Axıb qanla qəlbə dolan.
Bir nəğmədir bu şeir.
Ruhumuza sözlər ilə.
Bir döymədir bu şeir.
Ürək dərdi bölür onla.
Gah dirilir, ölür onla.
Sevgisini öyür onla.
Bir aləmdir bu şeir.
Məhəbbətin tövhəsidir.
Qəlbimizin lövhəsidir.
O, sevginin zirvəsidir.
Bir gövhərdir bu şeir.
Sevgi qanad salıb onda.
Ayrılmayıb qalıb onda.
Qəlb xəyala dalıb onda.
Bir qəhərdir bu şeir.
Ağ vərəqin tək bəzəyi.
Sevənlərdi dərdi-səyi.
Vurur sevgiylə ürəyi.
Bir qələmdir bu şeir.
Güc verir yazan biləyə.
Sanki arxadır kürəyə.
Kədər dolu hər gecəyə.
Bir səhərdir bu şeir.