Yenə gəldim oğurluğa,
Ömürdən gün oğurladım.
Yenə darıxdım səninçün,
Oğruluğu doğruladım.
Gün adi gün deyildi ki,
Bir ömürə tən günüydü.
İki eşq dolu ürəyin
Həsrəti bitən günüydü.
Ömürdən gün oğurladım,
Günaha batdım, nə gözəl.
Pozdum alnımın yazısın,
Arzuma çatdım, nə gözəl.
Məni gözəl hisslərinə
Əsir etdiyinçün sağ ol!
Mənə hər dəfə bir başqa
Təsir etdiyinçün sağ ol!