Hisob-kitob çı ğuvvəku ve qınyə,
Həxqi şələ sicimiku beqınyə.
Arədəmon kin-kudurət eqınyə,
Sıftə dövr, sıftə zəmon çokebən,
İnsonon ve təmizebən, pokebən.
Mu kam nəbi, jenon, kinon bəvonku,
Həyo-abrü ve hestıbe çəvonku.
Ləçək, pəlü uənəbi səvonku,
Sıftə dövr, sıftə zəmon çokebən,
İnsonon ve təmizebən, pokebən.
Zuon, kinon hənək əkəyn deyəndı,
Mehriban bin, hiç nəqınin bəyəndı.
Esə həmə nom pesoxdən boyəndi,
Sıftə dövr, sıftə zəmon çokebən,
İnsonon ve təmizebən, pokebən.
Zuə kinəj bə co məksəd piyedə,
Gevon beşə, kələ vində diyedə.
Həxq votəkəs, de həromi jiyedə,
Sıftə dövr, sıftə zəmon çokebən,
İnsonon ve təmizebən, pokebən.
Əğıl nıbim, az handəbim nəvədə,
Yol-rükəti çaş kardəbin bəvədə.
Həsüyə tono vəvu yaşmağ qəvədə,
Sıftə dövr, sıftə zəmon çokebən,
İnsonon ve təmizebən, pokebən.
Kok bə lodi, lod bə koki penışdə,
Rük bə yoli, yol bə rüki penışdə.
Kaq bə kaqi, sük bə süki penışdə,
Sıftə dövr , sıftə zəmon çokebən,
İnsonon ve təmizebən, pokebən.
Nımoj bıvot dızdi kardə şanqone,
Ğuron bahand votdə ,,hələ hanqome,,
Dərk kardəni, çı Ğuroni nom qone,
Sıftə dövr, sıftə zəmon çokebən.
İnsonon ve təmizebən, pokebən.
Merd lınqəro, jen amədə, jen sədə,
Kinon dasto eqındəni-fen, sədə.
Əğıl nışdə çı məclisi pensədə,
Sıftə dövr, sıftə zəmon çokebən,
İnsonon ve təmizebən, pokebən.
Esə beşə ve oqəte dəb- rişi,
Dinsızonən oxşedən bə dərvişi.
Cohil-cəhil dəsyedəni siprişi,
Sıftə dövr, sıftə zəmon çokebən,
İnsonon ve təmizebən, pokebən.
Sıxan oməy, az zındənim oqəte,
Yəğın ki sə, iyo ışdə bo qəte.
Jıqonçiqon dapalaği peqəte,
Maisi ğələm ve dırozə lokebən.
Sıftə dövr , sıftə zəmon çokebən,
İnsonon ve təmizebən, pokebən!