Day: May 20, 2023

Azərbaycanın Mədəniyyət və Ədəbiyyat Portalının Baş redaktoru, Azərbaycan Yazıçılar və Jurnalistlər Birliklərinin üzvü.

Ən böyük oxucun mənəm, ay SONA!

Azərbaycanın şairəsi, qələm dostum Sona İNTİZARa!

Şehli çəməndə də güllər dil açar,
Sevənlər bir kərə HAQQA yol açar,
Toyda, nişanda da dostlar qol açar,
Dağlara ələnən çənəm, ay SONA!

Kotan da çevrilib xışa dönməsin,
Bahar gözləsə də, qışa dönməsin,
Arzular qanadlı quşa dönməsin,
Sünbüldə cücərən dənəm, ay SONA!

Bəndəyəm, hər dəfə qələt eylədim,
ALLAHdan bir kərə hacət eylədim,
Mən dərddən yazmağa adət eylədim,
Dünyanın dərdinə tənəm, ay SONA!

Mənim düşüncəmdə qəbir, başdaşı,
Unutmaz dostları şair yaddaşı,
Qələm yanağından tökər göz yaşı,
Kim dedi, dünyada şənəm, ay SONA?!

Xoşbəxtəm, yaşadım söz-adlarla mən,
Gərək ki, uçaydım qanadlarla mən,
Oxusam, şerindən saatlarla mən,
Yorulmaz mənim də çənəm, ay SONA!

Ən xoş diləklərim-niyyətindədi,
Səmimi gülüşün-ülfətindədi,
Müqəddəs qələmim-hizmətindədi,
Şair içində bir dənəm, ay SONA!

Hər şeir-bir kitab, hər şeir-Özün,
Mənim yaddaşıma yazıldı sözün,
Sevginin dalınca boylanır gözün,
Ən böyük oxucun mənəm, ay SONA!

Bakı şəhəri. 5 dekabr 2022-ci il. 

“Ustad” deyən olmamışdı!

Sevən aşiqin gözləri,
Sevincdənmi solmamışdı?!
Məcnun Leylini səhrada,
Söylə görək, bulmamışdı?!

ALLAHdan istədim möhlət,
Tale də yazarmı töhmət?!
Şairlər çəkincə zillət,
Gözlərimi dolmamışdı?!

Meylim dumana, çənə də,
Şeir yazaydım Sənə də,
SONA, dünyada mənə də,
“Ustad” deyən olmamışdı!

Bakı şəhəri. 5 dekabr 2022-ci il. 

“Gənc Ədiblər Məktəbi”nin müdavimi, Azərbaycan Yazıçılar Birliyi Gənclər Şurasının və Azərbaycan Jurnalistlər Birliyinin üzvü, Prezident təqaüdçüsü, “İlin gənci” müfakatçısı, Azərbaycanın Mədəniyyət və Ədəbiyyat Portalının Baş redaktoru

Ayağım altında bir yarpaq qaldı,
Ürəyim gülümsədi…
Düşdü yenə əlimdən göy yelənli dəsmalım,
“Ah”ım göyə tələsdi…

Bir sərçə qanadıyla havanı sığalladı,
Təsəllimə döndü…
Dərdim nadinc, sevdam yaman cığaldı,
Bəxt yazan bir vüsal yazıb,
Bilmirəm hansı yöndü…

“Bu da keçər…” bilirəm, üzüyüm paslansa da,
Yetim qaldı barmaqlarım…
…yenə nömrəni yığdım…
Telefonun çalsa da,
Açma…
… Çoxdu umacaqlarım…

Verdiyin narahatlıq,
Yaşatdığın nə varsa
“qısa”, “müvəqqəti” deyil…
Yuxuma gəlməyin varsa,
Gəl…
… Bir fələyə, bir sənə, bir özümə söyürəm…
Və bunlar telefon söhbəti deyil…
Şəfa Vəli (2023)

“Gənc Ədiblər Məktəbi”nin müdavimi, Azərbaycan Yazıçılar Birliyi Gənclər Şurasının və Azərbaycan Jurnalistlər Birliyinin üzvü, Prezident təqaüdçüsü, “İlin gənci” müfakatçısı, Azərbaycanın Mədəniyyət və Ədəbiyyat Portalının Baş redaktoru

Eşikdə yağış səsi,
İçəridə isti çörək
Və sevda fəlsəfəsi…
Yenə sevməyim tutub:
Zehnimdə bir yelləncək,
Üstündəki xəyalın,
Həsrət elə sevincək
Boylandı ha…
Nazlandım…

İçəridə isti çörək,
Eşikdə yağış səsi…
Həftənin ömrü gödək,
Təqvim ömür şirəsi…

Üçdüymə köynəyi var
“fələk” dediyimizin,
Düymələr də tez qopur…
And içərəm, günahkar
Mən deyiləm…
Adındı…
… Yenə sevməyim tutub…

Azərbaycanın Mədəniyyət və Ədəbiyyat Portalının Baş redaktor müavini

Səhərdən axşama nağıl çapardı
Ayağı dəmirdən -taxta atımız..
Arabir gözümü yol aparardı
Xəyala boğardı -divar qatımız.

