Azərbaycan Yazıçılar və Jurnalistlər Birliklərinin üzvü,
“İlham çeşməsi” qəzetinin təsisçisi və baş redaktoru
QARABAĞIM
Qəlb sızladan, can ağladan,
Hönkürdüb kaman ağladan,
Hər gün bizə qan udduran,
Ağlayan “Şikəstəm”, ağım,
Qarabağm, Qarabağım.
Dövranımız qara gəlib,
Neçə təzə yara gəlib,
Yağı bir gör hara gəlib,
Əsir sənsiz əl-ayağım,
Qarabağım, Qarabağım.
Susub bağların bülbülü,
Yad dərir Xarıbülbülü,
Kim açacaq bu müşkülü,
Həsrətdən alışır bağrım,
Qarabağım, Qarabağım.
Ayrılığa dözmür ürək,
Hanı o bağ, o gül-çiçək,
Zirvələrdə çaxır şimşək,
Əsirdi dağım, yaylağım,
Qarabağım, Qarabağım.
Əldən vermişik fürsəti,
Səsləyən yox bu milləti,
Gəlin oyadaq qeyrəti,
Gözləyir doğma torpağım,
Qarabağım, Qarabağım.
PAYIZ HAVASI
Əsir acı küləklər,
Gəlir soyuq boran, qar,
Gözümüzü açınca,
Köçüb getdi durnalar.
Hələ yaza çox qalıb,
Mürgüləyir ümidlər.
Arx üstündə titrəyir,
İndi çılpaq söyüdlər.
Hanı uca dağlarım,
Sığınam qucağına,
El-oba həsrət qalıb,
İsti od-ocağına,
Ayrılıq nə ağırdı,
Halıma ağlayan yox,
Hələ yaram qan verir,
Onu bir sarıyan yox.
Neçə yaz, payız ötdü,
Tapılmadı itən də.
O qədər Vətən dedik,
Yaddan çıxdı Vətən də.