Azərbaycan Yazıçılar və Jurnalistlər Birliklərinin üzvü, Azərbaycan Respublikası Prezidenti Təqaüd Fondunun təqaüdçüsü, “Azad qələm” ədəbi-bədii, ictimai-publisistik qəzetinin və “Ali Ziya” ədəbi-bədii, elmi-publisistik jurnalının təsisçisi və baş redaktoru
Hörmətli təhsil naziri Emin Əmrullayev!
UNUTMAYIN!
Təhsilə qənaət edən dövlət gələcəyini itirir.
Təhsil xərc deyil, gələcəyə sərmayədir əslində.
Son illərdə təhsil sahəsində yaşanan problemlər cəmiyyətdə ciddi narahatlıq doğurur. Məktəblərdə keyfiyyət məsələləri, repetitorluğun geniş yayılması, ali təhsilin əlçatmaz hala gəlməsi və müəllimlərin üzləşdiyi çətinliklər fonunda səsləndirilən “dünyanın heç bir yerində pulsuz təhsil yoxdur” fikri haqlı olaraq müzakirələrə səbəb olur.
Əlbəttə, heç bir xidmət tamamilə havadan yaranmır. Məktəblərin saxlanılması, müəllimlərin əməkhaqqı, dərsliklərin hazırlanması və təhsil infrastrukturunun qurulması müəyyən maliyyə vəsaiti tələb edir. Lakin məsələ ondadır ki, bu vəsaiti kim ödəyir. İnkişaf etmiş ölkələrin əksəriyyətində vətəndaşlar vergilər ödəyir, dövlət isə həmin vəsait hesabına əhalinin təhsil almaq hüququnu təmin edir. Başqa sözlə, təhsil dövlət tərəfindən maliyyələşdirilir və vətəndaş üçün əlçatan olur.
Təhsil sadəcə fərdin deyil, bütöv cəmiyyətin inkişafına xidmət edir. Savadlı müəllim, bacarıqlı həkim, peşəkar mühəndis, vicdanlı hüquqşünas və ya alim yetişdirmək üçün dövlət təhsilə investisiya qoymalıdır.
CƏNAB NAZİR!
Təhsilə ayrılan vəsait xərc deyil, gələcəyin qurulmasına yönəlmiş sərmayədir.
Əgər keyfiyyətli təhsil yalnız maddi imkanı yüksək olan insanların əlində cəmləşərsə, cəmiyyətdə sosial bərabərsizlik daha da dərinləşər. Kənddə yaşayan istedadlı bir uşaqla şəhərdə yaşayan imkanlı ailənin övladı arasında fərq yaranar. Halbuki təhsil insanlara bərabər imkan yaratmalı, istedadın və zəhmətin önə çıxmasına şərait yaratmalıdır.
Bu gün ölkənin ən böyük ehtiyacı savadlı, düşünən, araşdıran və vətəninə faydalı vətəndaşlardır. Belə vətəndaşlar isə təsadüfən yetişmir. Onlar güclü təhsil sistemi vasitəsilə formalaşırlar. Təhsilin əlçatanlığını azaltmaq yox, əksinə, onu daha keyfiyyətli və hər kəs üçün daha əlverişli etmək dövlət siyasətinin əsas istiqamətlərindən biri olmalıdır.
CƏNAB NAZİR!
Unutmayaq ki, məktəb tikmək həbsxana tikməkdən daha ucuzdur. Təhsilə qoyulan hər manat gələcəkdə cəmiyyətə qat-qat artıq fayda verir. Buna görə də təhsil məsələsinə yalnız maliyyə gözü ilə deyil, milli inkişaf, insan kapitalı və dövlətin gələcəyi prizmasından baxmaq lazımdır.
Çünki təhsil olmayan yerdə inkişaf da olmur. Təhsilin zəiflədiyi cəmiyyətdə gələcək də zəifləyir.
SONDA UNUTMAYIN HÖRMƏTLİ NAZİR!
Təhsil xərc deyil, millətin gələcəyidir!
Bir cavab yazın