“Gənc Ədiblər Məktəbi”nin müdavimi, Azərbaycan Yazıçılar Birliyinin (AYB) üzvü, Azərbaycan Respublikası Prezidenti təqaüd fondunun təqaüdçüsü, Azərbaycanın Mədəniyyət və Ədəbiyyat Portalının GƏNCƏ Bürosunun Rəhbəri.
* * *
Toxunmadım xatirənə,
Yaxşı, ya da pis demədim.
Səni geriyə qaytarmaq
Əlimdəydi, istəmədim.
Ürəyimi xırdalayıb
Vərəq-vərəq söz etmişdim.
Sənlə etdiyim səhvi də
Düz etmişdim, düz etmişdim.
Yordu məni bunca kədər, –
Ya bittim gedincə, deyim…
Bunun adı darıxmaqdı?
Bağışlamaq? – məncə deyil.
Səni nə vaxt xatırlasam,
Soyuqdu- üşüyür əlim.
Ya payızın axırısan,
Ya da ki, qışın əvvəli.
* * *
Buz kəsilib səndən sonra xatirən,
Nə bir gülür, nə ağlayır, biləsən.
Ürəyimin ümidinə qalmışam,
O da səni sayaqlayır, biləsən.
Biləsən ki, nə getməyə yerim var,
Nə qalmağa rahatlığım var mənim.
Üstümə gün kimi düşür, biləsən,
Qaraldır qanımı axşamlar mənim.
“Gəl-gəl”-deyə yellənirdi əllərim, –
Əlim əsə-əsə xatırlayıram.
Baxma yaddaşımın nadincliyinə,
Səni birnəfəsə xatırlayıram.
Buz kəsilib səndən sonra xatirən,
Yerimdəcə qurumuşam don kimi.
Bilirəm e, bu axırdı, bu sondu,
Sən yenə də oxuyarsan “Dön” kimi