tullanırlar. Bu zaman nəğmələr də oxunur.

    Axır çərşənbənin əsas adətlərindən biri “qurşaqatdı” adətidir. Buna bəzi yerlərdə qurşaqsallama, şalsallama, baca-baca, yaxud nünnünü də deyilir. Məzmunu axır çərşənbə gecəsi evlərə papaq atıb, pay istəməkdir.

    İlaxır çərşənbənin ayinləri çoxdur. Bunlardan bəziləri səməni ilə bağlıdır. Onlardan biri də “səməni nəziri” adətidir. Qəlbində bir niyyəti olan adam böyük tabaqlara buğda töküb göyərtdirirdi. Sonra cücərtiləri əzib şirəsini çıxarır, şirəyə bir az su əlavə edib, iki-üç gün qaynadırdılar. Ona qoz-fındıq ləpəsi qatır, sonra xonça sinilərinə töküb yayırdılar. Xonçaları evə aparmayıb, həyətdə saxlayırdılar. Gecə yatmayıb niyyətin qəbul olması haqqında dua edirdilər. Səhər bişmişin dadına baxırdılar. Əgər bişmiş şirin çıxırdısa, demək, nəzir-niyyət qəbul olunub.

    “Barışıq” adəti çox mühüm adətdir və insanlar buna böyük əhəmiyyət verirlər. “Bayramlaşma” adəti isə çox geniş tərkibli mərasim aktıdır.

    Oyun ənənələri

    İlaxır çərşənbələrdə icra edilən oyunların bir çoxu heyvanlarla bağlıdır. Məsələn, “Xoruzdöyüşdürmə”, “İtboğuşdurma”, “Qoçdöyüşü” oyunları. “Xoruzdöyüşdürmə” oyunu Novruz bayramı günlərində, adından da göründüyü kimi, xüsusi cinsdən olan və xüsusi bəslənmiş xoruzların döyüşdürülməsidir.

    Novruz bayramının ən mühüm və geniş yayılmış oyunlarından biri “Yumurta döyüşdürmək”dir. Bu oyunda yumurtalar bir-birinə vurulur, sınan yumurta məğlub tərəf olur. Qeyd etmək lazımdır ki, bu oyun tarixən çox geniş yayılmış, kütləvi xarakter daşımışdır. Keçmişdə dövlət başçıları da bu oyuna biganə qalmamışlar. Burada döyüşdürülən yumurtalar iki dünyanın – qışla yazın, soyuqla istinin mübarizəsini nümayiş etdirməkdədir.

    Mətbəx ənənələri

    Novruz bayramının ənənələrindən də biri “Yumurta boyamaq” adətidir. İnsanlar ilboyu yumurta qaynadıb yeyirlər. Lakin Novruzda qaynanmış yumurtanı həm də boyayırlar ki, bunun da bayramla bağlı xüsusi mənası vardır. İlaxır çərşənbədə və Novruz bayramı günlərində qırmızı yumurta boyamaq adəti əcdadın və torpağın dirilməsi, canlanması, bir sözlə oyanma-dirilmə ayini ilə əlaqədar olan ən qədim təsəvvürlərlə bağlı olduğunu göstərir.

    Bayramın mərasimi simvolikası “Yeddi ləvin”, yaxud “Yeddi sin” adlanan adətdə xüsusi ifadə olunur. “Yeddi ləvin” yeddi növ yemək deməkdir. Yeddi növ yemək hazırlamaq və ya bayram süfrəsinə eyni hərflə başlayan yeddi ədəd bayram nəməri qoymaq adəti olmuşdur. Yeddi ləvində süfrəyə çörək, duz, üzərlik, kömür, güzgü, su və yumurta kimi yeddi növ yemək, nemət, əşya qoyulur. Bunların hər birinin öz mənası var. 7 müqəddəs rəqəmdir və dünyanın, kainatın birliyini, tamlığını ifadə edir. Bunun 7 növ ərzaqla ifadə olunması süfrənin simvolikası, ümumiyyətlə, yeməyin simvolikası ilə bağlıdır. Yəni Novruz süfrəsi də bayramın yaradılış ideyasına xidmət edir. Bayram süfrəsinə qoyulan 7 nemət artıq mərasimi məna daşıyır.

    Novruz falları

    “Qulaq falı”, “qapıpusma”, “qulaqpusma” adları altında qeyd olunan falabaxma Azərbaycanın hər bir bölgəsində geniş yayılmışdır.

