Hal–hazırda dünyanın hər tərəfində böyük bir qarışıqlıq hökm sürür. Vəziyyətin nə qədər ciddi olduğunu mediada yer alan xəbərlərdən də görə bilərik. Hər gün yüzlərlə insan öz yurdlarını tərk etmək məcburiyyətində qalır, yüzlərlə insan qətlə yetirilir. Gənc qızlar, qadınlar zorakılığa, uşaqlar təcavüzə məruz qalır. Atılan zəhərli silahlar nəticəsində körpə uşaqlar göz görə-görə can verirlər. Zülm elə bir həddə çatıb ki, hamilə qadınların qarınlarından uşaqları kəsilərək çıxarılır, insanlara dəhşətli işgəncələr verilir. Bunu edənlər isə heç çəkinmədən həmin görüntüləri çəkib paylaşırlar. Diqqət etmək lazımdır ki, ən çox təzyiq müsəlmanlara göstərilir.
Dünya isə İslam coğrafiyasında yaşanan bu zülm qarşısında, demək olar ki, səssiz qalır.
Bəzi ölkələr müsəlmanlara edilən bu zülmə və zorakılığa göz yumur. Sanki bu hadisələr heç baş vermir. Bu ölkələrin televiziya kanalları müsəlmanların insanlıqdan kənar işgəncə və zülmlərə məruz qaldıqlarını yayımlamaq, insanları bu yöndən maarifləndirmək və öz vəzifələrini yerinə yetirmək əvəzinə, gün boyu lüzumsuz proqram və seriallarla insanların vaxtını səmərəsiz şəkildə keçirmələrinə səbəb olurlar. Bəzi ölkələr yaşanan zülmü, haqsızlığı sadəcə gündəlik xəbərlər kimi yayımlamaqla kifayətlənirlər.
Bəzi ölkələr bir tərəfdən səssiz davranır, digər tərəfdən də bu hadisələrdə xarici qüvvələri günahlandırırlar. Halbuki, hər şeyin səbəbkarı və gunahkarı kimi xarici qüvvələri göstərmək və ya onları lənətləmək doğru deyil. Çünki heç bir halda məsələnin həll yolu ortaya qoyulmur. Heç kəs ”nə edək ki, insanlıq bu zülmdən qurtulsun”- deyə cəhd göstərmir.
Bu hadisələr qarşısında müsəlmanlar əvvəlcə özlərinin harada yanlış etdiklərini araşdırmalıdırlar. Müsəlmanlar Suriya və digər ölkələrdə olduğu kimi, islam tarixində hələ görülməyən bir qiyama uğrayarkən, buna qarşı nəyə görə heç bir reaksiyanın olmadığını dərindən düşünməlidirlər …
“Qardaş və Ümmət“ olmaq
Həqiqətən, bu, vahid bir din olaraq sizin (hamınızın) dininizdir. Mən də sizin Rəbbinizəm. Elə isə Mənə ibadət edin! (Ənbiya surəsi, 92)
Möminlər həqiqətən də qardaşdırlar. Elə isə qardaşlarınızı barışdırın və Allahdan qorxun ki, sizə rəhm edilsin. (Hucurat surəsi, 10) ayələri ilə Rəbbimiz müsəlmanlar arasındakı birliyə diqqət çəkir.
Bir müsəlmanın əsil hədəfi Alahın rızasını, rəhmətini və cənnətini qazanmaqdır. Bunun üçün də Qurana və Peyğəmbərimizin (s.ə.v) göstərdiyi yola tabe olmaq lazımdır.
Qurana və hədislərə nəzər salsaq görərik ki, burada bir-birindən fərqli müsəlman qruplarından deyil, tək bir ümmətdən, qardaşlıqdan bəhs edilir. Bu qardaşlığın, yəni birliyin pozulması və ayrılığın yaranması isə təbii ki, Qurana ziddir və Quranda bu təxribat olaraq bildirilir. Hal-hazırda dünyada yaşanan bu vəziyyət də elə Quranda bildirildiyi şəkildədir. Yəni müsəlmanlar arasında ixtilaf var. Dolayısı ilə müsəlmanlar yenidən ümmət olmağa, qardaşlığa, birliyə niyyət etməli və bu yöndən ciddi şəkildə çalışmalıdırlar.
