Day: Noyabr 13, 2022

Azərbaycanın Mədəniyyət və Ədəbiyyat Portalının Baş redaktor müavini

Məndən qaçdığını anladım bugün
Mən sənin yolunda gül-çiçək idim
Min dəfə keçsən də mənim yanımdan
Dönüb baxmasaydın, görməyəcəkdin.

Məndən qaçdığını anladım bugün
Mən sənə tamarzı, mən sənə həsrət,
Sənin qəlbin mənə bir özgə qürbət
Mənimsə ürəyim gülüstan, cənnət

Məndən qaçdığını anladım bugün
Gözümə baxmağa üzün gələrmi?
Aldadıb, oynadıb, qırdığın ürək
Yenidən canlanıb, heç döyünərmi?

Məndən qaçdığını anladım bugün
Sinəmə vurduğun dağ nə idi bəs,
Sən mənim gözümdə yüksəkdən yüksək,
Mən sənin gözündə nə olmuşam bəs?

Məndən qaçdığını anladım bugün
Yoluma çıxmağa cəsarətin yox,
Mən abır eyləyib, susub durmuşam
Səninsə maşaallah gileyi nə çox

Məndən qaçdığını anladım bugün
Sonanı odlara atıb, getmisən.
Mən bu məhəbbətə bir ayrı sürgün,
Sənsə, əməyimi ayaqlar altda
Əzib, tapdalayıb, qırıb getmisən…

Azərbaycanın Mədəniyyət və Ədəbiyyat Portalının Baş redaktor müavini

Əksin gözlərimin önündə durub
Yumuram açıram, yoxa çıxmayır
Elə bil fikirim hardasa qalıb
Elə hey boylanır, mənə baxmayır

Əlimi uzatdım xəyalına mən
İstədim tutasan əlimdən mənim…
BU NECƏ BİR HİSSDİR? sualına mən
Necə cavab verim, necə söyləyim…

Təsəvvür eylə ki, əlin ulduza
Baxanda yaxındı, amma, çifayda
Hey can atırsan ki, ulduzu tuta,
Amma, heç yetməyir ona haray da.

Eləcə tamaşa eyləmək qalır,
Biçarə qalırsan xəyalına tək.
Bir də görürsən ki, gözün qaralır,
Daha döyünməyir sinəndə ürək.

Beləcə məhv edər fikir insanı
Yuxuların çəkilər bax , ərşə də
ÖLƏNƏDƏK AYRILMARIQ, bəs hanı?
Nə vaxtsa da qovuşarıq bəlkə də.

Bəlkə daha artıq bir sevgiylə biz
Yenidən yaşamaq eşqinə düşdük.
Ya da ölüb gedib, o biri dünyaya.,
Bəlkə Tanrı cənnətinə görüşdük…

Xəyalına söylə, bir də qarşıma
Qoy sənsiz gəlməsin, sənsiz çıxmasın.
Sözümü həkk eylə sən yaddaşına,
Heç zaman unutma, yadında qalsın.

Gəl özün qucaqla, gəl özün sarıl,
Əllərin dolansın belimə mənim.
Alnımdan öp mənim, HALALIM denən,
Boynuna dolansın mənim əllərim

Azərbaycanın Mədəniyyət və Ədəbiyyat Portalının Baş redaktor müavini

Sən hardan biləsən nədir məhəbbət,
Əllərin uzalı qaldımı , söylə?
Gedənin addımın sonadək sayıb,
Qayıdıb gəlməsin gözlərdən belə…

Sən hardan biləsən nədir məhəbbət
Dualar etməyi öyrəndinmi sən?
Narahat, nigaran, tək qalanda yox…
Gözlərin doluxanda biləcəksən…

Sən hardan biləsən nədir məhəbbət
Evdə hazırın yox, pay da gəlməyib.
Nə sənin kitabın yazmayıb bunu,
Nə də ki, ürəyin səndən getməyib…

Sən hardan biləsən nədir məhəbbət
Yolunu saatla gözləmək nədir,
Yorğun simasını görüb, həvəslə
Fikrini dağıtmaq, cəmləmək nədir…

Sən hardan biləsən nədir məhəbbət
Yad bir oyuncaq tək qırmısan onu
Oynadıb, yorulub eyni oyundan,
Divarın küncünə qoymusan onu

Sən hardan biləsən nədir məhəbbət
Telini oynadıb, qoxlamağı var
Hələ həsrətinə tab gətirməyib
Arada uşaqtək ağlamağı var

Sən hardan biləsən nədir məhəbbət
Həvəsinə qurban gəzirsən hələ
Xoşbəxtlik toy qurub səninçün, amma,
Təxirə salmısan sən onu yenə.

Sən hardan biləsən nədir məhəbbət
Əyləncə axtarıb yorulmadınmı?
Kiminsə ürəyin ayağın altda
Qıranda həyatdan utanmadınmı…?

Sən hardan biləsən nədir məhəbbət
Sevinc göz yaşını qəmə qatdınmı?
Sən heç sevdiyini üzməmək üçün,
Özünü atəşə, oda atdınmı?

Sən hardan biləsən nədir məhəbbət
Kədəri qəlbində gizləmək nədir
Könlünü alarsan, amma özünün
Dərdinsə hələ də öz qəlbindədir.

Sən hardan biləsən nədir məhəbbət
Kiməsə özünü xərcləmək kimi,
Həyat da, sevgi də bir fəlsəfədir.
Sona İntizaram, yazdığım şeir,
Ərmağandır sənə, həmişəki kimi…