Yanvarın 21-də Xəzər Televiziyasında canlı olaraq, yayımlanan “5-də 5” verilişinin növbəti buraxılışı gənc fəal nəslin istedadlı nümayəndələri arasında keçirilən şeir müsabiqəsinə həsr olunub.
Respublikanın müxtəlif bölgələrində yaşayıb, bədii yaradıcılıq fəaliyyəti ilə məşğul olan yeni nəsil Azərbaycan gəncliyinin nümayəndələri Zaur Kamalın aparıcısı olduğu verilişin yeni buraxılışında iştirak ediblər.Müxtəlif illərdə qələmə aldıqları şeirləri tamaşaçılar üçün səsləndiriblər.Sonra peşəkar münsiflər heyəti tərəfindən qəbul edilmiş qərara əsasən, müsabiqəni üç iştirakçı tərk edib.
Müsabiqənin şərtlərinə görə, hər həftə müsabiqəni üç iştirakçı tərk etməlidir.
Birinci və ikinci yerləri tutan iştirakçılar isə növbəti mərhələyə vəsiqə qazanırlar.
Tanınmış şair Vahid Əziz və Əməkdar artist Könül Xasıyevadan ibarət münsiflər heyətinin üzvləri tərəfindən qəbul edilmiş qərara əsasən, Yeni nəsil Azərbaycan gəncliyinin istedadlı nümayəndəsi, Azərbaycan Jurnalistlər Birliyi Sumqayıt şəhər təşkilatının elektron orqanları Gündəlik Analitik İnformasiya Agentliyinin və Azərbaycanın Mədəniyyət və Ədəbiyyat Portalının Baş redaktor müavini, Bakı
Slavyan Universitetinin Yaradıcılıq fakültəsinin II tələbəsi, Azərbaycan Respublikası Mədəniyyət və Turizm Nazirliyi ilə Azərbaycan Yazıçılar Birliyinin birgə layihəsi olan “Gənc Ədiblər Məktəbi”nin müdavimi, Dünya Gənc Türk Yazarlar Birliyinin üzvü, şairə-jurnalist-publisist Ülkər Dəniz bu həftənin qalibi elan olunub və növbəti mərhələyə vəsiqə qazanıb.
Qeyd edək ki, Xəzər Televiziyasında bir neçə həftədir ki, canlı yayımlanan “5-də 5” verilişinin növbəti buraxılışı gələn həftənin cümə axşamı keçiriləcək.
Gülnarə ŞÖHRƏDDİNQIZI,
“Möhtəşəm Azərbaycan”