Day: May 25, 2023

  • “Yaradıcı oxucularımız” layihəsi davam edir

    Bakı Şəhər Mədəniyyət Baş İdarəsi Yasamal rayon MKS-nin M.Ş.Vazeh adına Mərkəzi Kitabxanasının Fəxri oxucusu, AYB-nin və AJB-nin üzvü, şair, yazıçı-publisist Gülarə Munis kitabxanada həyata keçirilən “Yaradıcı oxucularımız” layihəsinə  “Kişi əlləri” miniatürünü təqdim etdi.

    Müəllif qılınc vuran, qalxan tutan, ox atan, zəhmətkeş, qabarlı, güclü, yenilməz, bəzən ana əlləri qədər zərif, doğma, bəzən də kövrək, titrək kişi əllərini vəsf edir.

    Gülarə Munis

    Kişi əlləri

    (Miniatür)

    Ağlımız kəsəndən bədii kitablarda ana əlləri, qadın əlləri barədə müxtəlif yazılarla qarşılaşmışıq. Amma etiraf edək ki, kişi əlləri barədə qələmə alınan yazılara o qədər də rast gəlməmişik.

    Kişi əlləri…

    Güclü, təpərli kişi əlləri…

    Bəzi mərdanə kişilər barədə belə deyirlər: “Filankəsin qolunda Fərhad gücü var, o, dağı yerindən oynada bilər!”

    O dağı yerindən oynatmağa qüdrəti çatan kişi əlləri ömür-gün yoldaşını itirəndən sonra heç kim görməsin deyə gecələr övladlarının paltarlarını da yuyur, anasız qalan övladının beşiyini də yellədir. Övladının saçlarını sığallayıb onu yuxuya verir. 

    Kişi əlləri…

    Vətənə gəc baxan düşmən görəndə o qüvvətli kişi əlləri silahdan yapışır. Bəzən düşməni yalın əlləri ilə boğub məhv edir. Qılınc vuran, qalxan tutan, ox atan kişi əlləri…

    Yaşa dolanda qabarlı, titrək, qırışlı kişi əlləri…

    Evlər-imarətlər tikən, bağ-bağat salan, qohumların, dostların xeyir-şərində qollarını çirmələyib dada yetən kişi əlləri…

    Qocalanda əl ağacını zorla tutan kişi əlləri…

    Hanı sizin qolunuzun qüvvəti? Niyə zaman sizə qarşı belə amansız olur?

    Niyə?

    Kişi əlləri…

  • İçərişəhərdə V Milli Kitab Sərgisi açılacaq

    Mayın 27-də İçərişəhərdə V Milli Kitab Sərgisi işə başlayacaq.

    AZƏRTAC xəbər verir ki, iyunun 4-dək davam edəcək sərgidə müxtəlif təqdimatlar, panel müzakirələri, yerli və xarici müəlliflərlə görüşlər, imza günləri, poeziya axşamları keçiriləcək.

    Sərgi saat 09:00-dan 20:00-dək Qoşa Qala meydanında təşkil olunacaq.

    Mənbə: https://azertag.az/

  • Mərkəzi Kitabxanada qazilərdən bəhs olunan tədbir – Vətən fədailəri

    Xətai rayon Mərkəzi Kitabxanası və LM Akademiyasının birgə təşkilatçılığı ilə Xətai rayon Mərkəzi Kitabxanasında “Vətən fədailəri” adlı qazilərin həyat yolundan bəhs olunmuş tədbir təşkil edilib.

    AZƏRTAC xəbər verir ki, əvvəlcə Azərbaycan Respublikasının Dövlət Himni səsləndirilib və vətənimizin ərazi bütövlüyü uğrunda şəhid olanların əziz xatirəsi bir dəqiqəlik sükutla yad edilib.

    Finlandiya Azərbaycanlıları Assosiasiyasının həmsədri, Finlandiya Qadınlar Cəmiyyətinin sədri Arzu Oktay çıxışı zamanı qeyd edib ki, Azərbaycanın müstəqilliyi və ərazi bütövlüyü uğrunda qəhrəmanlıq göstərmiş Vətən övladlarının döyüş yolunun öyrənilməsi, canlarından keçmiş igidlərin xatirəsinin əbədiləşdirilməsi, onların şücaətinin təbliği, şagirdlərdə hərbi vətənpərvərlik ruhunun yüksəldilməsi və azərbaycançılıq məfkurəsinin möhkəmləndirilməsində təhsil müəssisələrinin böyük rolu var.

