Bəs sənin öz izin hanı?
Gedilmiş yola çıxırsan.
Sütük çəkmələr altında,
Didilmiş yola çıxırsan.
Düşmüsən yolun ağına,
Daş dolaşır ayağına,
Özgə məsləkə sığınan,
Ütülmüş yola çıxırsan.
Bu yol ki, belə yellidir,
Demək hər kəsə bəllidir.
Uğurun da təsəllidir,
Güdülmüş yola çıxırsan.
Nə bilirsən hara gedir?
Bütövdür, ya para gedir?
Bəlkə də məzara gedir,
Bitilmiş yola çıxırsan?