Azərbaycan Yazıçılar və Jurnalistlər Birliklərinin üzvü,
“İctimaiyyət və təhsil” qəzetinin təsisçisi və baş redaktoru
XƏBƏRİN VAR…
…Xəbərin var? Gecələri,
Səninlə-sənsiz yatıram?
Qaranlığa, zülmətlərə,
Səninlə-sənsiz batıram?
Xəbərin var, gözlərimin
Mirvariləri daşlıdı.
Xəbərin var?!
Bəyaz simam, yanaqlarım da yaşlıdı.
Gəl sevgilim, coşa-coşa,
Ruhda sevgi daşa-daşa,
Gəl qovuşaq, biz baş-başa.
Məni soruş baxışlardan,
Səni gəzən yoxuşlardan,
Sərsəmi uçan quşlardan…
…Xəbərin var?!!
Gecələri səninlə-sənsiz yatıram?!
Qaranlığa zülmətlərə,
Səninlə-sənsiz batıram?!
ÇARƏSİZ QADIN
(Şaxtalı, soyuq havada təsirlənib yazmışdım)
…Gecə düşür, çöl soyuq,
Şaxtadan bəzək düşüb,
Naxışlı, oyuq-oyuq..
Bir qadın gördüm bu an,
Dedi ki, “carəsizəm…
Neçə şikayət etdim,
Bunu kimə söyləyim?
İmkanım yox, işim yox,
Bədbaxt canım, neyləyim?”
Bəlkə də bəxtin şamı,
Əvvəlki tək yanmayır.
Məhəbbət bülbülləri,
Səsinə oyanmayır.
Bəlkə də Uca Tanrı
Səni adam sanmayır.
Gedirsən soyuq gecə,
Səni hara aparır?!.
İmkansız xəyalların,
Səni səndən qoparır.
Baxırsan boş cibinə,
Dünya sənə dar gəlir,
Evdəki körpələrə,
“Ananızam” demək də,
İnan sənə ar gəlir!
Eşit, çarəsiz qadın,
Onsuz da sən anasan,
Ucadır sənin adın…
Allah açsın yolunu,
Var etsin əl-qolunu.
Onsuz da bu dünyada
Kimsə bilmir sonunu.
İnsanlıq da dəyişib,
Geyib vəhşət donunu.
Kimsə bilsə sonunu,
Gözü qan-yaş ağlayar,
Ürəyi kösövləyər,
Yara qaysaq bağlayar.
Eşit, çarəsiz qadın!
Həyat özü onsuz da,
Acı doyduran deyil.
Vəhşət içində dünya,
Belə də qalan deyil…!!!!!