Gözlərim
Əlvida söyləyib düzəldin yola,
Sən gedən yollarda qaldı gözlərim.
Sənli günlərimi fikirləşdikcə,
Fikrə xəyala daldı gözlərim.
Çay kimi kükrəyib ağlayanda o,
Yas tutub qaranı bağlayanda o,
Aşiq olanda o ağlayanda o,
Məni min əzaba saldı gözlərim.
Məhkumam bu eşqin çəkməyə dərdin,
Sən mənim qəlbimdə ilk bahar idin,
Getdin gedişinlə xəzan gətirdin,
Gül kimi saralıb soldu gözlərim.
Sənli xatirələr ən xoş gün idi,
Zaman ömrümdən günləri yedi,
Vağzalı səsini arzu elədi,
Ayrılıq mahnısı çaldı gözlərim.
Xəbər al məni
Əqrəblər aparıb ömrün yarısın,
Saatdan zamannan xəbər al məni.
Mənim varlılarla dostluğum yoxdu,
Tavanı damannan xəbər al məni.
Qəlbimi qorxutmaz ayrılıq əqyar,
Sevgimi heç vaxtı etmərəm inkar,
Fərhadam dağlarda arayıb axtar,
Tapmasan dumannan xəbər al məni.
Yazdığım hər misra doğrudur mənim,
Ürəyim onunçun dağlıdır mənim,
Həyatım qələmə bağlıdır mənim,
Şeirdən romannan xəbər al məni.
Sərəstan ömrünü verməyib bada,
Boynunu əyməyib heç zaman yada,
Şairəm hər sözdə hər bir misrada ,
Min məna umannan xəbər al məni.
18 oktyabr 2015-ci il.Bakı şəhəri.