NƏ LAZIM
Yaxşını vaxtında qorumuruqsa,
Ölümünə tərif, çələng nə lazım.
Əyrinin yolunu düz bağlamırsa,
Yalana bürünmüş mələk nə lazım.
Ümidlə keçirik bahara qışdan,
Arzu göyərdirik əməldən , işdən,
Halal qazancınız çıxırsa daşdan,
İanə verilmiş çörək nə lazım.
Nadan öz sözünü , yerini bilməz,
Dayazı bəyənməz , dərini bilməz,
Öyünər , xeyrini-şərini bilməz,
Görməyən gözlərə eynək nə lazım.
Demə bu dünyanın işləri kəmdir,
Bərabər bölünmüş sevincdir , qəmdir,
Yaxşılıq , yamanlıq bir ömrə cəmdir,
Pozma tarazlığı , ələk nə lazım.
Düz yolla nail ol düz məqsədinə,
Quş ol uç , qəvvas ol üz məqsədiə,
Halallıqla yetiş öz məqsədinə,
Ağıl olan yerdə kələk nə lazım?
BORCUNU QAYTAR
(Oğlum Babəkə)
Mən sənə Babəkin adını verdim,
Bu ad Svalana, Kəpəzə taydır.
Dünəndən bu günə uzanan dərdim,
Babamdan oğluma mirasdır, paydır.
Bu adın taleyi doğmadır mənə,
Onun qeyrətini, odunu qoru.
Bürünmə bu adın isti kürkünə,
Qanında qaynasın kişi qüruru.
Tarixin dolanbac cığırlarından,
Keçibdir haqq kimi, ədalət kimi.
Mən sənə vermişəm bu xoşbəxtliyi,
Ulu nəslimizdən əmanət kimi.
Səhl Sumbatların gədələrindən,
Satqından, yaltaqdan qoru bu adı.
“Dostun” böhtanından, hədələrindən,
Riyadan, qılıqdan qoru bu adı.
Bu ad yaddaşındır, bəzəyin deyil,
İntiqam yaddaşın, qisas yaddaşın.
O Bəzz qalasında çalınan təbil,
Döyüşə səsləyən kompas yaddaşın.
Qəfil xəyanətin yarası dərin,
Hələ də qövr edir canımda, oğul.
Yersizə yerini göstərən ərin,
Atəşi dolanır qanımda, oğul.
Tər çiçək kimidir köhnə yurdumuz,
Hələ şirə çəkir bal arıları.
Bu təndir yurdumuz, təknə yurdumuz,
Doydurub nə qədər ac qarınları.
Yiyəsi yoxdursa qeyrətli, mətin,
Vətənin dərdləri yetim qalacaq.
Yatsa oğulları bir məmləkətin,
Xalqı isidəmməz nə od, nə ocaq.
Məslək səngərində, el keşiyində,
Gecəli-gündüzlü ayıq dur, ayıq!
Dədə-babaların yurd beşiyində,
Hələ nəsil-nəsil yaşamalıyıq.
Daşıdığın adın zəhmi, vüqarı,
Üstündə dağ yükü dayanır hələ.
Dalğalı, tufanlı ümmanlar yarıb,
Bu nəhəng gəmini çatdır sahilə.
Sənə borc verilib bu ad, bu şərəf,
Vətənə oğulluq borcunu qaytar.
Haqqı tapdalanmış Azıərbaycanın,
Bütövlük adında tacını qaytar.