Hərdən qanadlanıb aylı gecədən
qığılcım saçardı həsrət -gözümə.
Arabir düşərdim atdan, keçədən
Gözümdən qaçardı şərbət -üzümə..

İçində kəpənək boğulur -deyə
gözüm zillənərdi qara sandığa.
Arabir ağlımda cavabsız: -‘niyə?
qürub dönə bilmir o uşaqlığa’.

Bir evi yuvaya nə çevirərmiş…
Sonralar öyrəndim, gülüstanını.
Arabir sığal da dərd devirərmiş,
Cənnətə çevirib zimistanını.

Gövdəmin ən sağlam yerindən kəsib
Keçmişi indiyə calaq edirəm…
Arabir taxtanın yaşını əzib
Bir gün yandırmağa qalaq edirəm..

Azərbaycanın Mədəniyyət və Ədəbiyyat Portalının Baş redaktor müavini

Hörmət elə qəhərindən yanmışa
Nəfəsinə könül səsim qarışa.
Dodağından can evinə qaçmışa
Üfür neyi, nəfəsinə bax elə..

Cümlə cahan sevda ilə dolanda
Qısqanclıqdan ağ bənizin solanda
Eşq zənciri qor atəşə qalanda
İnci kimi boğazına tax elə..

Uzaq dayan eldən, burax davasın,
Bulandırma nəm cənubun havasın,
Sözünün yox, sən özünün mənasın
Ürəyimə mismar kimi çax elə..

Qızıl qalsa yerdə əsla paslanmaz,
Göz yaşından ürək yanar, islanmaz,
Yar dönəndə yaramızdan iz qalmaz.
Kölgəsində bəyan olar ağ elə..

13.04.2023

“Gənc Ədiblər Məktəbi”nin müdavimi, Azərbaycan Yazıçılar Birliyinin (AYB) üzvü, Azərbaycan Respublikası Prezidenti təqaüd fondunun təqaüdçüsü, Azərbaycanın Mədəniyyət və Ədəbiyyat Portalının GƏNCƏ Bürosunun Rəhbəri

* * *

Boşaltdım ürəyini,
Ürəyin gencə olsun.
Çıxıram bu oyundan,
Qoy ürəyincə olsun.

Gözlərimdən düşməyə
Yol başlayıb təzəcə.
Azaltmışam mən səni,
Boyun yerdən dizəcən.

Bir pay ayrılıqdı bu,
Həm mənimdi, həm sənin.
Ürəyimə yatmışdın,
Oyadıram mən səni.

Bir az yaxına gəl, Tanrı

Bir az yaxına gəl, Tanrı,
İşim yoxdu bəndə ilə.
Dünyaya sığmayan ruhum
Qalıb bir bədəndə elə.

Görmədi… Heç kim görmədi.
Mən gördüm, bütün görmədim.
Nə qürbətdə gün görmədim,
Nə də ki, vətəndə elə.

Hansından danışım indi?
Görünür yanlışım indi.
Dərindən yaşadım, indi
Hamı necə, mən də elə.

“Gənc Ədiblər Məktəbi”nin müdavimi, Azərbaycan Yazıçılar Birliyinin (AYB) üzvü, Azərbaycan Respublikası Prezidenti təqaüd fondunun təqaüdçüsü, Azərbaycanın Mədəniyyət və Ədəbiyyat Portalının GƏNCƏ Bürosunun Rəhbəri

Dinclik tapmayanda
Etdiyim nadinclikdi səhvlərim-
Məni bağışlamaq olar!
Saatı geriyə çəkib
Yenidən başlamaq olar.
İndi xatırlamazsan-
Köhnənin söhbətidi,
Məni sevirdin onda.
Məhəbbətim buludlarda
Ürəyim qırmızı donda.
Geriyə bilirsən nə qalıb?
Tez-tez qanayan yaram.
Söhbət səndən düşmüşkən
Deyim ki, darıxıram.

Hansı ölüm yaxşıdı
Ölümlərin içində?
Bir dinclik tapmayıb
Yorulub ölmək?
Yoxsa
Onun gözlərinə, baxışlarına
Vurulub ölmək?

