Qədrini bil, hər an qədir bilənin,
Səsləyəndə harayına gələnin..
Can-can deyib, hər üzünə gülənin
Sən məbadə, tez eşqinə düşəsən.
Hər gözəldən əhdə sadiq yar olmaz,
Əsli halalzadə eldə xar olmaz.
Ərdən ,,boşanmış,,dan vəfadar olmaz,
Könül, düşsən qız eşqinə düşəsən.
Acı sözlə hər yetəni dalama,
Şirin dillə ,,əleyk..,, söylə salama.
Bayquş olub viranədə ulama,
Səməndər tək köz eşqinə düşəsən.
Yağsa da başına hey narın-narın,
Uyma hiyləsinə yağışın, qarın.
Zatında paklıq var nazlı baharın,
Gül-çiçəkli yaz eşqinə düşəsən.
Mais Təmkin, xoş ilhamla yarat, qur,
Günəş kimi ömürlərə çilə nur.
Boş, mənasız kəlmələrdən kənar dur,
Hikmət dolu söz eşqinə düşəsən!