Azərbaycanın Mədəniyyət və Ədəbiyyat Portalı

Day: Mart 17, 2023

  • Müstəqillik dövrünün ən irimiqyaslı incəsənət layihəsinə böyük maraq var

    Uşaq İncəsənət Festivalına qeydiyyat davam edir.Azərbaycan xalqının Ümummilli lideri Heydər Əliyevin 100 illik yubileyi münasibətilə Mədəniyyət Nazirliyi, Elm və Təhsil Nazirliyi və Heydər Əliyev Mərkəzinin birgə təşkil etdiyi Uşaq İncəsənət Festivalına qeydiyyat davam edir.

    16 mart tarixinədək müxtəlif şəhər və rayonlar üzrə 15 minə yaxın uşaq  qeydiyyatdan keçib.
    Xatırladaq ki, uşaq festivalı 21 nominasiya üzrə istedadına, bacarığına güvənən 6-17 yaş arası hər kəs qatıla bilər. Festival həm peşəkar, həm də həvəskar  kateqoriyalar üzrə üç yaş qrupunda (6-9 yaş, 10-13 yaş və 14-17 yaş) keçiriləcək.

    İştirakçıların qeydiyyatı 20 fevral – 30 mart tarixlərində www.uif.az internet saytı üzərindən aparılır.
    Əlavə məlumatları festivalın internet saytı, elektron poçtu, (050) 2880147 mobil, 147 qısa nömrələri, həmçinin festivalın rəsmi sosial şəbəkə hesabları vasitəsilə əldə etmək mümkündür:

    Rəsmi sayt – https://uif.az
    E-poçt – info@uif.az
    Facebook – https://www.facebook.com/uif.az
    Instagram – https://www.instagram.com/uif.az
    Twitter – https://twitter.com/uif_az
    Youtube – https://www.youtube.com/@uif_az
    Tiktok – https://www.tiktok.com/@uif.az

    Mənbə: https://culture.gov.az

  • Banu MUHARREM.”Türkiyəm O günəş yenə doğacaq!”

    Azərbaycanın Mədəniyyət və Ədəbiyyat Portalının Baş redaktor müavini

    Beləcə qocaltdıq qara torpağı..
    -əvvəl meyvə küsdü, sonra soxulcan.
    Atdıq addımlarla yara tapdağı,
    Bağrına can sərib ağladıq: ‘can.. can…’

    Bir şənlik dağıldı, bir ağı qaldı
    min ömrün yuyuldu toz şəhərciyi.
    Adsız kəfənlərin min dağı qaldı.
    İmtahan yoğurdu boz şəhərciyi?

    Mövsümlük dostlarım,necə usandıq.
    -nələri bitirdik hesabımızda…
    Neçə say itirdik, neçə qazandıq?!
    Ümidi diriltdik kitabımızda!?

    Boğazda yığılar, düyünlənər söz.
    Vəfasız dünyadır-başına uçar..
    Yusifi(Hz) quyudan çıxaran bir ‘döz!’
    Yerin altında da sənə qol açar.

    Əbədi yumulan çaxmaq gözlərin
    kimsəsiz naləsi göyləri yıxar…
    Türküm, quracaqdır Vətən-əllərin!
    Çıxar əllərini, torpaqdan, çıxar!

    (Hələ də kimlərinsə sağ qaldığına inanıram)

  • Banu MUHARREM.”Fərqli olanı sevdim hər zaman”

    Azərbaycanın Mədəniyyət və Ədəbiyyat Portalının Baş redaktor müavini

    Fərqli olanı sevdim hər zaman.
    Çiçəklərdən uzaq kaktusları sevdim.
    Qoxlamadım..
    Toxunmadım..
    Sevgi gözləmədi..
    Solub getmədi..
    Həmişə olduğu kimiydi..
    unutdum.. bəs o kim idi?!

  • Xəyalə SEVİL.”Üstümdə”

    “Gənc Ədiblər Məktəbi”nin müdavimi, Azərbaycan Yazıçılar Birliyinin (AYB) üzvü, Azərbaycan Respublikası Prezidenti təqaüd fondunun təqaüdçüsü, Azərbaycanın Mədəniyyət və Ədəbiyyat Portalının GƏNCƏ Bürosunun Rəhbəri

    Üstümdə

    Müharibədən qalib çıxmış

    Döyüşçü yorğunluğu.

    İçimdə

    Məzmunsuz bir boşluq.

    Ağlımda

    “Dəydimi bu müharibəyə?” sualı,

    -Yox.

    İnsanın ən təhlükəli vaxtı

    Məsumiyyətini itirdiyi vaxtdı.

    İndi durub düşünürəm,

    Öldürməsəydim məhəbbətini

    Neçə yaşı olacaqdı?

    Unutmaq da öyrənilən bir şeydi-

    Zaman lazımmış.

    Səni niyyət tutub

    Döydüyüm qapıdan

    Gələn bəd xəbər

    Alın yazımmış…

    Darıxıram, İlahi,

    Yoxluqdu, təklikdi.

    Bunun adı bir gün deyil,

    Bunun adı gündəlikdi.

  • Xəyalə SEVİL.”Səhər eyni, axşam eyni”

    “Gənc Ədiblər Məktəbi”nin müdavimi, Azərbaycan Yazıçılar Birliyinin (AYB) üzvü, Azərbaycan Respublikası Prezidenti təqaüd fondunun təqaüdçüsü, Azərbaycanın Mədəniyyət və Ədəbiyyat Portalının GƏNCƏ Bürosunun Rəhbəri

    Səhər eyni, axşam eyni,

    Əcəb axına düşmüşəm.

