Deyirəm, o qızın gözəl rəsmini,
İlahi, təzədən çək mənə göndər.
Bir kimsə görməsin o nur çöhrəni,
Gizlət insanlardan, tək mənə göndər.
Ol başım üstündə bir sayə kimi,
Sevgini bəxşiş ver, sərmayə kimi.
Sevgi məktubunu bir ayə kimi,
Bir parça kağıza bük, mənə göndər.
Yenə də əllərim açılıb göyə,
Ürəyim hey istər qapını döyə.
O qızla bir yerdə islanım deyə-
Mərhəmət yağışın tök, mənə göndər.
Təmkini məmnun et, bu xoş diləkdən,
Qoyma nisgil qala sevən ürəkdə.
O cənnət bağında güldən, çiçəkdən,
O qıza verməkçün ək, mənə göndər.
Deyirəm, o qızın gözəl rəsmini,
İlahi, təzədən çək mənə göndər.