Mən öz qardaşıma mehman gələndə
Bir qələm, bir dəftər, bir can gətirdim.
Bir şair könlünün arxalandığı…
Ləkəsiz, boyasız vicdan gətirdim.
Ucuz tutmasınlar bu sovqatımı,
Hissimi, duyğumu, ehsasatımı…
Mən öz varlığımı, öz həyatımı
Doğma qardaşıma qurban gətirdim.
Ürək daş deyildir, bir parça ətdir,
Bəs onu yaşadan hansı qüdrətdir?
Bir arzu, bir ümid, bir məhəbbətdir,
Mən o məhəbbətdən nişan gətirdim.