Kasıbın bir tikəsinə,
Min tikəli şərik çıxır.
Nübarına əl dəyməmiş,
Əlli yerdən yerik çıxır.
Bəxtinə düyün düşübdür,
Taleyindən gen düşübdür,
Düz yoluna çən düşübdür,
Qarşısına gədik çıxır.
Cındırından cin ürküdür,
Amma ürəyi güzgüdür,
Kasıbçın “Pul əl çirkidir”,
Məsəli də müdrik çıxır.
Yaşamağa ümidi var,
Düşünür ki, çarə tapar…
Həsrətlə gözlədiyi bar,
Yetişəndə çürük çıxır.