Ankaranın Keçiörən bələdiyyəsinin təşkilatçılığı ilə keçirilən 7-ci Beynəlxalq Ramazan Festivalı çərçivəsində Azərbaycan gecəsi təşkil olunub. Bu münasibətlə bələdiyyənin təşkilatçılığı və Türkiyədəki səfirliyimizin dəstəyi ilə festivalın keçirildiyi sahədə qurulan “Azərbaycan evi”nin açılışı olub.
Açılış mərasimində səfirliyimizin əməkdaşları, Ankaradakı diplomatik nümayəndəliklərin rəhbərləri, QHT, KİV, ölkə ictimaiyyətinin təmsilçiləri, eyni zamanda Sumqayıt Bələdiyyəsinin sədri Sultan Əsədov iştirak ediblər.
Festivalda ölkəmizi Sumqayıt şəhər N.Nərimonov adına mədəniyyət mərkəzinin muğam üçlüyü təmsil edib. Bir-birindən maraqlı musiqi nömrələri ilə çıxış edən musiqiçilərimiz gecədə əsl bayram coşqusu yaşadıb. Əllərində iki qardaş ölkənin dövlət bayraqlarını dalğalandıran iştirakçılar Azərbaycan-Türkiyə qardaşlığına olan tükənməz sevgi və məhəbbətlərini müxtəlif şüarlarla ifadə ediblər. Muğam qrupunun ifası türkiyəli qardaşlarımız tərəfindən yüksək qiymətləndirilib.