Azərbaycan Yazıçılar Birliyinin üzvü, Prezident mükafatçısı, Azərbaycanın Mədəniyyət və Ədəbiyyat Portalının BAKI Bürosunun Rəhbəri

* * *

Yumuldu gecənin ulduz gözləri,
Pərişan saçının qaranlığında .
Elə toxundum ki, o andan bəri,
Yanağı qızardı qaranlığın da.

Elə toxundum ki, bir ah bəs etdi,
Çırpındı ürəyin sinəmin üstə.
Adın dodağımdan qopub səs etdi,
Cəmləndi susduğum nə var o səsdə.

Bir de baxışında bu sual nədir?
Sabahı düşünmə ömür qısadır.
Mənə dodağında növbahar gətir,
Deyim öpüşlərin gilənar dadır.

Deyim öpüşlərin nübar fəslidir,
Deyim çiyinlərin heyva qoxulu.
Gözlərin sevməyə nə həvəslidir,
Ay həzin nəfəsli, cənnət yuxulu.

Elə toxundum ki, dayandı zaman,
Durdu təyyarələr, qatarlar durdu.
Sardı vücudunu həmin həyəcan,
Nə şirin söylədin mənə “yoruldum”…

Elə toxundum ki…ilahi elə,
İlahi, bu gecə bizi əfv elə…

* * *

Üşütmədi şaxta məni, qar məni,
Düşmən etdin hər kəsə aşkar məni,
Yıxılmadım satanda dostlar məni,
Sən kənarda durdun deyə ağladım.

Dayaz dedin, dərinlikdə üzmədik,
Nə illahsa dərdimizi çözmədik,
Beş on günlük çətinliyə dözmədik,
Ayrılaqmı sordun deyə ağladım.

Qürür etdim, nə edirsən et dedim,
Bir dedinsə cavabında cüt dedim,
Mən axmağam, tutaq sənə get dedim,
Körpüləri qırdın deyə ağladım.

Olmaz belə, bizimki də zülümdür,
Yanıb bitdim gördüklərin külümdür,
Bu eşq deyil, hər nəfəsi ölümdür,
Vücudumu sardın deyə ağladım.

Gözü qara gecələrdə yuxumdun,
Çox istədin, çox apardın, çox umdun.
Sən ki mənim ürəyimə yaxındın,
Ən yaxından vurdun deyə ağladım.