Utancaq sevgilitək, ilhamım gecə gəlir,
Mən ilhamıma yaram, ilhamım da, yar mənə.
Mən sözü də sevirəm, yarı sevdiyim kimi,
Məni uca tutdular, verdilər vüqar mənə.
Hər sözü öz yerində, söyləyənə min əhsən,
Sözün özü eylədi, bax bunu iqrar mənə.
Qaynayanda sözüm də, bulaq kimi sinəmdə,
Ruhum göylərdə gəzir, dayanır qahmar mənə
Şam kimi əriyirəm, hər sözün üstündə mən,
Çünki ilhamım edir, hər vaxt etibar mənə.
Ölürəm, dirilirəm bir sözüm söz olunca,
Sözü boş buraxmıram,o olur şikar mənə.
Minnətdaram təbimə, məni üzü ağ etdi,
Mən onu əziz tutdum, o da xoş rəftar mənə.
Poladam, sədaqətlə, sözün xidmətindəyəm,
Sözün də sevgilimtək, çox inamı var mənə.
13.11.2016.