Üzündə xalqının böyük kədəri,
Xəyalında Vətən xatirələri.
Öldü yurdumuzun igidi, əri,
Qəbri qazılmadı öz torpağında.

Azərbaycan!-dedi o son nəfəsdə,
Bir xalqın həsrəti vardə bu səsdə.
Üçrəngli bayrağı başının üstə,
Öldü, o müqəddəs söz dodağında.

Ruhuna min rəhmət, Məhəmməd Əmin!
Yurdu qurtarmağa etmişdin əmin.
Apardın könlündə bu elin qəmin,
Yurdun dar günündə, yaman çağında.

Zamanın nə qanlı hökümləri var!
Könlümün inləyən çox simləri var…
Adını çəkməyə yoxdu ixtiyar.
Türksən, rahat yat Sən Türk torpağında,
Ruhun pərvaz etsin cənnət bağında.

1990