Ölüm mənə vız gəlir,
Mən ömürdən qorxuram.
Sükutu kiridirəm,
Səs-səmirdən qorxuram,
Bu düyünlər, bu sirrlər,
Hisslərimi əzirlər…
Pambıqla baş kəsirlər,
Mən dəmirdən qorxuram.
Dünya cığal, qəlbqıran,
İti qurda qısqıran…
Çoxluca su aparan,
Bu xəmirdən qorxuram.
Məramımı ləngidən,
Hövsələmi təngidən,
Yollarımı səngidən,
Bu səbrdən qorxuram.
Sevinc dərdə əriyir,
Təsəllilər kiriyir…
Cəmlər birdən törəyir,
Mən O Birdən qorxuram