Azərbaycan Milli Elmlər Akademiyası Nizami Gəncəvi adına Ədəbiyyat İnstitutu Elmi Şurasının 17 dekabr 2018-ci il 15 saylı qərarı ilə AMEA-nın Nizami Gəncəvi adına Ədəbiyyat İnstitutunun mətbuat tarixi və publisistika şöbəsinin elmi işçisi, “Gənc Ədiblər Məktəbi”nin müdavimi, Azərbaycan Jurnalistlər Birliyinin Sumqayıt şəhər təşkilatının Gündəlik Analitik İnformasiya Agentliyinin və Azərbaycanın Mədəniyyət və Ədəbiyyat Portalının Tovuz bürosunun rəhbəri, Azərbaycan Yazıçılar Birliyinin (AYB) və Dünya Gənc Türk Yazarlar Birliyinin (DGTYB) üzvü, Azərbaycan Respublikası Gənclər və İdman Nazirliyinin “Gənclər mükafat”çısı, Azərbaycan Respublikası Prezidentinin Təqaüd Fondunun təqaüdçüsü, tanınmış gənc ədəbiyyatşünas-alim, istedadlı xanım yazar Gülnar Səmanın “Sözümüz sözdür” adlı publisistik məqalələrdən ibarət növbəti yeni kitabı 2019-cu ildə “Elm və təhsil” nəşriyyatı tərəfindən 352 səhifə həcmində, 100 torajla işıq üzü görüb. Kitabın elmi redaktoru filologiya elmləri doktoru, professor Asif Rüstəmli, rəyçi filologiya elmləri doktoru Elçin Mehrəliyevdir.
Kitabda Elçin Əfəndiyev, Vilayət Quliyev, Aqil Abbas, Rəşad Məcid, İbrahim İlyaslı, Zəlimxan Yaqub, Fikrət Qoca, Elçin İsgəndərzadə və s. şair və yazıçıların, gənc qələm sahiblərinin kitablarına həsr edilmiş məqalələr yer alıb.
Qeyd edək ki, kitabın üz qabığının fotoşəklinin müəllifi Azərbaycan Yazıçılar Birliyinin (AYB) və Dünya Gənc Türk Yazarlar Birliyinin (DGTYB) üzvü, Prezident təqaüdçüsü Nofəl Ümiddir.
Azərbaycanın Mədəniyyət və Ədəbiyyat Portalı Mətbuat xidməti