    Axır çərşənbənin məşhur fallarından biri “üzüksalma” adlanır. “Bundan irəli ilaxır çərşənbədə ərgən qızlar bir otağa yığışıb dilək tası qurardılar. Ortalığa dərin bir mis qab qoyar, sonra hər qız öz üzüyünü həmin qabın içinə atardı. Üzükləri qabın içində iki-üç kərə qarışdırıb, balaca bir oğlan uşağını da gətirərdilər yığnağa. Uşağa başa salardılar ki: – Bax, indi biz növbə ilə bayatı oxuyacağıq. Hər dəfə bayatı oxunub başa çatanda, sən gedib tasın içindəki üzüklərdən birini götürərsən. Biz də baxıb görərik üzük kimindir. Bayatıdan sonra kimin üzüyü qabdan çıxarılsa, onun diləyi həmin bayatıdakı mətləbə yaxın bir axarda yozulardı.

    İlaxır çərşənbənin fallarından biri də güzgü ilə falabaxmadır. Məsələn, Naxçıvan və Dərələyəz bölgələrində ilaxır çərşənbədə qızlar əllərində güzgü tutarlar. Ayın şəkli düşər güzgüyə. Şəklin içində oğlan əksi görünsə, “sevdiyi oğlana gedər” deyərlər. Burada iki əsas element var: güzgü və ay. Məlumdur ki, güzgü ruhlar aləmi ilə bağlıdır. Bu halda oğlanın şəklinin güzgüdə görünməsi onun ruhunun görünməsi deməkdir. Ay obrazına gəlincə, onun oğlan obrazı ilə bağlılığı diqqəti çəkir.

    Ümumiyyətlə, Novruz falları say və məzmunca zəngindir. Bu fallar məzmunca maraqlı olmaqla yanaşı, bir sıra hallarda çox açıq şəkildə əski təbiət kultları ilə bağlı təsəvvürləri özlərində əks etdirir.

    Xalqımızın gözəl adət-ənənələrini özündə yaşadan İlaxır çərşənbəniz mübarək olsun!

    Mənbə: https://azertag.az/

  • Azərbaycanlı şairə-publisist Nəcibə İLKİN.”Şeirimin bahar gözü”

    Azərbaycan Yazıçılar və Jurnalistlər Birliklərinin üzvü, Azərbaycan Respublikası Prezidenti Təqaüd Fondunun təqaüdçüsü, “Azad qələm” ədəbi-bədii, ictimai-publisistik qəzetinin və “Ali Ziya” ədəbi-bədii, elmi-publisistik jurnalının təsisçisi və baş redaktoru

    Şeirimin bahar gözü,
    Yaşla dolub, kövrəlibdi.
    Yaz nəfəsli ürəyimdə
    Qış yenidən dirçəlibdi.

    Hər sözümün bənövşəsi,
    Qara xallı laləsi var.
    Vətən deyən dillərimin
    Göyə qalxan naləsi var.

    Misra-misra qocalıram,
    Kəlmə-kəlmə can verirəm.
    Şeir-şeir ucalıram,
    Vətən boyda qan verirəm.

    Sözlərimin soyqrımı,
    Dillərimdən asılıbdı.
    Qələm tutan əllərimi
    Gör kimlər daşa basıbdı.

  • Azərbaycanlı gənc xanım yazar Banu Muharremin şeiri “Kardeş Kalemler” dərgisində dərc olunub

    Qardaş Türkiyə Cümhuriyyətinin paytaxtı Ankara şəhərində fəaliyyət göstərən “Kardeş Kalemler” dərgisinin yeni sayında Azərbaycanın Mədəniyyət və Ədəbiyyat Portalının Baş redaktor müavini, Azərbaycanlı gənc xanım yazar Banu Muharremin “Türkiyəm, o günəş yenə doğacaq” adlı şeiri dərc olunub.

    Qeyd edək ki, “Mücrü” Nəşriyyatının “Proza” seriyasından işıq üzü görən “İlin hekayələri” nəsr toplusunda  “1.. 2.. 3.. 4” hekayəsi işıq üzü görmüşdü.

    Azərbaycanın Mədəniyyət və Ədəbiyyat Portalının Mətbuat xidməti və İctimaiyyətlə əlaqələr şöbəsi. 

  • “Arşın mal alan” operettası Marionet Teatrının səhnəsində

    Martın 18-25-də Bakı Marionet Teatrında Üzeyir Hacıbəylinin “Arşın mal alan” marionet tamaşası nümayiş etdiriləcək.

    AZƏRTAC xəbər verir ki, marionet tamaşası bir çox sevimli müğənni və aktyorlarımızın bənzərsiz ifaları ilə səsləndirilir.

    Tamaşanın quruluşçu-rejissoru və rəssamı Əməkdar incəsənət xadimi Tərlan Qorçu, musiqi aranjimançısı Cavanşir Quliyev və kukla rəssamları Elman Mirzəyev, Şamil Buksayev, İrma Kaadze, Elmira Abbaslıdır.

    Biletləri iTicket.az saytı və şəhərin kassalarından əldə etmək mümkündür.

    Mənbə: https://azertag.az/