    Tədbirin ədəbi-bədii hissəsində məktəblilər vətənpərvərlik mövzusunda, şeirlər və vətənpərvərlik ruhunda ifalarla çıxış ediblər.

    Mənbə: https://azertag.az/

  • “Mehmanxanaların (hotellərin) ulduz kateqoriyaları üzrə qiymətləndirmə meyarları” təsdiq edilib

    Dövlət Turizm Agentliyinin Kollegiyasının sədri Fuad Nağıyev tərəfindən “Mehmanxanaların (hotellərin) ulduz kateqoriyaları üzrə qiymətləndirmə meyarları” təsdiq edilib.

    Dövlət Turizm Agentliyindən AZƏRTAC-a bildirilib ki, təsdiqlənmiş meyarlarda ümumi müddəalar, mehmanxanaların ulduz təsnifatı, ulduz kateqoriyaları üzrə qiymətləndirmə meyarları, ulduz kateqoriyaları üzrə qiymətləndirmə qaydası detallı şəkildə əksini tapıb.

    Mənbə: https://azertag.az/

  • Ulu Öndər Heydər Əliyev haqqında kitab İspaniya kitabxanalarında

    Dövlət Tərcümə Mərkəzinin Madriddə ərsəyə gətirdiyi “Vida de personas notables – Heydar Aliyev” (“Görkəmli şəxsiyyətlərin həyatı – Heydər Əliyev”) kitabı İspaniyanın mərkəzi kitabxana və universitetlərinə yerləşdirilib.

    Tərcümə Mərkəzindən AZƏRTAC-a bildirilib ki, zəngin ənənəli “Mandala Ediciones” nəşriyyatında çap olunmuş kitabın ispan dilinə tərcümə müəllifləri – tanınmış Salvador dilçi-alimi, professor Sesar Edqardo Martines Flores və ispan dili mütəxəssisi Nərmin Hüseynlidir.

    Mənbə: https://azertag.az/

  • Kitabxana kitab və mütaliə məsələləri ilə bağlı Beynəlxalq konfransda iştirak edir

    Bu gün Qırğızıstanda MDB ölkələrinin müzey, arxiv, nəşriyyat, kitab ticarəti nümayəndələri, habelə alimlər, yazıçılar və ictimai xadimlər “İnformasiya cəmiyyətində kitab, mütaliə və xatirə institutları” III Beynəlxalq elmi-praktik konfrans çərçivəsində kitab və mütaliə məsələlərini müzakirə edirlər.

    Konfransda “Kitabxananın Beynəlxalq əlaqələri” layihəsi​ çərçivəsində Yasamal rayon MKS-nin M.Ş.Vazeh adına Mərkəzi Kitabxanasının Fəxri oxucusu, AMEA-nın Nizami Gəncəvi adına Ədəbiyyat İnstitutunun elmi-informasiya və tərcümə şöbəsinin müdiri, filologiya elmləri üzrə fəlsəfə doktoru, dosent Zakirə Əliyeva iştirak edir. Zakirə Əliyeva konfransda ”Uşaq ədəbiyyatı dünyasında uşaqlar: ədəbiyyatın populyarlaşdırılması və mütaliə məsələləri” məruzəsi ilə çıxış edəcək.

    Bişkekdə mütaliə və tarixi mədəni-irsin populyarlaşdırılması məsələlərini Azərbaycandan, Belarusiyadan, Qazaxstandan, Qırğızstandan, Rusiyadan, Türkmənstandan, Özbəkstandan olan nümayəndələr müzakirə edəcəklər.

    Konfransın təşkilatçıları Kitabxana Əməkdaşlığı Regionlararası Mərkəz, YUNESKO-nun “İnformasiya hamı üçün”

    ​Proqramının Rusiya komitəsi və Qırğızıstan Respublikasının Milli Tarix Müzeyidir. Konfransa MDB iştirakçı-dövlətlərin Dövlətlərarası Hümanitar Əməkdaşlıq Fondu, Qırğızıstan Respublikasının Mədəniyyət, İnformasiya, İdman və Gənclər Siyasəti Nazirliyi və Rusiya Federasiyasının Rəqəmsal İnkişaf, Rabitə və Kütləvi Kommunikasiyalar Nazirliyi dəstək vermişdir.