Ürəyimin içindədi,
Əlimin çölündə yoxdu,
İlahi, məni başa sal,
İlahi, bilim dəə, yoxdu.

Ayağımdan çəkildi yol,
Yıxıldım ürəyin üstə.
Mən onun məhəbbətinə
Tutuldum, heç nəyin üstə.

Azərbaycan Yazıçılar Birliyinin üzvü, Prezident mükafatçısı, Azərbaycanın Mədəniyyət və Ədəbiyyat Portalının BAKI Bürosunun Rəhbəri

* * *

Nə şöhrət istədim, nə tac istədim,
Məndə səadəti bu qədər gördüm.
Özümü adam yox, ağac istədim,
Özümü bir ovuc su qədər gördüm.

Dedim torpaq olum, dedim daş olum,
Qarışım tarixə, qovuşum heçə.
Toz olum , qum olum, yelə tuş olum,
Uyuyum bir sərçə kipriyindəcə.

Bəşərin ən şirin yuxusu olum,
Nə yox xatırlasın, nə də var məni.
Hər bahar yasəmən qoxusu olum,
Sürtsün qanadına arılar məni.

Görmədim bir ömür, ömürdən qısa.
Baxma ki, həyata meyilik Allah.
Yaşamaq, bu biçim yaşamaqdısa,
Nə yaxşı ölümsüz deyilik Allah.

* * *

Üşüdəcək əllərini sazaqlar,
Yandıracaq üz gözünü isti də.
Darıxacaq pəncərəndən uzaqlar,
Çağıracam,deyəcəksən, səsdi də…

Ağlayacam deyəcəksən yağışdı,
Bilirəm ki, tanımazsan, belə də…
Gör kimlərin ulduzları barışdı,
Bizimkilər qovuşmadı hələ də.

Bəlkə düşər payımıza xoş halın,
Qısa olar mənə gələn yol bu gün.
Bəhanələr qatilidir vüsalın,
Sabah gecdir, gəlirsənsə gəl bu gün.

Armududa qızardıqca çay dəmi,
Alışarsan nəfəsimə, istimə .
Başın altda yastıq elə sinəmi,
Qucağımı yorğan elə üstünə.

Kipriyini çətir bilib gizlənim,
Baxışının sual dolu selindən.
Eşq istəyim, ay ürəyi zəmzəmim,
Ovuc- ovuc içir məni əlindən.

Noğul kimi damağımda ərisin,
Dodağının şirinliyi, bəs demə!
Elə öpüm sübhə qədər, Nəfəsim,
Birdə məndən ayrı qalmaq istəmə.

Azərbaycan Yazıçılar Birliyinin üzvü, Prezident mükafatçısı, Azərbaycanın Mədəniyyət və Ədəbiyyat Portalının BAKI Bürosunun Rəhbəri

* * *

Adamlardan dağ olmadı,
Bilmədim kimə söykənim,
Gəlib ağaca yaslandım,
Ağac məni saxladı.

Bulaq oldum dum-duru,
Dedilər bulanıqdı.
Süzüldüm, daşdan süzüldüm,
Süzüldüm, qumdan süzüldüm,
Torpaq mənə inandı,
Adamlar inanmadı.

Nə illahdı bilmirəm,
Tapılmır çəmim, yönüm.
Yollar da o yol deyil ,
Gedəsən gün doğana.
Elə mat-mat baxıram
Əllərimə, ilahi.
Əllərim qanad deyil,
Ah, kaş ki qanad ola…

* * *

Sahil boyu qovmamış külək bizi,
Gəl isidək əlimizi günəşə.
Quş edəydi yaradan gərək bizi,
Çevirəydik yönümüzü günəşə.

Yay da bitir, yenə xəzəl, yenə qəm.
Son yarpağı qoparacaq yel hələ.
Mən çovğuna borana da dözərəm,
Bircə baxıb gözlərimə gül hələ.

Bəlkə gülsən unudular dünənlər,
Zülmətlərə yem olmaram birdə mən.
Həyatıma əli odlu gələnlər,
Ürəyimi kül eyləməz, Birdənəm.

Ah, nə gözəl açılıbdır sübh bu gün,
Saçlarında çəmənlərin gülləri.
Sən ən gözəl mücəvhərsən mənimçün,
Boyunbağım əllərindir, əllərin.

İlk saralan yarpaq idi son bahar,
İsti idi dəniz hələ, qum hələ.
Ürəyimdə şirin-şirin xəyallar,
Sinəm üstə gözlərini yum hələ,
Xəyal elə xəyal elə mənimlə…