Özüm də bilmirəm nələr edirəm,
Bir yaz yağışı tək kükrəyir içim.
Bilmirəm özümə gəlim, danışım,
Bilmirəm susaraq özümdən keçim.
Özüm də bilmirəm nələr edirəm,
Qasırğa qoparan küləklər kimi,
Son kərə ümidlər qopur ürəkdən,
Yarımçıq arzular diləklər kimi.
Özüm də bilmirəm nələr edirəm,
İçimdə yağışlar sellənir daşır.
Bu qüssə, bu kədər mənə sus deyir,
Yerlər-göylər isə mənnən danışır.