    Tanrı də atmışdı məni,

    Gördü yaxına düşmüşəm,

    Qıymadı.

    Götürdü basdı bağrına,

    Ağlamağa qoymadı.

    “Səbr”, – dedi.

    “Ürəyində bir sevgi var,

    Gözlərində gəzir”, – dedi.

    “Əsir”, – dedi, “əllərin,

    Kirit barmaqlarını.

    Bu ağ vərəq, bu taleyin,

    Yerit barmaqlarını”.

    “Hüzur”, – dedim,

    “Hüzur”, – dedim!

  • Arzu HÜSEYN.”Ən gözəl çiləm”

    Azərbaycan Yazıçılar Birliyinin üzvü, Prezident mükafatçısı, Azərbaycanın Mədəniyyət və Ədəbiyyat Portalının BAKI Bürosunun Rəhbəri

    Gözlərindən süzülüb axır gecənin nəmi,
    Udur balışlarımız ikimizin kədərin.
    Ah nə gözəl çilədir, beləcə sevmək səni
    Toxunmadan, dəymədən,
    fəqət dərindən-dərin.

    Eyni şəhərdə olmaq, eyni havanı udmaq,
    Eyni bağda, bağçada gəzişmək axşam çağı.
    Ah, nə gözəl çilədir, səni düşünüb yatmaq,
    Xəyalına boyamaq pəncərəni, otağı.

    Ünvanını bilmədən, yollarını tanımaq.
    Təsadüfən küçədə göz-gözə gəlmək də var.
    Ah, nə gözəl çilədir sənsiz də, sənin olmaq
    Ah, nə gözəl sehirdir sənə açan qapılar.
    Karıxır sözlərimiz hisslərimiz dinəndə,

    Qismətimdir gözünün zülmətində boğulmaq.
    Ah, nə gözəl çilədir dodaqların güləndə,
    Ölüb-ölüb, təzədən gülüşündə doğulmaq.

  • Arzu HÜSEYN.”Hər şey səni xatırladır”

    Azərbaycan Yazıçılar Birliyinin üzvü, Prezident mükafatçısı, Azərbaycanın Mədəniyyət və Ədəbiyyat Portalının BAKI Bürosunun Rəhbəri

    Hər şey səni xatırladır,
    Bu küçə də, bu döngə də.
    O ağacdan yola düşən,
    O kölgə də.
    Bu şəhər də, bu ölkə də,
    Qəm də səni xatırladır.

    Hər gün səni xatırladır,
    Vaxt, zaman da.
    Sahibi tərk edib gedən,
    o ünvan da.
    Yanımda əlimi sıxan,
    Bu adam da,
    Mənə səni xatırladır…

  • Nigar ARİF.”GEDƏK ÜZÜ KÜLƏYƏ?”


    Ay mənim dünənim, bugünki günüm,
    Sevəndən küsməzlər, başınadönüm,
    Puldan da kəsərlər, çörəkdən də adamı,
    Ümiddən kəsməzlər, başınadönüm…
    Təəssüf bürüyüb dörd bir yanımı,
    Ağlımdan keçənə şübhə asırsan,
    Sözlərim sinəmdən daşır çay kimi,
    Divar dilə gəlir, sənsə susursan…
    Hay-haray içində fikirlər keçir,
    İncik baxışların dönmür səs-küyə
    Heç bilmirəm nə deyim
    xoşuna gəlsin deyə,
    Daha bəsdir əzizim,
    Dur əlini ver mənə,
    Bunca uşaqlıq niyə?
    Yadındadı o mahnı?
    “ Gedək üzü küləyə”…
    Gedək üzü küləyə?…

  • Azərbaycanlı gənc xanım yazar Şəfa Vəliyevanın məqaləsi “Kardeş Kalemler” dərgisində işıq üzü görüb

    Qardaş Türkiyə Cümhuriyyətinin paytaxtı Ankara şəhərində fəaliyyət göstərən “Kardeş Kalemler” dərgisinin yeni 195-ci sayında  “Gənc Ədiblər Məktəbi”nin müdavimi, Azərbaycan Yazıçılar Birliyi Gənclər Şurasının və Azərbaycan Jurnalistlər Birliyinin üzvü, Prezident təqaüdçüsü, “İlin gənci” müfakatçısı, Azərbaycanın Mədəniyyət və Ədəbiyyat Portalının Baş redaktoru Gənc xanım yazar Şəfa Vəlinin məqaləsi işıq üzü görüb.

    Azərbaycanın Mədəniyyət və Ədəbiyyat Portalının Mətbuat xidməti
    və İctimaiyyətlə əlaqələr şöbəsi.

  • Azərbaycanlı yazıçı Coşqun Xəliloğlunun şeiri Kardeş Kalemler” dərgisində işıq üzü görüb

    Qardaş Türkiyə Cümhuriyyətinin paytaxtı Ankara şəhərində fəaliyyət göstərən “Kardeş Kalemler” dərgisinin yeni 195-ci sayında  Azərbaycan Yazıçılar Birliyinin üzvü, Azərbaycanın Mədəniyyət və Ədəbiyyat Portalının Qaradağ Bürosunun Rəhbəri, istedadlı yazıçı Coşqun Xəliloğlunun şeiri ərgisində işıq üzü görüb.

    Azərbaycanın Mədəniyyət və Ədəbiyyat Portalının Mətbuat xidməti
    və İctimaiyyətlə əlaqələr şöbəsi.