MƏNİM KÖNÜL DÜNYAMIN,
AYNASISAN, AY ANA
Mənim könül dünyamın,
aynasısan, ay ana.
Nə yaxşı ki, bu gün də,
yaşayırsan, ay ana.
Sənsiz dünyanın özü,
Bir cəhənnəm kimidir.
Nikbin ruhlu şeirim,
Kədərlə qəm kimidir.
HANI DİLDƏ DANIŞIM Kİ…
Səhvlərimin üstündə də
anam da danlasın məni.
Hansı dildə danışım ki,
təbiət anlasın məni.
* * *
Baxanda da inanmadın,
axan göz yaşa, anacan.
Indi də qalıb ümidim,
Salamat başa, anacan.
Dəqiqələr itirmişəm
Xoş günləri ötürmüşəm.
Hələ görüb-götürmüşəm,
Çatıb bu yaşa, anacan.
Qoy itməsin heysiyyətin,
Olmasın hədər zəhmətin.
Budur ki, mənim niyyətim:
Ta ki, sən yaşa, anacan.