ÜNVANIN EYNİDİ YURDLA, VƏTƏNLƏ
Sənin bu torpağa tökülən qanın,
Torpaqda çiçəklər, güllər bitirdi.
Sənin bu torpağa qoyulan canın,
Torpağa, millətə şərəf gətirdi.
O, güllər, çiçəklər torpağa bəzək,
Xəbər verir sənin çiçək qoxundan.
De, necə toxunaq, de, necə üzək,
Oyada bilmərik səni yuxundan.
Şəhidlik zirvəsi qazanan igid,
Əbədi həyata sən addım atdın.
Torpaq vətən olmaz, olmasa şəhid,
Canınla, qanınla vətən yaratdın.
Körpənin, yaşlının dilindəsən, sən,
Gələcək nəsillər səni anacaq.
Sən varsan, yurdunda, elindəsən, sən,
Azadlıq çırağı sənlə yanacaq!
Başlar üstündəsən, bayrağımdasan,
Ayım, həm ulduzum parlayır sənlə.
Adınla hər türlü növrağımdasan,
Ünvanın eynidi yurdla, vətənlə!
07. 04. 2016