Müsəlmanların birlik olmalarının vacibliyini bildirən ayələrdən bəziləri bunlardır:
Kafirlər də bir-birinə dostdurlar. Əgər siz bunu etməsəniz (bir-birinizə yardımçı olmasanız), yer üzündə fitnə və böyük bir fəsad baş verər. (Ənfal surəsi, 73)
Allaha və Onun Elçisinə itaət edin, bir-birinizlə mübahisə etməyin, yoxsa ruhdan düşər və zəifləyərsiniz. Səbr edin, çünki Allah səbr edənlərlədir…. (Ənfal suresi, 46)
Peyğəmbərimizin (s.ə.v) müsəlmanların bir-birləri ilə nəinki savaşmaq, bir-birlərinə buğz belə etməməsini, düşmənçiliklərin tezliklə ortadan qaldırılmasını tövsiyə etdiyi bəzi hədislər isə bunlardır:
Bir-birinizə buğz etməyin. Bir-birinizə həsəd aparmayın. Bir-birinizə arxa çevirməyin. Bir-birinizlə əlaqəni kəsməyin. Ey Allahın qulları qardaş olun… (Buxari- Müslim- Riyazüssalihn s. 930)
Möminlər bir-birlərini sevməkdə, bir-birlərinə mərhəmət etməkdə və bir-birlərini qorumaqda bir bədənə bənzəyirlər. Bədənin bir üzvü xəstə olduğu zaman, digər üzvlər də bu səbəbdən yuxusuzluğa və qızdırmalı xəstəliyə tutularlar. (Buxarî, Salât, 88; Müslim, Birr, 65)
Ayə və hədislərdəki hökm, əslində, çox aydındır. Müsəlmanlar nə olursa olsun ayrılığa düşməkdən çəkinməli və hər zaman haqqın və ədalətin tərəfində olmalıdırlar. Bu, nəticədə məzlumların qorunmasına və zülmə qarşı mənəvi bir birliklə həmrəyliyə və toplu şəkildə fikri mübarizə aparmasına səbəb olacaqdır. Xüsusilə də, əgər söhbət müsəlmanlardan gedirsə, Şura surəsinin 39-cu ayəsində olduğu kimi inananlar “O kəslər üçün ki, haqsızlığa məruz qaldıqda intiqam alırlar.” əxlaqına uymalıdırlar.
Şəxsi mənfəətləri üçün İslam Birliyini istəməyənlər böyük qəflətdədirlər.
Dünyada bu qədər zülm və işgəncə varkən ancaq öz rahatlığını düşünüb bu zülmə biganə olanlar İslam Birliyini istəməyənlərdir. Məhz bu yanlış düşüncəni düzəltmək, İslam Birliyinin vacibliyini izah etmək digər müsəlmanların məsuliyyətidir. Çünki İslam Birliyini istəməyənlər:
-Öz ölkələrində təzyiq görmədən, maddi cəhətdən sıxıntı çəkmədən rahat yaşaya bilərlər, amma Suriyada insanlar aclığa məhkum olunaraq şəhid edilirlər…
-O insanlar mənfəətlərinə zərər gələcəyini düşünərək “İslam birliyinə ehtiyac yoxdur” deyə bilərlər. Amma Myanmada müsəlmanlar öz evlərində evləri ilə birgə yandırılırlar. Şərqi Türküstanda müsəlmanlardan heç bir xəbər yoxdur …
-O insanlar İslam Birliyinin vacibliyini görməyə bilərlər. Amma məzlumlar “Rəbbim, bizə xilaskar göndər” deyə sabah-axşam dua edirlər …
Buna görə də müsəlmanların şövqünü və həyəcanını qıran, İslam Birliyinə yanaşmayan insanlara bu davranışın nə qədər yanlış olduğunu izah etmək lazımdır. İslam Birliyinin vacibliyini xatırlatmaqla müsəlmanların birlik halında olmaları üçün ciddi əmək sərf etmək çox əhəmiyyətlidir.
Bunu necə edə bilərik?
Bu, təbii ki, Quran əxlaqının öyrədilməsilə, elmi dəlillərlə sağlam imana vəsilə olan işlər görməklə, yəni öyrətməklə mümkündür. İnsan yavaş-yavaş öyrəndiyi halda şüuru açılar, eqoistlikdən qurtular, ayələri başa düşər və Quran əxlaqını yaşamağa başlayar.
Buna görə də hərtərəfli fikri mubarizə ilə, televiziya, kitab və ya jurnallarla İslam Birliyinin əhəmiyyətinin və vacibliyinin səbəbi izah edilməlidir. Müsəlman ümməti yenidən canlanmalıdır. İslam Birliyinin əsasını təşkil edən şəvqət sadəcə müsəlmanlara deyil, eyni zamanda bütün dünyaya sülh və hüzur gətirəcəkdir. Çünki İslam Birliyi dilindən, dinindən, inancından, irqindən asılı olmayaraq hər kəsi qucaqlayan və hər kəsin bu birlik altinda güvən içində yaşayacağı, dünyada ədaləti təmin edən bir birlik olacaqdır .
Firuzə HƏSƏNZADƏ