  • Şəfa VƏLİYEVA.”Eşikdə yağış səsi”

    Gənc Ədiblər Məktəbi”nin müdavimi, Azərbaycan Yazıçılar Birliyi Gənclər Şurasının və Azərbaycan Jurnalistlər Birliyinin üzvü, Prezident təqaüdçüsü, “İlin gənci” müfakatçısı, Azərbaycanın Mədəniyyət və Ədəbiyyat Portalının Baş redaktoru

    Eşikdə yağış səsi,
    İçəridə isti çörək
    Və sevda fəlsəfəsi…
    Yenə sevməyim tutub:
    Zehnimdə bir yelləncək,
    Üstündəki xəyalın,
    Həsrət elə sevincək
    Boylandı ha…
    Nazlandım…

    İçəridə isti çörək,
    Eşikdə yağış səsi…
    Həftənin ömrü gödək,
    Təqvim ömür şirəsi…

    Üçdüymə köynəyi var
    “fələk” dediyimizin,
    Düymələr də tez qopur…
    And içərəm, günahkar
    Mən deyiləm…
    Adındı…
    … Yenə sevməyim tutub…

  • Şəfa VƏLİYEVA.”Yüyürmüsən ömrü bu baş-o başa”

    Gənc Ədiblər Məktəbi”nin müdavimi, Azərbaycan Yazıçılar Birliyi Gənclər Şurasının və Azərbaycan Jurnalistlər Birliyinin üzvü, Prezident təqaüdçüsü, “İlin gənci” müfakatçısı, Azərbaycanın Mədəniyyət və Ədəbiyyat Portalının Baş redaktoru

    Yüyürmüsən ömrü bu baş-o başa,
    Arzuların gediş haqqı almayıb…
    Gülə-gülə döndün ürəyi daşa,
    Gözündə yaşların haqqı qalmayıb…

    Unutdular yaşayırsan hardasa,
    Umacaqda yada düşdü ünvanın…
    Fələk kimin ürəyini qırdısa,
    Təsəlli yuvası oldu sığnağın…

    Sığnaq dedim…
    İncimədin, bilirəm,
    Sığınar şeirə hər ağlı “dəli”…
    Bu gün yenə sənə baxıb gülürəm,
    Güzgümüz eynidi, ay Şəfa Vəli…

  • Xəyalə SEVİL.”Oxuduğum kitab kimi”

    “Gənc Ədiblər Məktəbi”nin müdavimi, Azərbaycan Yazıçılar Birliyinin (AYB) üzvü, Azərbaycan Respublikası Prezidenti təqaüd fondunun təqaüdçüsüAzərbaycanın Mədəniyyət və Ədəbiyyat Portalının GƏNCƏ Bürosunun Rəhbəri

    Oxuduğum kitab kimi
    Gözlərimdə rəfdəsən.
    Söylədiyim hər cümlədə,
    Hər sözdə, hər hərfdəsən.

    Eşq aldı məni cənginə,
    Çatdım könlümün dənginə.
    Gözümün su səhənginə
    Dolmusan ee, kefdəsən.

    Tanı, əllərimi tanı,
    Tanı, əlimin vətəni.
    Sən də sevəcəksən məni,
    Çoxdandı hədəfdəsən.

  • Xəyalə SEVİL.”Yaxşı tez alışıram”

    “Gənc Ədiblər Məktəbi”nin müdavimi, Azərbaycan Yazıçılar Birliyinin (AYB) üzvü, Azərbaycan Respublikası Prezidenti təqaüd fondunun təqaüdçüsüAzərbaycanın Mədəniyyət və Ədəbiyyat Portalının GƏNCƏ Bürosunun Rəhbəri

    Yaxşı tez alışıram
    Ayrılıq ağrısına-
    Bu gün-sabaha qədərdi.
    Mən özümü bir saat da
    Dərd çəkməyə qoymuram,
    Bəs nədir bu həsrət dərdi?
    Ürəyimin boşluğunda
    Kim var, kimi unuduram?
    Ah, mən daha heç kimi
    Sevə bilmirəm axı.
    Sinəmdə bir xatirətək
    Ürəyimi quruduram.
    Ruhum gedib, “gəl, gəl” deyir
    Bir addm da gəlmirəm.
    İndi mənə kim lazımdı,
    İndi kimə lazımam,
    Heç özüm də bilmirəm.
    Yenə quraq,
    Yenə susuz səhrayam.
    Uzaq durma,
    Üst-başımı yu, bulud.
    Hamı kimi, eh, sənin də
    Səs-küyünə güvənmirəm-
    Yağan deyil bu bulud.

