QAYITMAZ
Dərd məndən elə bezib ki,
Bir də üstümə qayıtmaz.
Durum bir boylanım baxım,
Birdən üstümə qayıtmaz.
Şahım gözlər qiyaməti,
Ahım gözlər qiyaməti,
Ruhum göylər əmanəti,
Yerdə üstümə qayıtmaz.
Hanı ötən o kef-damaq,
Niyə mən səni sevdim, ah…
Can çıxdımı – örtün dümağ,
Pərdə üstümə – qayıtmaz.
NEYLƏYİB AXI
Yuvası pərən leyləyik,
Nə məcnun, nə də Leyliyik.
Yenə qışdan gileyliyik, –
Qış bizə neyləyib axı?
Oyandıq daş yuxusundan,
Çıxdıq qara-qorxusundan,
Sən allah düş yaxasından,
Yaş bizə neyləyib axı?
Dünya sirdi, sirdaş deyil,
Bizlə bağrı-badas deyil,
Ağaran saçdı, baş deyil, –
Baş bizə neyləyib axı?
Nə yük var kotana düşür,
Bəlkə kəl utana – düşür.
Lənət daş atana düşür, –
Daş bizə neyləyib axı?
Çoxu yad bəhsinə yanar,
Uyar öz nəfsinə, yanar,
Quru əvəzinə yanan,
Yaş bizə neyləyib axı.
