Bir dost sual verdi : – Məhəbbət nədi?
Dedim : – Damarımda qandı məhəbbət.
Bunu dərk etməyən kəs divanədi,
Həm ruhdu, həm də ki, candı məhəbbət.
Bostanda bəhərdi, ağacda bardı,
Qəzəldi, muğamdı, kamandı, tardı .
Fərhadla birlikdə dağları yardı,
Kərəmlə birlikdə yandı məhəbbət.
Qalib deyir, bir toy, büsat eşqidi,
Mətanət, dəyanət, səbat eşqidi.
Kiminə ömürlük həyat eşqidi,
Kiminə ötəri andı məhəbbət.