  • Arzu HÜSEYN.”Danışmaq da xoş deyil inamdan, etibardan”

    Azərbaycan Yazıçılar Birliyinin üzvü, Prezident mükafatçısıAzərbaycanın Mədəniyyət və Ədəbiyyat Portalının BAKI Bürosunun Rəhbəri

    Danışmaq da xoş deyil inamdan, etibardan,
    Nəbilirsən kim səni hansı tində vuracaq.
    Ağac vəfa gördümü, əlvan rəngli bahardan?
    Öz külündən tükənir, soyuyanda od, ocaq.

    Güvənmək də xoş deyil, güvənirik hər dəfə,
    İnsan əl üzə bilmir nədənsə dünənindən.
    Mən hər zaman silah yox,
    Mən hər zaman hədəfəm.
    Mənəm edam edilən, asılan güvənindən.

    Əli bıçaq tutmayan, dili acı söz tutdu,
    Nələr, nələr eşitdim həqiqətə uymayan.
    Məhkəmələr quruldu, yenə haqsızlıq uddu,
    Uduzdu bu dəfə də, haqq yolunda can qoyan.

    Sığışmaz yerə, göyə, kəhkəşanlı saraya,
    Hesabında milyonlar, guya iman güdənlər.
    Bir zamanlar Şah idi, hökmürandı dünyaya,
    İndi qara tabutda, əli yalın gedənlər…

  • Arzu HÜSEYN.”Sən mənim ömrümə əsən rüzigar”

    Azərbaycan Yazıçılar Birliyinin üzvü, Prezident mükafatçısıAzərbaycanın Mədəniyyət və Ədəbiyyat Portalının BAKI Bürosunun Rəhbəri

    Sən mənim ömrümə əsən rüzigar,
    Sən mənim bəxtimə yağan yağışsan.
    Bəlkə də yaşanan sonuncu bahar,
    Bəlkə də əbədi bitməyən qışsan.

    Hələ gözlərində ilk sevda dəmi,
    Hələ əllərində ilıq hərarət.
    Neynəyim dəli tək sevirəm səni,
    Sevirəm bir şirin sözünə həsrət.

    Ürək söz anlamır yoxsa nə gəzim,
    Getdiyin yollarda, durduğun yerdə.
    Sən qalib çıxmısan qorxma, əzizim,
    Mən yenə eşqinə məğlub sərkərdə.

    Ürəkdən dodağa bircə pıçıltı,
    Dodaqdan ürəyə öpüş kimisən.
    De görüm yuxumu hara uçurdun?
    De görüm yuxuna saldın kimi sən?

    Mən sərt dalğalarla çarpışan qayıq,
    Ümidi kəsilmiş qağayıyam mən.
    Biz ki, ayrı-ayrı yaşamalıyıq,
    Bəs niyə evimi sən sayıram mən?
    Darayır otları bahar küləyi,
    Heyvalar sonuncu çiçəyin tökür.
    Mən şeir yazıram səndən, Mələyim,
    Şəhərin üstünə buludlar çökür,
    Heyvalar sonuncu çiçəyin tökür……

  • Kitabxanaya Ulu Öndərə həsr olunmuş yeni şeir təqdim olundu

    Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin M.Ş.Vazeh adına Mərkəzi Kitabxanasının Fəxri oxucusu, AYB-nin və AJB-nin üzvü, “Tərəqqi” medalı laureatı, BMT yanında Ümumdünya Sülh Federasiyasının “Sülh səfiri” mükafatçısı, “Vedibasar” qəzetinin redaktoru, şair, yazıçı-publisist Nəsibə İsrafilqızı Ulu Öndər Heydər Əliyevin 100 illik yubileyinə həsr etdiyi yeni şeirini kitabxanaya təqdim etdi.

