Şəfa VƏLİYEVA.Yeni şeirlər

sxv

“Gənc Ədiblər Məktəbi”nin müdavimi, AYB və AJB üzvü,
Prezident təqaüdçüsü, Gənclər müfakatçısı

* * *

biz sonuncu ayrılığın
sonuncu düşərgəsiyik…
indi burdan da ayrılıb
uzaqlara gedəsiyik…

hələ bitməyib yeni gün,
başlamayıb axşamçağı…
hələ ki, sevgimiz sürgün,
ölüm ömrə boyunbağı…

nə yaxşıdı, ölüm üçün
sonuncu rəqsi eləmək…
şedevrdi, özüm üçün
rekviem`i bəstələmək…

bax, bu ayrılıq dediyin,
yazır dünya tarixini…
bir barmağında oynadır,
Herakl`ını, Axil`ini…

sən də ki…
Nə bilim axı…
hələ vüsal axtarırsan…
utanmasan,
ayrılığın
havasına oynayarsan…

noyabr`ın ilk şeiri…
sənə söylədilərmi?
mənim ağlamağıma
adın yaman yaraşır…
sən də heç düşündünmü?
mənim dəli xəyalım
sənsizliyə alışır…

***
ağlat, sevdam,göz yaşım
koda düşüb
son zənglə…
bax, genetik yaddaşım
boyanıb yenə…
yenə sənli xatirələrlə…
***
heç deyən oldumu ki,
mənim ovuclarımda
ikimiz də ölmüşük…
ikimiz də bilirdik,
biz Nitsşe`ni sevəndə
Allahı öldürmüşük…