    Mərkəzi Kitabxanada həyata keçirilən “Yaradıcı oxucularımız” layihəsində fəal iştirak edən Nəsibə İsrafilqızının “Xilaskarım” şeiri oxuculara təqdim olunur.

    Xilaskarım

    (Ulu Öndər Heydər Əliyevin 100 illiyinə həsr edilib)

    Sən zirvəsən, uca dağsan,

    Bol-bəhrəli yaşıl bagsan.

    Sən alisən, sən aqilsən,

             Tarix yazan bir alimsən.

    Ürəklərə dolub qaldın,

    Bir əbədi mehman oldun.

    Şəfa tapdın minbir dərdə,

    Bərabərin yox hünərdə.

    Sən milləti tanıtdın, bu dünyaya, cahana.

    Hər kəlməndə min hikmət, hər sözündə min məna.

    Adına “Xilaskarım”, “Heydər baba” dedilər.

    Millətə ata oldun, “Heydər ata” dedilər.

    Sənsən al Günəşimiz, nuruna boyanırıq,

    Şəfəqlər sığalında hər sabah oyanırıq.

    Sən xalqın keşiyində bir əbədi mayaksan,

    İşinlə, əməlinlə millətinə dayaqsan.

    Oldu bayraqdarımız dəmir yumruqlu İlham,

    Bu şərəfə, hünərə, dünyalar qaldı heyran.

    Bir yumruqda birləşib sinə gərdik səngərə,

    Alqış igid əsgərə, alqış igid rəhbərə.

    Möhtəşəm zəfər çaldı döyüşlərdə ordumuz,

    Azadlığa qovuşdu bu müqəddəs yurdumuz.

    Qarabağda, Şuşada dalğalandı bayrağım,

    Şənlik etdi el-oba, güldü yurdum, torpağım.

    Əqidən, amalınla sənin yolun haqqı yolu,

    Sən millətin oğulsan sənin yolun xalq yolu.

    Adın zirvələrdədi, tarixlərdə qalacaq,

    Sən tarixi yazmısan, tarix səndən yazacaq.

    Ey Türkün şanlı oğlu, Vətənin vətəndaşı,

    Türkün başqa kimi var, Türkdü elə qardaşı.

    Bizi qoruyacaqdır Allah, müqəddəs “Quran”,

    Yaşasın Azərbaycan, yaşasın Ulu Turan.

  • Ümummilli Liderin anadan olmasının 100 illiyi münasibətilə açıq havada kitab sərgisi açılıb

    Bakı Şəhər Mədəniyyət Baş İdarəsi, Xəzər rayon Mərkəzləşdirilmiş Kitabxana Sisteminin Mərkəzi Kitabxanasının təşkilatçılığı ilə Ümummilli Lider Heydər Əliyevin anadan olmasının 100 illiyi münasibətilə açıq havada kitab sərgisi açılıb.

    Baş İdarədən AZƏRTAC-a verilən məlumata görə, sərgidə Ulu Öndər Heydər Əliyevin həyat və yaradıcılığını əks etdirən kitablar və kitabxananın fonduna daxil olan yeni nəşrlər nümayiş olunub.

  • Azərbaycanlı şairə Nigar ARİF saytda Cənubi Azərbaycan Bürosunun Rəhbəri təyin olunub

    Azərbaycanın Mədəniyyət və Ədəbiyyat Portalının (edebiyyat-az.com) təsisçisi və baş redaktoru Kənan Aydınoğlunun 23 may 2023-cü il tarixli müvafiq qərarına əsasən, yeni nəsil Azərbaycan gəncliyinin istedadlı nümayəndəsi, “Gənc Ədiblər Məktəbi”nin müdavimi, Azərbaycan Yazıçılar Birliyinin (AYB) və Dünya Gənc Türk Yazarlar Birliyinin (DGTYB) üzvü, Azərbaycanlı şairə, gənc xanım yazar Nigar ARİF Azərbaycanın Mədəniyyət və Ədəbiyyat Portalının (edebiyyat-az.com) Cənubi Azərbaycan Bürosunun Rəhbəri təyin olunub.

    Azərbaycanın Mədəniyyət və Ədəbiyyat Portalının Mətbuat xidməti və İctimaiyyətlə əlaqələr şöbəsi.